1 Yesu nianabwira abemitsa bewe mbu: «Abinwa byaretsitatsa abandu kwekola ntsambi, bikanenderebaho. Wetuwe, alyae amundu yangaletabyo. 2 Kyangakwirire amundu uyo aminwe lushyo lunene mweosi, nekabulwa mwa nyancha kwebula mbu atasheeretsaa muuma mwa balere aba ikola ntsambi.

3 «Kunchi, munakohya! Munyakyenyu akekola bubi, ni wamukemera. Naye akehingya amiberere iwe, ni wamushashira. 4 Naye akekukolera kubi ngendo sirinda mu lwire luuma, na akekuhikira ngendo sirinda kwekuhema shashi, ni wamushashira.»

5 Lwire luuma, asandumwa sibwira Ninakuwetu mbu: «Waliha, utuongerere abwimire.» 6 Ninakuwetu nianaxubya mbu: «Muli mwangabere na bwimire buke, bungana nga mbeke ya haratali, mwangabwirire amuti uyu mbu: ‹Uikule neibyala mwa nyancha.› Nao ni akakola nga ko shamubwirao.»

7 Yesu nianaxube bwirabo mbu: «Mundu muuma mwimwe angawata ku mupfuku uwe yamuhingira neri yamusumbira kihyo. Mwa mango amupfuku uyo amefuluka mwexwa, mbeni ninakuwabo angamubwira mbu wiche chuba ulye? 8 Ihi! Ni akamubwira mbu: ‹Unitekere bilyo, ube neimbala alukimba lwawe lolukwirire, niyo wanitekulira, ihikira akashangi kenikalira nexoma. Neba nameotola ilya, nawe niyo walya nexoma.› 9 Mbeni amupfuku uyo, ninakuwabo akamusima kubwishi amekola nga ko shamukalihya? Ihi! 10 Nemwe konoko: mwamekola abyoshe byo Ongo shabakalihya mbu mukole, ni mwerebula mbu: ‹Itwe tuli bapfukuho, byotwamekola, byoshatunalirene ikola.›»

11 Mwa kashangi Yesu abaa aya i Yerusalemu, nianatsuka mwa kihati kya kyango kye Samariya ne Ngalilaya. 12 Abere axondeingira mu mutsi muuma, babentsi ikumi baya ikorana naye. Niabanaimana hale* naye, 13 nelehya amirenge mbu: «Yesu, Ninakuwetu, utupfire bwoncho!»

14 Yesu abere amexungabo, nianabwirabo mbu: «Muende, shamuyibwerekye kwa bakungu ba hekalu.*» Nabo babere bakinali mwa nchira ya reyayo, niabanakomibwa. 15 Muuma mubo abere amexunga ku amelama nianafuluka ira nyuma ni asingya Ongo mu mulenge mule. 16 Amundu uyo abaa Musamariya. Nianapfukama na busu hashi mwa mbere sa Yesu, nianamusima. 17 Aho, Yesu nianabula mbu: «Mbeni bate ababentsi ikumi boshanikomya! Abandi mwenda, bali hai? 18 Hatali kiro mundu muuma mubo ya mefuluka kwesima Ongo, ali ate amundu uyu yate Muyahuti?» 19 Niyo Yesu abwira aMusamariya uyo mbu: «Batuka, uende, abwimire bwawe bwamekuufula.»

20 aBafarisayo babutsa Yesu mbu: «abwami bwa Ongo, bukendehika mangoki?» Yesu axubitsabo mbu: «abwami bwa Ongo butendehika ngakuno kindu kitsenweko. 21 Abandu batendeneena mbu: ‹Bo buno buli hano!› neri ‹Bo bulaa buli halaa.› Mumenyae, ku abwami bwa Ongo ubo bwahara buli mwa kati kenyu.»

22 Na kandi, Yesu nianabwira abemitsa bewe mbu: «Kwehika biro byo mukalaa inixungako ingye, ngye Muala wa Mundu na munabe na mu lwire luuma, wetuwe ni mutinixungeko. 23 Abandu bendebabwira mbu: ‹Tamulole, kwali halaa!› Neri: ‹Tamulole, kwali hano!› Wetuwe, ni mutiyeyo, ni mutibe neimitsabo. 24 Kureba, ingye, ngye Muala wa Mundu nendeba nafuluka, nendexungwa ngakuno kwa kisherya kinerexungwa kwa mbingu nekoletsa kwa kihuo kyoshe. 25 Wetuwe, nishushire ninatanga na nubibwa lingi netindwa na bandu ba kianiro kino.

26 «Nga ko byabaa mwa kianiro kya Noa, ko bikanendexubeba mwa kashangi ngye Muala wa Mundu nendebanafuluka. 27 Mwa kianiromo, abandu babaa banerelya nexoma, babaa banaherukya neheruka, ihikira mwa lwire lo Noa aingiraa mwa mashuwa. Inyuma kwaho, niakunatsuka ngukutsi, niainaotola abandu boshe*.

28 «Ko lukanendeba lutyo ngakuno ko lwabaa mwa kianiro kya Loti. Abandu babaa banerelya nexoma, ni banereula neutsa, ni banerehinga nehimba. 29 Wetuwe, mwa lwire lwe Loti atokaa mwa mulungu we Sotoma, Ongo awisamo muliro ali ngakuno mpfula ya lutwa aitoka mu mbingu. Amuliro uyo, aotolaa abandu boshe*. 30 Batyo ko lukanendaba mwa lwire ingye, ngye Muala wa Mundu nikendefuluka.

31 «Mo lwire umo, yakendeba kwa muutu wa nyumba iwe, ni atikikime kwebingamo abindu biwe. Na yakendeba mwexwa ni atikifuluke kwa mutsi kandi. 32 Muubuke byo byahikiraa muka Loti*. 33 Ula yakaxonda ilanga abuingo buwe, endehetsabo. Wetuwe, ula yakendehetsabo, endelangabo. 34 Anibabwira imwe, mwe kiro umo, bandu babiri bendeba ni baonchire hauma, muuma endehekwa na undi endesiwa. 35 Bakatsi babiri bendeba ni abashera hauma, muuma endehekwa, na undi endesiwa. [ 36 Bandu babiri bendeba ni abakolera mwixwa, muuma endehekwa, na undi endesiwa.]»

37 Abemitsa ba Yesu, bamubutsa mbu: «Ninakuwetu, abinwa ibi byendebererera hai?» Nianaxubitsabo mbu: «Hakipfu kinaba, aho hasantsu sinatumana.»