1 Mwa mango Kaisari Tibere, mwami mukulu we Roma, abaa amemala myaka ikumi netano kwa bwime, abaa anakola kuuma ne Pondiyo Pilato, mukulukulu wa kyango kye Yuteya, ne Herote Andipasi, mukulukulu wa kyango kye Ngalilaya. Ne Firipo, mualabo, ni ye mukulukulu wa kyango kye Iturea na kye Tarakoniti. Ne Lisania naye ni ye mukulukulu wa kyango kye Abilene. 2 Ne Anasi ne Kayafa, ni boshebakungu.

Na mwa biromo, akinwa kya Ongo kihikira Yohana, muala wa Sakariya, mwa mango abaa ali mwa bweru. 3 Yohana Murubiki uyo nianatsuka mwa kyango kyoshe kya kwa musike we Yorotani, ni ahubiri abandu mbu bahingye amiberere yabo, barubikwe ne Ongo akashashirabo asantsambi sabo. 4 Kubatyo, niabinabererera abinwa bya mutahwa Isaya aandikaa mwa kitabo kiwe mbu:

«Mundu muuma yaneena mu mulenge mule mwa bweru mbu:

‹ Mutunganyanye anchira ya Ninakuwetu,

Mulingiriranye anchira yakatsukamo!

5 Kubatyo kintsi mueri akauchutsibwa,

Na kintsi kitwa na kintsi katwa bikabinduka malambo.

Na sanchira sa bionye seirwa sa butalu

na sosirimo bikuka, sikalambamibwa.

6 Na bandu boshe bexunga kwe Ongo atuufula*!›»

7 Bandu bangi bahikira Yohana mbu arubikebo. Wetuwe, Yohana ni yerebwirabo mbu: «Imwe muli nga bwoko bwa nchoka*! Inde yababwiraa mbu mukenge abutsibuke bwa Ongo bobuwicha? 8 Munerebwerekya mwa mikolere yenyu ku mwamehingya amiberere kwetenga mwa ntsambi senyu. Mutereihalilitsa mbu: ‹Iburahimu ye tatakulitsa wetu!› Anibabwira ku Ongo angakocha ihingya amabale aya, neirao bana ba Iburahimu! 9 Ambasha yameotolwa ihirwa mwa bisina bya miti kwekondayo. Kintsi muti watahetako bipfuma bikwirire akakondwa nelekerwa mwa muliro.»

10 Niyo amubuanano wa bandu abo bamubutsa mbu «Tukolekino?» 11 Ngye wa Yohana, mbu: «Yawete myambalo ibiri ahe yatawete yo muuma. Na yawete ku bilyo, naye akolatyo.»

12 Abafutishi ba koli nabo bahikira Yohana mbu arubikebo. Niabanamubutsa mbu: «Mwiyisa, netwe tuireki?» 13 Naye axubitsabo mbu: «Muterelengya komuteekirwe ifutisha.»

14 Abasura nabo bamubutsa mbu: «Netwe tuireki?» Yohana axubitsabo mbu: «Muterenyaa mundu faranga siwe neri imuhambika kinwa. Wetuwe ni mwamoera aluhembo lwenyu.»

15 Abandu babaa balindirire arehika ra Kirisitu. Aboshe bereanikira mbu kuti Yohana angaba ni ye Kirisitu. 16 Kubatyo, Yohana nianabwira aboshe mbu: «Ingye anibarubika mu mechi. Wetuwe, yahika ira nyuma kwingye, anilengitse maala. Nitalirene iminula amiriki ya kwa bilyato biwe. Iye yakabarubika mu Mutima Akomire na mu muliro. 17 Awete kwa lweri mwa minwe siwe kweulula abifufu mwa ngano. Angano iyo, akatumayo nebikayo mwa kitunda kiwe. Wetuwe, abifufu ibyo, endeshityabyo mu muliro watatsima.»

18 Yohana abaa ni apfula aMwatsi Mubuya kwa bandu nehabo mandi mahano mangi.

19 Mukulukulu Herote abaa ametsimba Herotiya, muka muala wabo, kwemuira mukatsi uwe. Na kandi, abaa anakola bindi bibi bingi. Kubwishi bwa byoshe ibyo, Yohana nianamukemera. 20 Nekyo, kituma Herote aongerera bundi bubi kwa bubi buwe, bwarehira Yohana mwa nyumba ya muliki.

21 Abandu boshe abo babere bamerubikwa, Yesu naye nianarubikwa. Abere ali yahema Ongo, ambingu niainakingukala, 22 na Mutima Akomire nianamukimira ngakuno ikuku. Na mulenge nianaumpfibwa itoka mu mbingu mbu: «Iwe, we Muala wani mutsiyirwa, iwe wounanimoya kutsibu*.»Arerubikwa ra Yesu

23 Yesu abaa na myaka aishembashemba makumi ashatu abere ali yatangira amulimo uwe. Abandu ni abaanikira mbu anaba muala wa Yosefu.

Ne Yosefu abaa muala wa Heli.

24 Ne Heli abaa muala wa Matati,

Ne Matati abaa muala wa Lawi,

ne Lawi abaa muala wa Meliki,

ne Meliki abaa muala wa Yana,

ne Yana abaa muala wa Yosefu.

25 Ne Yosefu abaa muala wa Matatiya,

ne Matatiya abaa muala wa Amosi,

ne Amosi abaa muala wa Nahumu,

ne Nahumu abaa muala wa Esili,

ne Esili abaa muala wa Nange.

26 Ne Nange muala wa Mati,

ne Mati abaa muala wa Matatiya,

ne Matatiya abaa muala wa Simei,

ne Simei abaa muala wa Yoseki,

ne Yoseki abaa muala wa Yota.

27 Ne Yota abaa muala wa Yohanani,

ne Yohanani abaa muala wa Resa,

ne Resa abaa muala wa Serubabeli,

ne Serubabeli abaa muala wa Sheritiyere,

ne Sheritiyere abaa muala wa Neri, ne Neri abaa

28 muala wa Meliki,

ne Meliki abaa muala wa Ati,

ne Ati abaa muala wa Kosamu,

ne Kosamu abaa muala wa Elimatamu,

ne Elimatamu abaa muala wa Eri.

29 Ne Eri abaa muala wa Yesu,

ne Yesu abaa muala wa Eliyasari,

ne Eliyasari abaa muala wa Yorimu,

ne Yorimu abaa muala wa Matati,

ne Matati abaa muala wa Lawi.

30 Ne Lawi abaa muala wa Simiyoni,

ne Simiyoni abaa muala wa Yuta,

ne Yuta abaa muala wa Yosefu,

ne Yosefu abaa muala wa Yonamu,

ne Yonamu abaa muala wa Eliyakimu.

31 Ne Eliyakimu abaa muala wa Meleya,

ne Meleya abaa muala wa Mena,

ne Mena abaa muala wa Matata,

ne Matata abaa muala wa Natani,

ne Natani abaa muala wa Ndauti.

32 Ne Ndauti abaa muala wa Yese,

ne Yese abaa muala wa Obeti,

ne Obeti abaa muala wa Buasi,

ne Buasi ni muala wa Salimoni,

ne Salimoni abaa muala wa Naxoni.

33 Ne Naxoni abaa muala wa Aminatabu,

ne Aminatabu abaa muala wa Atimini,

ne Atimini abaa muala wa Arani,

ne Arani abaa muala wa Hesironi,

ne Hesironi abaa muala wa Peresi,

ne Peresi abaa muala wa Yuta.

34 Ne Yuta abaa muala wa Yakobo,

ne Yakobo abaa muala wa Isake,

ne Isake, abaa muala wa Iburahimu,

ne Iburahimu abaa muala wa Tera,

ne Tera abaa muala wa Nahori.

35 Ne Nahori abaa muala wa Sherungu,

ne Sherungu abaa muala wa Reu,

ne Reu abaa muala wa Peleki,

ne Peleki abaa muala wa Eberi,

ne Eberi abaa muala wa Sela, ne Sela abaa

36 muala wa Kainana,

ne Kainana abaa muala wa Aripakisati,

ne Aripakisati abaa muala wa Shemu,

ne Shemu abaa muala wa Noa,

ne Noa abaa muala wa Lameke.

37 Ne Lameke abaa muala wa Metusela,

ne Metusela abaa muala wa Enoke,

ne Enoke abaa muala wa Yareti,

ne Yareti abaa muala wa Malaleli,

ne Malaleli abaa muala wa Kainana.

38 Ne Kainana abaa muala wa Inosi,

ne Inosi abaa muala wa Seti,

ne Seti abaa muala wa Atamu,

ne Atamu abumbwaa ne Ongo.