1 Waliha Teofile, bandu bangi baerekire iandika mwatsi wa binwa byo byatsukaa mwa kati ketu. 2 Abakotsi abobabaa tuliho twa mikolere yoshe ya Yesu ihuluka mwa ndangiro. Iboho bobanatupfuliraa aMwatsi Mubuya wa Ongo. 3 Nani nabere namehulilitsa, niumpfa nemenya amikolere ya Yesu ihuluka mwa ndangiro ihikira tsene. Nekyo kyo kituma nikuandikira, waliha Teofile. 4 Namekuandikira kwebula mbu umenye akuli ya binwa byoshe byo waiisibwaa.

5 Mwa kianiro Herote abaa mwami wa kyango kye Yuteya, kwabaa mulume muuma ni ye Sakariya. Ne Sakariya uyo abaa muuma wa mwa bakungu ba hekalu ya Ongo na ba mwa kikanga kya shebakungu Abiya. Ne muka Sakariya ni ye Lisabeti, wa mwa lubuto lwa Aroni, amukungu mubere wa Baisiraeli. 6 Sakariya ne Lisabeti babaa batunganene mwa mbere sa Ongo. Ni baimitse kushe amateeko moshe ma Ninakuwetu nekola nga ko maneenire. 7 Wetuwe, ni batawete mwana, kureba Lisabeti abaa ngumba. Na babiri boshe ni bamekunguha kutsibu.

8 Lwire luuma, Sakariya abaa ni akola mulimo wa bukungu mwa hekalu ya Ongo kubwishi lwabaa lukoro lwa kikanga kiwe. 9 Na kwa ndungo ya bukungu yabaa mwa lwire umo, Sakariya ni yatoerwa na mbayi kweingira mwa hekalu ya Ninakuwetu na kwepfumbya abubani*. 10 Na mwa kashangi Sakariya abaa apfumbya abubani, amubuanano wa bandu boshe babaa ni bali hambua ni abahema Ongo. 11 Kwetsibya netsibula, malaika wa Ninakuwetu amukimira. Amalaika uyo nianaimana kwa munda wa malyo wa butanda bwa mitulo bwa repfumbetsako abubani.

12 Sakariya abere amuxunga, nianaishalima, neubaha kutsibu. 13 Wetuwe, amalaika uyo nianamubwira mbu: «Sakariya, utaubahaa kubwishi Ongo ameumpfa amahemo mawe. Mukatsi wawe Lisabeti akakubutira mwana wa butsana yo ukaluka mbu ye Yohana. 14 Amwana uyo akakuletera lumoo na kishaaluko, na bandu bangi bakamoera arebutwa liwe. 15 Kureba endeba mukulukulu mwa mbere sa Ninakuwetu. Atendexoma tifai neri mandi mapfu*. Akinali mwa bula bwa nina, endeuchutsibwa aMutima Akomire. 16 Endetuma Baisiraeli bangi bafulukira Ongo Ninakuwabo*. 17 Endehika nga ndumwa ya Ongo. Na kandi, endeba na mutima na maala nga mutahwa Eliya. Endetuma ababuti barongana na bana babo. Na kandi, endebindula bo batenguha abinwa bya Ongo*, kwebula mbu baate buteateanya nga bandu batunganene, mwa mbere sa Ongo. Kubatyo, endeba ni ameteanyira Ninakuwetu yo luanda lulingiriranyibwe kwemukokera.»

18 Wetuwe, Sakariya nianabutsa amalaika uyo mbu: «Kiki kyo kinganibwerekya ku akinwa kyo wameneena ikyo, kya kuli? Tsene ku mbera mungumwa ne mwichemwani naye mukekulu.» 19 Ne malaika nianabula mbu: «Ingye, ngye Kabuliyere, ngye ninaimana mwa mbere sa Ongo. Iye yamenituma kwiwe mbu nikupfulire aMwatsi Mubuya uyu. 20 Abinwa ibyo byendebererera mwa kianiro kyabyo. Wetuwe ko utaimirirebyo, kunchi, ukaba mutsiru. Utikikocheneena ihikira alwire lwa binwa ibyo byendeberereramo.»

21 Mwa kashangi umo, abandu bobabaa balindirire Sakariya, bashishala kweleama liwe mwa hekalu ya Ongo. 22 Abere ahulukamo, ni atangakikocha ineena nabo. Ni yerekohetsabo mwa minwe kureba ni ameba mutsiru. Kubatyo, abandu niabanakengula ku amehumananira mwa hekalu ya Ongo.

23 Sakariya, abere amemala abiro biwe bya mulimo wa mwa hekalu, nianafuluka ira mwe. 24 Inyuma ya biro bike, mwichemwe Lisabeti nianaheka bukule. Abandaa myetsi itano ni atahuluka. Ni yerebula mbu: 25 «Mutangalola kwa bibuya byo Ninakuwetu amenikolera! Amenitengya mwa xoni sa buumba mwa kati ka bandu.»

26 Abukule bwa Lisabeti bwabere bwamehika ku myetsi ndatu, Ongo nianatuma malaika Kabuliyere mwa mulungu we Nasareti, wa mwa kyango kye Ngalilaya, 27 ku munyere muuma yalukwa mbu ye Mariya. Amunyere uyo abaa atatsamenya mulume, wetuwe ni ahangirwe na mutabana muuma mbu ye Yosefu wa mwa kipfunga kya mwami Ndauti. 28 Malaika uyo nianahikira Mariya, amuketsa mbu: «Bwakyere, Mariya! Umoe, kureba Ninakuwetu amekuashanira kutsibu, ali na kuuma nawe.» 29 Mariya, abere ameumpfa angetsi iyo, nianaishalima neibutsa tikuno angetsi iyo ibwire ite.Malaika Kabuliyere nianahikira Mariya 30 Wetuwe, malaika nianamubwira mbu: «Mariya, utaubahaa kureba wamebonekya alukoo lwa Ongo . 31 Talola, ku ukaheka bukule. Nawe ukabuta mwana wa butsana, ukamuluka mbu ye Yesu. 32 Uyo, endeba mukulukulu, endelukwa Muala wa Ongo Nina-mu-mbingu, ne Ninakuwetu Ongo yewene endemuha abwime bwa shekulitsa Ndauti. 33 Endeima abiro byoshe kwa lubuto lwa Yakobo. Na bwime buwe butendeba na ntsindiro.»

34 Mariya nianabutsa malaika mbu: «Akinwa ikyo kyendebererera kite naho ndechi mulume?» 35 Malaika nianamuxubitsa mbu: «aMutima Akomire akakukimira, na maala ma Ongo Nina-mu-mbingu makakuxwika mu kipfutsa. Kubwishi bwekyo, amwana youkabuta, endeba ni akomire, bendemuluka mbu Muala wa Ongo. 36 Talola ku yahara myetsi ndatu iyi ni munyakyenyu Lisabeti ahete bukule bwa mwana wa butsana, nakuba ni ahara mukekulu na kandi ngumba. 37 Kureba hataba kinwa kifundene ira mwa Ongo.» 38 Niyo Mariya abula mbu: «Ingye ndi mucha wa Ninakuwetu, nikolerwe nga kowameneena.» Inyuma wa binwa byoshe ibyo, malaika nianaiendera.

39 Mwa biro umo, Mariya nianaya chuba mu mutsi muuma wa mwa kyango kye Yuteya. 40 Abere ahika iyo, nianaingira mwa nyumba ya Sakariya, neketsa Lisabeti. 41 Lisabeti abere mbu anaumpfa angetsi ya Mariya, amwana nianashata mwa bula bwa Lisabeti. Ne Lisabeti nianauchutsibwa aMutima Akomire. 42 Niananeena mu mulenge mule mbu: «Ongo amekuashanira ilengya abakatsi boshe. Na mwana yo ukabuta naye ameashanirwa. 43 Nani ngyende kwebula mbu nina wa Ninakuwetu anitangule? 44 Kubwishi shaniba nanaumpfa angetsi yawe, amwana yarali mwa bula bwani, ashata mu kishaaluko. 45 Uashanirwe kubwishi waimiriraa kwa mwatsi wo wapfulirwaa itoka ira mwa Ninakuwetu endebererera.»

46 Mariya nianabula mbu:

«Amwete wani asingya Ninakuwetu kutsibu,

47 na mutima wani amoera Ongo Muufutsi wani;

48 kureba amexunga abulompfu bwani, ngye mucha uwe.

Mwa kuli, ihuluka tsene, abandu boshe bendereniluka mbu naashanirwe,

49 kureba Ongo Nina amaala moshe amenikolera binwa binene.

Aretsina liwe ye Ongo Akomire.

50 Ko biro byoshe, enderebwerekya abubuya buwe

ku bo bamuubahire.

51 Amekola mulimo munene mwa maala ma kuboko kuwe,

Bo bali na myete ya kingami, ameshanchabo.

52 Abami, amekunulabo kwa ndebe sabo sa bwami;

abalompfu, amebatulabo*.

53 Bo babaa bakukwitse, amexokyabo,

wetuwe abaxoki, amefulukyabo minwe misha.

54 Ametabara Isiraeli mukotsi uwe,

ataibirire imubwerekya abubuya buwe,

55 nga ko ahaa manihisa botatakulitsa

Iburahimu na lubuto luwe, ku biro byoshe.»

56 Mariya nianaikala ne Lisabeti yo kianiro akishembashemba myetsi ishatu. Inyuma kwaho, nianafuluka ira mwabo.

57 Akashangi ka rebuta ra Lisabeti kabere kaeraho, nianabuta mwana wa butsana. 58 Abahuwenwe bewe na banyakyabo babere bahulikya ku Ninakuwetu amemupfira boncho bungi, niabanashaaluka kuuma naye.

59 Amwana, abere ahara na biro munane abutirwe, bamumonia*. Babaa abaxonda imutola aretsina ra ishe Sakariya. 60 Wetuwe, nina nianatinda. Abula mbu: «Akalukwa mbu ye Yohana.» 61 Nabo niabanamubwira mbu: «Era! Ku mwa kipfunga kyenyu mutali mundu yanalukwa mwetsina iri?»

62 Niyo babutsa ishe mwimukohetsa mwa minwe mbu: «Lihe tsina ro uxonda itola amwana?» 63 Sakariya nianahemabo kashayi, nianaandikako, mbu: «Aretsina ra mwana, ye Yohana.» Na bandu boshe bashishala. 64 Mu kashalimo, abunu buwe niabunabumbukala, na lulimi luwe luobokala. Nianaxubeneena nesingya Ongo. 65 Mulo, abahuwenwe boshe batsimbwa na buba bungi. Na mwatsi uyo nianashanchana mwa bitwa byoshe bya mwa kyango kye Yuteya. 66 Na bandu boshe bo bahulikyaa mwatsi uyo, baibutsiritsa mwa myete yabo mbu: «Mbeni amwana yamebutwa, endeba munduki?» Naki, mwa kuli, amaala ma Ninakuwetu manabaa kuuma naye.

67 Ne Sakariya, ishe wa mwana, nianauchutsibwa aMutima Akomire. Niananeena mwikola butahwa mbu:

68 «Ninakuwetu Ongo wa Isiraeli, asingibwe

Kureba ametabara abandu bewe ne tongotsabo.

69 Ametuxunguxulira Muufutsi wa maala,

wa mwa kipfunga kya mwami Ndauti, mukotsi uwe.

70 Ngakuno kwa neenaa ihuluka mira,

itsukira kwa batahwa bewe bakomire mbu

71 endetutumira yakendetuufula mwa balenda betu,

Na mwa minwe sa boshe bo banatubaa.

72 Kwapfiraa atyo botatakulitsa yo lukoo,

ataibiriraa andaane iwe ikomire.

73 Nga ko alahiritsiraa Iburahimu tatakulitsa,

74 mbu endetuufula mwa minwe sa balenda betu,

kwebula mbu tumukolere butsira buba,

75 mu bukome na mwikola byo bitunganene mwa mbere siwe,

Mu biro byoshe bya buingo bwetu.

76 Nawe, we mwanani, wenderelukwa mutahwa wa Ongo Nina-mu-mbingu;

Kureba iwe wo wendehika buxondotsi Ninakuwetu awiche

kwetunganyanya asanchira siwe*,

77 Na kwepfulirao aluanda luwe ku ahika iufulalo,

Mweshashiralo asantsambi salo.

78 Kweimitsanya na kwe Ongo wetu anapfa boncho bungi

akatutumira akyaka kya ira luulu mbu kitukoletse.

79 Kwekoletsa bo baikere mwa mutsimya na mwa nchira ya lupfu;

kwetuendya mwa nchira ya buholo*.»

80 Amwana uyo nianauxuka nebiriita mu maala mwa mutima. Nianaikala mwa bweru ihikira alwire lo aibwerekyaamo kwa luanda lwa Isiraeli.