1 Taani Godaa danda7an naagas;

I taako simmidi ta waasuwa si7is.

2 Dhayo ollafe, silimo urqafe tana kessis;

ta tohuwa zaalla bolla essis;

ta hemethaa minthis.

3 Ta doonan ooratha yethi wothis;

hessika nu Xoossay galatetto yaageysa;

daroti be7idi yayyana; Godan ammanetana.

4 Godan ammanetiya,

otoranchota xeellonnay,

wordotara hemetonnay,

anjetida asi.

5 Godaw, ta Xoossaw,

neeni daro malaalsiyaba oothadasa;

neera liketey oonika baawa!

Neeni nuus qopida lo77o qofaa,

oonika taybanaw danda7onna;

Hessi taani odin wuriyaba gidenna.

6 Neeni yarshonne imo koyabaaka;

shin nena si7ana mela ta haythaa dooyadasa;

xuussa yarshonne nagara yarsho koyabaaka.

7 Hessa gisho taani, "Xaatha maxaafan

tabay xaafetidaysada taani yas.

8 Ta Xoossaw, taani ne sheniya oothanaw dosayis;

ne higgey ta wozanan de7ees" yaagas.

9 Gita shiiqon, ne xillotetha odana;

Godaw neeni ereysada,

taani markateysa aggike.

10 Ta ne xillotethaa ta wozanan qosabike;

ne ammanetethanne ne ashuwa odas.

Ne siiquwanne ne tumatethaa,

gita shiiquwan genthabike.

11 Godaw, ne maarotethaa taape haassofa;

ne siiqoynne ne tumatethay,

tana ubba wode naago.

12 Tayboy bayna iitabay tana teqis;

ta balay tana goozis;

ta xeellanaw danda7ike

Ta nagaray ta huuphe binaanape daris;

ta wozanay ta giddon til7is.

13 Godaw, tana ashshanaw ero ga;

ta Godaw, tana maaddanaw ellesa.

14 Tana wodhanaw koyeysati yeellato, kawuyo;

Ta qohetetha amotteysati kawuyidi guye simmo.