Jeremias 9

1 ሀይቅዳ ታ አሳስ ቃማነ ጋላስ ዬካና መላ ታ ሁጰይ ሃ ኦላ፥ ታ አይፈይ ፑልቶ ሃ ግዴረነ። 2 ኤንቲ ኡባይ ማካላነ ላይማትያ አስ ግድያ ግሾ፥ ታኒ ታ አሳፐ ሻከታዳ ባና መላ፥ ኦገ አስ አቅያ በሲ፥ ታዉ መላ ቢታን ደኤረነሽን።

3 "ኤንቲ ባንታ እንፃርሳን ዎርዶ ኦደታናዉ ኡባ ዎደ ጊግድ ደኦሶና። ኤንታ ቢታን ቱማ ግዶናሽን ዎርዶይ ካዎትስ። ኤንቲ እስ ናጋራፐ ሀራ ናጋራን ፕንዶሶና፤ ታና ኤሮኮና" ያጌስ ጎዳይ።

4 "እሽ ጭመይሳ፥ ሾሮይ ዝግረይሳ ግድያ ግሾ ሾሩዋፐ ናገቶ፤ እሻይ እሻ አማነቶፎ። 5 ሾሮይ ሾሩዋ ጭሜስ፤ ቱማ ኦደተይ ዴና። ዎርዶ ኦደታና መላ ባንታ እንፃርሳ ታማርስዶሶና፤ ናጋራ ኦሶን ባንታና ዳቡርስዶሶና። 6 ነ ጭሞ ግዶን ደኣሳ፤ ኤንቲ ባንታ ጭሙዋን ታና ኤሮና እፅዶሶና" ያጌስ ጎዳይ።

7 "ሄሳ ግሾ፥ ታ ኤንታ ብራታዳ ሴርሳና፤ ኤንታ ፓጫና። ታ አሳ ግሾ፥ ታ ሀራባ አይ ኦናዉ ዳንዳእያና? 8 ኤንታ እንፃርሳይ ዎያ ዶንገ ቶራ መላ፤ ኤንቲ ጭሞን ሃሳዮሶና። ባንታ ዶናን እሶይ እሱዋራ ሳሮ ቃላ ሃሳዮሶና፤ ሽን ባንታ ዎዛናን ፅሄ ዎሶና። 9 ያትን፥ ታ ሀ ሀኖታስ ኤንታ ሴራናዉ በሰኔ? ታኒ ሀይሳ መላ ካዎተ ቦላ ሀሎ ከያናዉ በሰኔ?" ያጌስ ኡባፈ ዎልቃማ ጎዳይ።

10 ታኒ ቃ ደረታስ ዬካና፤ ኤንታ ግሾ ዋሳና፤ ባዞን ደእያ ሄን ጋደታስ ዘሌላና። ኤንቲ ይዶሶና፤ ያራ እስ አስካ አና። መሄ ዋሶይ ስኤተና፤ ሳሎ ካፎትነ ዶአት ባቃትዶሶና።

11 "የሩሳላመ ካታማ ላለትዳ ኬላነ ዎርካናት ጉፕያ በሲ ኦና። ይሁዳ ካታማታ ኦንካ ዶና ባይሳ ከሳና" ያጌስ ጎዳይ።

12 ሀይሳ አኬካናዉ ዳንዳእያ ጭንጫ አስ ኦኔ? ሀራ አሳስ ኦዳና መላ ጎዳይ ኦደስ ቆንጭስዴ? እስ አስካ እያ ግዶራ አና መላ ቢታይ ኢትድ ባዞዳ ኦንዳይ አይብሴ?

13 "ሀይስ ሀንዳይ፥ ኤንታዉ ታ እምዳ ህግያ ኤንቲ አግዳ ግሾሳ። ኤንቲ ታዉ ኪተቶናነ ሀ ህግያ ካሎና እፅዳ ግሾሳ። 14 ሄሳ አግድ፥ ኤንቲ ባንታ ዎዛና ሙመተ ካልዶሶና፤ ኤንታ አዋት ታማርስዳ ባኣለ ጌተትያ ኤቃ ጎይንዶሶና" ያጌስ ጎዳይ።

15 ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ "ታኒ ሀ አሳ ጫምያ ካ ሙዛና፤ ዎያ ሃ ኡሻና። 16 ኤንቲ ዎይኮ ኤንታ አዋት ኤሮና ካዎተታ ግዶን ታ ኤንታ ላላና። ኤንታ ይሳና ጋካናዉ ማሻን የደና" ያጌስ።

17 ኡባፈ ዎልቃማ ጎዳይ ሀይሳዳ ያጌስ፦ "አነ ቆፕተ። ዬሆ ዬክያ ማጫሳታ ፄግተ፤ ዘለልስ ኤርያ አሳታ ኤህተ። 18 ኤንቲ ኤለስድ ይድ፥ ኑ አይፈይ አፉ ሆል ኦና ጋካናዉነ ኑ አይፍያ ጭሮይ ሃ ፑልታና ጋካናዉ ዘለልስ ከሶ። 19 ፅዮነን ዘለልሳ ግርስ ስኤቴስ፤ ‘ኑ ይዳ! ኑ ካዉይዳ! ኑ ኬይ ላለትዳ ግሾ፥ ኑ ቢታ አግድ ባናዉ ኮሼስ’ " ያጎሶና።

20 ህንተኖ፥ ማጫሳቶ፥ ጎዳ ቃላ ስእተ! ህንተ ሀይይ እያ ዶናፐ ከይያ ቃላ ሀይዞ። ህንተ ማጫ ናይታ ዘለልስ ታማርስተ፤ እሶይ እሱዋ ዬሆ ታማርሶ። 21 ሀይቆይ ዮጋ ናይታ ኦገን፥ ናአተታ ዳባባን ቄፅሸ ይድ፥ ኑ ማስኮተታ ጋክስ፤ ኑ ሚፃ ገልስ።

22 "አሳ አህ ቡረዳ ደንባን የገታና፤ ጫከይሳት ጫክድ ጉየ የግዳ ካ መላ ኤንታ ኦንካ ሺሸና" ያጌስ ጎዳይ።

23 "ጭንጭ ባ ጭንጫተን ጬቆፎ፤ ዎልቃም ባ ዎልቃን ጬቆፎ፤ ዱረይ ባ ዱረተን ጬቆፎ። 24 ሽን ጬቅያ ኦንካ ታና ኤሮንነ አኬኮን ጬቆ። ማሮተ፥ ሱረ ፕርዳነ ፅሎተ ሳአ ቦላ ኦያ ጎዳ፥ ታና ኤርድ ጬቆ፤ ሄስ ታና ኡፋይሴስ" ያጌስ ጎዳይ።

25 "ባንታ አሾ ፃላላ ቃፃረትዳ አሳ ታ ሴራና ዎደይ ያና። 26 ሄሳትካ ግብፀ፥ ይሁዳ፥ ኤዶመ፥ አሞነነ ሞአበ አሳነ ባንታ ሁጵያ ዩሹዋ ሜድድ፥ መላ ቢታን ደእያ አሳ ኡባ። ሀ ካዎተት ኡባይ ቱማ ቃፃረትቦኮና፤ እስራኤለ አሳ ኡባይካ ባንታ ዎዛናን ቃፃረትቦኮና" ያጌስ ጎዳይ።