Marcos 6

Yesû walêsha bantû elufu litano

30 Kûwa baana babûganga abebwêlêle babûngakene kwê Yesû, bamuêlêle musahû gwa mianda gyonse gyabalongile no gilya gya balangile. 31 Nansilya kûbele bantû baangê babele basha no bakûgya no hakûbele antû hakûlêla. Yesû wêbalombwele: "Tûbagale kuntû kusi bantû twêtûshe kûko asho." 32 Nfulo, babandile mubwato bûgima bwabo no kûgyata hantû hasibele bantû.

33 Mone bantû baangê bebamwene basindûka, basingûlwêle kwabalê mukûgya; nobo bebatangêlêle lûbelo lwa magûlû kuima mubibûndê byabo batangêle kuika mbelê gya Yesû no baana babûganga bage. 34 ✝6.34: Lûb 27.17; 1 Mub 22.17; 2 Miab 18.16; Esek 34.5; Mt 9.36Abatukile mubwato, Yesû ûmwene mulongo gûkata gwa bantû, wêbamwenene lûsa, kibalo babele amo nagwe mikoko gisi no muempi, Yesû ûbambile kwêbalanga mianda giingê. 35 Aliikile lêngolo, bana babûganga bamugêlêle Yesû no kumulombola: "Anohatûle mukabenga, no djûba lyawa lwendo. 36 Wêbalage bantû baba bagyate mumabala no mubibûnde bikûbwêê bole byakûlya."

37 Yesû wêbaêndwêle: "Benywe bene mwibae byakûlya."

Nobo bamubulishe: "Twêbûnyonghona kûgya kûûla mikate gya mia gibêlê gya falanga, no kwêbaa kyakûlya?"

38 Noge Yesû wêbabulishe: "Ao mwino mikate gingaa? Mugye bêle mulole."

Bagêle kulola no basile kumulombola: "Twêno mikate gitano no misha gibêlê."

39 Onkao, Yesû ûtakêshe bana babûganga bage bebekêke bonse bibûngo bibûngo, abinya bibêsê. 40 Nobo bekeene, bibûngo bya bantû lûkama no bya bantu makumi gatano. 41 Yesû ûtwalile gilya mikate gitano no gilya misha gibêlê, ûlwele meso mwigûlû, no kumufwisha Kabesha Mpûngû. Yesû ûtimwine gilya mikate wêbaele baana babuganga bage bebatange bantû bonse. Kûwa ûtwalile gilya misha gibêle bebatange byonka bantû. 42 Bonse balêle no kwekûta. 43 Kûwa baana babûganga babungile biende bisigele bya mikate no bya misha badjulishe bitala kumi no bibêlê. 44 Balya balêle mikate babele baana balûme elufu litano.