1 Lwire luuma, Yesu abaa ali mwa hekalu ni aiisa abandu nepfulirabo aMwatsi Mubuya. boshebakungu na beisa ba Muomba, kuuma na bangumwa, niabanamuhikira. 2 Niabanamubutsa mbu: «Utubwire ngakuno mu rubu lwande mweukola abinwa ibi? Neri, inde ya kuha amaala ma rekolabyo?»

3 Yesu nianaxubitsabo mbu: «Nani, anibabutsa kinwa kiuma. Munibwire: 4 Hai ho Yohana abonekyaa amaala ma rerubika abandu? Mbeni matokaa ira mwa Ongo, neri kwa bandu?»

5 Niabanatangira ibutsabutsanya mbu: «Tukemuxubitsa mbu matokaa ira mwa Ongo, naye niakatubutsa mbu: ‹Kubwishi bwaki, mutamwimiriraa?› 6 Na tukemuxubitsa mbu matokaa ku bandu, abandu boshe bo bali hano ni bakatwita mwetukabulanga mabale. Kubwishi aboshe baimirire kushe ku Yohana abaa mutahwa.» 7 Mwa ntsindiro niabanaxubya mbu: «Tutechi ha maala ma Yohana matokaa.» 8 Yesu naye nianaxubitsabo mbu: «Nani konoko, ndibabwire tikuno anerekola ibi mu maala mande.»

9 Inyuma kwaho, Yesu nianachira abandu amushinga uyu mbu: «Habaa mundu muuma yabyalaa ixwa liwe ra Misabibu. Amundu uyo, nianabwekya arexwa liwe ku bahingi bauma nebwirabo mbu bakenderemuha muhango wa myaka mwa mango bamexola. Nianaenda mu kihuo mbinga biro bingi. 10 Akianiro kya rexola kyabere kyaeraho, nianatuma muuma mwa bapfuku bewe kwa bahingi abo, mbu bamuhe amuhango uwe wa kwa myaka ya mwexwa liwe ra misabibu. Wetuwe, abahingi abo, niabanamuhumba, baba nemufulukya minwe misha. 11 Nina rexwa nianaxube tumirabo undi mupfuku. Uyo naye, niabanamuhumba nemukambanga. Bamuhentsa nemufulukya minwe misha. 12 Nianatuma kandi mupfuku wa kashatu. Uyo naye, niabanamukomanga nemuhentsa mwa ixwa. 13 Niyo nina rexwa ra Misabibu aibutsa mbu: ‹Niirende tsene? Nikatumirabo muala wani, mutsiyirwa, kuti iye, bangamupfa xoni.› 14 Wetuwe, abahingi babere baxunga muala uwe uyo, niabanabwirana mbu: ‹Talola! Uyu yakendelya amwandu wa rexwa iri. Tumwite, nge twaishibira naro.› 15 Niabanamuhentsa mwexwa, nemwita.»

Niyo Yesu abutsa abandu mbu: «Nina rexwa endekolera abahingi abo yoki? 16 Endehika, nehwerekeretsabo. Naho, endeha arexwa iro ro bandi bahingi.» Mwa mango abandu baumpfaa abinwa ibyo, niabananeena mbu: «Binwa biri ngebi, bitendetuhikira kiro na hake!» 17 Wetuwe, Yesu nianasitabo amesha, nebwirabo mbu: «aMaandiko Makomire aya mabwire mate?

‹Arebale ra bahimbi batindaa,

iro rorameba ibale rinene ra kwa musingi* wa nyumba.›

18 «Kintsi mundu yakendetoera kwe bale uko, endepfunikanga, na kintsi ula likendetoerako, rendemupfungulanga.»

19 Mwa mango abeisa ba Muomba na boshebakungu babere bahulikya batyo, niabanakengula ku Yesu sacha amushinga uyu kubwishi bwabo. Kubwishi bwekyo, mwa kashangi umoho, niabanabula mbu bamutsimbe, wetuwe, baubaha abandu.

20 Abakulukulu ba Bayahuti abo, niabanatangira ihulilitsa Yesu. Batuma bandu baitsimbire nga bandu batunganene, kwebula mbu bamutee kinwa. Bairaa batyo, kubwishi babaa baxonda imuhira mwa minwe sa bakulukulu ba kihuo. 21 Abandu abo niabanamubutsa mbu: «Mwiyisa, twichi ku unereneena neiyisa binwa bya kuli. Na kandi, utalaa ku bukulukulu bwa mundu, wetuwe, unereiyisa abandu miberere yo Ongo atsiyire. 22 Kunchi utubwire: Mbeni aMuomba wetu atuikiritse neri atuhangire ifuta koli ya Kaisari?»

23 Wetuwe, Yesu nianakengula ku bamemutea kinwa. Nianabwirabo mbu: 24 «Munibwerekye kichere kya lufaranga.» Nianabutsabo mbu: «Ashushani na retsina byobiriko byande?» Niabanaxubya mbu: «Bya Kaisari.»Abichere bya safaranga so siriko ashushani ya Kaisari 25 Niyo Yesu axubitsabo mbu: «Bya Kaisari, munerehabyo Kaisari. Na bya Ongo, munerehabyo Ongo.» 26 Abandu abo, batakocha imutsimwako kinwa kyoshekyoshe kyemutea mwa mbere sa bandu, wetuwe bashishalira amuxubyo uwe, babanetsira.

27 Inyuma kwaho, Basandukayo bauma bahikira Yesu. Abo, bo banerebula mbu abapfu batendepfuka. Niabanamubutsa mbu: 28 «Mwiyisa, Musa atuteekaa mbu mulume ahikitse akepfa atabutire mwana, muala wabo ni aingira amuxumbakatsi uyo, kwebutira wali mukulu uwe yo bana. 29 Aho, habaa balume balinda ba bula buuma. Afula niainahikya mukatsi. Niainapfa butsira mwana. 30 Muala wabo wa kabiri niaingira amuxumbakatsi uyo, wetuwe naye nianapfa butsira mwana kwa muxumbakatsi uyo. 31 Nialunaba lutyo na ku muala wabo wa kashatu naye. Aboshe ko babaa balinda, banapfa butsira imubutako kiro na mwana. 32 Mwa ntsindiro, amuxumbakatsi uyo, naye, nianapfa. 33 Tsene, mwepfuka, amukatsi uyo, endeba mukande? Kubwishi abalinda boshe bamuhikyaa.»

34 Yesu nianaxubitsabo mbu: «Abandu ba kwa kihuo kuno banaherukya neheruka. 35 Wetuwe, abandu be Ongo akendexunga ku bashushire ipfuka kweingira mwa kihuo kyo kyendehika, batendeherukya neri iheruka. 36 Batikyendepfa, bendeba nga bamalaika. Abo bo bana ba Ongo, kubwishi Ongo apfukyaabo. 37 Musa axungaa kushe ku abapfu bendepfuka. Aneena kwikyo, wetuwe aMaandiko mewe amabula kubwishi bwa kitundi kyokyabaa akiulumira. Aho, aluka Ninakuwetu mbu: ‹Ongo wa Iburahimu, Ongo wa Isake ne Ongo wa Yakobo*.›» 38 Yesu nianaxubebula mbu: «Ongo ye Ongo wa bandu bobaliho, wetuwe ate Ongo wa bapfu. Kureba aboshe baliho kwiye.»

39 Beisa bauma ba Muomba niabanabwira Yesu mbu: «Mwiyisa, wameneena kushe.» 40 Bataxuba iereka imubutsa kindi kinwa.

41 Yesu nianabutsa abandu mbu: «Kubwishi bwaki abandu ababula mbu Kirisitu Muala wa Ndauti? 42 Ndauti yewene aneena mwa kitabo kya Saburi mbu:

‹Ninakuwetu Ongo abwiraa Ninakuwetu mbu:

"Ikala kwa munda wani wa malyo,

43 ihikira honikendehira abalenda bawe

hatako wa bishando byawe*."›

44 «Ali mwami Ndauti aluka Kirisitu mbu Ninakuwabo, bateno ko Kirisitu uyo, angaxubeba Muala wa Ndauti?»

45 Abandu boshe babere bakinahulikya, Yesu nianabwira abemitsa bewe mbu: 46 «Mutereba ngakuno abeyisa ba Muomba. Ibo, banatsiyira itamba ni baimbere twantsu tuletule. Na kandi banatsiyira iketsibwa ahandu ha mibuanano, neikala kwa bipfumbi bya ira buxondotsi mwa masinakoki na hohalibwa linye. 47 Banerenyaa abyoshe bya baxumbakatsi baweteko, ni abahema Ongo mu kishangi kire kwebula mbu nge baxungwa na bandu. Abandu abo bendechirwa lubancha lutsibu irengya abandi bandu.»