Números 11

ጎዳፐ ይዳ ታማ

1 እስራኤለ አሳይ ባንታና ጋክዳ መቱዋን ጎዳ ቦላ ዙዙምዶሶና። ኤንታ ዙዙን ጎዳይ ስእዳ ዎደ እያ ሀንቆይ ኤፅን፥ ፁግያ ታማ ኤንታ ቦላ የድስ፤ ሄ ታማይ ኤንቲ ዱንካንዳ ጉታፐ እስ ባጋ ጋፃ ምስ። 2 ያትን ሙሰይ ኤንታ ግሾ ጎዳ ዎሳና መላ ኤንቲ ሙሰኮ ይድ ዬክዶሶና። ሙሰይ ዎስን ታማይ ቶእስ። 3 ጎዳ ታማይ ኤንታ ግዶን ኤፅዳ ግሾ፥ ሄ በሳይ ታቤራ*11:3 ታቤራ፦ ጉሳይ "ታማ ፁስ" ጉሱ። ጌተትድ ፄገትስ።

4 እስራኤለታራ ግብፀፈ ከይዳ ዱማ ዱማ ደረይ ሀራ ካ ማናዉ ዳሮ አሞትዶሶና። ኤንቲ፥ "ኑ አሾ አዉፐ ደማኔ? 5 ኑኒ ግብፀን ደእያ ዎደ ሚሸ ቃንፆና ምያ ሞሉዋ፥ ሌህያ፥ ሀባበ፥ ሹንኩርተ፥ ምስካት ባይና ሹንኩርተነ ቱሙዋ ሀሳዮስ። 6 ሽን ሀእ ኑ ቆይ ጎርደትስ፤ ኑ አይፈይካ ሀ ማናፈ አትሽን፥ ሀራባ አይባካ በኤና" ያግድ ዬክዶሶና።

7 ማናይ ዴቦ አይፈ ዳኔስ፤ እያ ማላይ ቦ አድልኤ ጪሸ ዳኔስ። 8 ማናይ ቃማ ዎስ፤ አሳይ ዩይድ እያ ማፅድ ዎፃን ጋጭድ ዎይኮ ኡዱላን ጫድድ ካሶና። ያትድ ኡኮሶና፤ እያ ማልኦይ ሻማሆ ዛይተራ ኡከትዳ ኡይ መላ። 9 ማን ቃማ ኤንታ ጉታን አካራ ዎስ።

10 አሳይ ባንታ ዱንካንያ ፐንገን ፐንገን ኤቅድ ዬክሽን ሙሰይ ስእስ። ኤንቲ ጎዳ ሀንቁዋ ደንዳ ግሾ፥ ሙሰይ ኡንኤትስ። 11 ሙሰይ ጎዳኮ፥ "ነ አይልያ፥ ታ ቦላ አይስ ሀ መቱዋ ኤሀዲ? ነ ታናን አይስ ኡፋይታብኪ? ነ ሀ አሳ ኡባ ቶሁዋ ታ ቦላ አይስ ዎዲ? 12 ሀ አሳ ኡባ ታ ቃንታድናዬ? ዎይኮ ኤንታ ታ የላድናዬ? ነ ኤንታ ማይዛታስ፥ እማና ጋዳ ጫቅዳ ቢታ ጋ ጋዳ ናአ እድማዳ ድችያ አሴዳ ታ ክኦን አይስ ኤንታ የጋዲ? 13 ሀ አሳ ኡባስ ታ አሾ አዉፐ ኤሀኔ? ኤንቲ ታኮ ይድ፥ ‘ማናዉ ኑስ አሾ እማ’ ያግድ ዬኮሶና። 14 ታኒ ሀ አሳ ኡባ ታርካ ቶካናዉ ዳንዳእከ፤ ታዉ ሄስ ዴፆ ቶሆ። 15 ህዛ ኔኒ ታና ሀይሳዳ ኦናፐ ታዉ ቃታ፤ ሀእ ታና ዎ፤ ሀ መቱዋፐ ታ ሸምፓ አጋና" ያግስ።

ላፑን ታሙ አሳ ዶረተ

16 ጎዳይ ሙሰኮ፥ "አሳ ካለናዉ ዳንዳእያ እስራኤለ ሀላቃታፐ ላፑን ታሙ ጭማታ ዶራ። ኤንታ ጌሻ ዱንካንያኮ ኤሀዳ ነ ማታን ኤሳ። 17 ታኒ ዎዳ ኔራ ያን ኦደታና፤ ታ ነዉ እምዳ አያናፐ ሻካዳ ኤንታ ቦላ ዎና። ኔኒ አሳ ቶሁዋ ነርካ ቶኮና መላ ኤንቲ ነና ማዳና።

18 "ኔኒ አሳኮ ሀይሳዳ ያጋ፤ ‘ዎንቶ ህንተ አሾ ማና ግሾ ህንተና ጌሽተ። ኑ አሾ አዉፐ ደማኔ? ኑስ ግብፀን ሳእ ሎኦሽን’ ያግድ ህንተ ዬክዳ ዬሁዋ ጎዳይ ስእስ። ሀእ ጎዳይ አሾ እማና፤ ህንተካ ማና። 19 ህንተ ማናይ እስ ጋላስ ዎይኮ ናምኡ ጋላስ ዎይኮ እቻሹ ጋላስ ዎይኮ ታሙ ጋላስ ዎይኮ ላታሙ ጋላስ ፃላላ ግደና። 20 ሽን ‘ህንተ ግዶን ደእያ ጎዳ ህንተ ካዳ ግሾነ ግብፀፈ ከዮና አትዳኮ ኑስ ሎኦሽን ግዳ ግሾ፥ ህንተዉ ሲራ ከያና ጋካናዉነ ህንተ ሳለታና ጋካናዉ እስ አጌና ኩመ ህንተ አሾ ማና’ ያጋ" ያግስ።

21 ሽን ሙሰይ ጎዳኮ፥ "ሄኮ፥ ታ 600,000 አሳ ካለሸ ደአይስ። ኔኒ እስ አጌና ኩመ ኤንቲ አሾ ማና መላ እማና ጋሳ። 22 ሚዛ ዉደነ ዶርሳ ዉደ ኡባ ሹክን ኤንታዉ ግዳኔ? አባን ደእያ ሞሎ ኡባ ሺሽያኮ ኤንታዉ ግዳኔ?" ያግስ።

23 ያትን፥ ጎዳይ ሙሰኮ፥ "ጎዳ ኩሸይ ቃንዬ? ታኒ ነዉ ኦድያባይ ቱሜኮነ ዎርዶኮ ኔኒ ሀእ በአና" ያግስ።

24 ሄሳ ግሾ ሙሰይ ካረ ከይድ፥ ጎዳይ ግዳይሳ አሳስ ኦድስ። እስራኤለ ጭማታፐ ላፑን ታሙ አሳ ሺሽድ፥ ጌሻ ዱንካንያ ዩሾን ኤስስ። 25 ያትን፥ ጎዳይ ሻራራ ዎድ እያራ ኦደትስ፤ እያ ቦላ ደእያ አያናፐ ኤክድ፥ ሄ ላፑን ታሙ ጭማታ ቦላ ዎስ። አያናይ ኤንታ ቦላ ሸምፕዳ ዎደ ኤንቲ ናበዳ ትንብተ ኦድዶሶና። ሽን ሄሳፈ ጉየ ዛሪድ ትንብተ ኦድቦኮና።

26 ሄ ላፑን ታሙ ጭማታራ ፃፈትዳ አሳታፐ ኤልዳዳነ ሞዳዳ ጌተትያ ናምአት ዱንካንዳ ጉታን አትድ ጌሻ ዱንካንያኮ ይቦኮና። ሽን ኤንታ ቦላካ አያናይ ዎን፥ ዱንካንዳ ጉታን ትንብተ ኦድዶሶና። 27 እስ ፓን አደይ ሙሰኮ ዎፅ ይድ፥ "ኤልዳድነ ሞዳድ ዱንካንዳ ጉታን ትንብተ ኦዶሶና" ያግስ።

28 ያንን፥ ባ ናአተፈ ዶምድ፥ ሙሰ ማድያ ናወ ናኣ እያሱይ ሙሰኮ፥ "ታ ጎዳዉ፥ ሙሰ፥ ኤንታ ተቃ" ያግስ።

29 ሽን ሙሰይ ዛሪድ፥ "ታ ግሾ ነ ቃናታይ? ጎዳይ ባ አሳ ኡባ ቦላ ባ አያና ዎድ ናበዳ ትንብተ ኦድስያባ ግድያኮ ታ ኡፋይታይስ" ያግስ። 30 ያትድ፥ ሙሰይነ እስራኤለ ጭማት ዱንካንዳ ጉታ ስምዶሶና።

31 ቆፖና ጎዳይ ጫርኮ ደንድ፥ ሳአፐ ናምኡ ዋ መላ ቁ ግድ ፕራያ ኩራቾታ አባፈ ኤህስ። ኤንታ ዱንካንያ ዩሹዋን ኡባ ባጋራ እስ ጋላሳ ኦገ መላ ሳአን ዎዶሶና። 32 ሄ ጋላስነ ሄ ቃማ ኡባ፥ ቃስ ዎንተ ጋላስካ አሳይ ካረ ከይድ፥ ሄ ኩራቾታ ኦይክድ ሺሽዶሶና። ኤንታፈ ኦንካ 10 ክሎ ግራመፐ ጉ ሺሽበና። ኤንቲ ዱንካንያ ጉታ ዩሾን መልሳናዉ ምጭዶሶና። 33 ሽን አሾይ ቡሮ ኤንታ ዶናን ደእሽንነ ሜተትድ ዉሮና ደእሽን፥ ጎዳ ሀንቆይ አሳ ቦላ ኤፅስ፤ ጎዳይ አሳ ዎልቃማ ቦሻን ሾጭስ። 34 አሾ አሞትድ ሀይቅዳ አሳ ኤንቲ ሄ በሳን ሞግዳ ግሾ ሄ በሳይ ከብሮት-ሀታባ*11:34 ከብሮት-ሀታባ፦ ሀ ሱን ብርሸይ "አሞ ዱፎ" ጉሱ። ጌተትድ ሱንትስ። 35 አሳይ ሄ በሳፈ ደንድ ብድ ሀፀሮታ ጌተትያ በሳን ዱንካንዶሶና።