1 Yesu nianatenga mwa lwichi lwe Yorotani ni auchwire aMutima Akomire. aMutima Akomire uyo nianamutwala mwa bweru. 2 Neyo, Shitani nianamuereka mu biro makumi ane. Na mwa biro makumi ane umo, Yesu ni aihangira ilya. Abiro ibyo byabere byametsuka, nianakukutsa.

3 Mulo, Shitani nianamubwira mbu: «Uli wena Muala wa Ongo, kalihya arebale iri mbu linduke mukati!» 4 Yesu nianamuxubitsa mbu: «Kiandikirwe mwa Maandiko Makomire mbu: ‹Amundu atangabaho kubwishi bwa mukati ho*.›»

5 Inyuma kwaho, Shitani nianamutwala handu hakangamire kutsibu. Mu kashalimo, nianamubwerekya amami moshe ma kwa kihuo. 6 Nianamubwira mbu: «Nikakuha amaala moshe aya na buxoki bwoshe bwa mami aya. Kureba naherwe amoshe ayo, nani ningahao yonishashire. 7 Kunchi, ukepfukama mwa mbere sani kweniimanikira, abyoshe ibyo ni bikaba byawe.» 8 Yesu naye nianaxubya mbu: «Kiandikirwe mwa Maandiko Makomire mbu: ‹Unereimanikira Ninakuwenyu Ongo nemukolera yenaweneho*.›»

9 Shitani nianatwala Yesu mwa mulungu we Yerusalemu. Nianamutereka hambashiro wa hekalu, nemubwira mbu: «Uli wena Muala wa Ongo, uixumbitse hashi kwetenga hano, 10 kureba kiandikirwe mwa Maandiko Makomire mbu:

‹Ongo akakalihya abamalaika bewe mbu bakulange!

11 Bekuheke mwa minwe sabo

kwebula mbu akishando kyawe kitatsitalaa ku ibale*.›»

12 Yesu nianamuxubyitsa mbu: «Kiandikirwe mwa Maandiko Makomire mbu: ‹Utereereka Ninakuwenyu Ongo*.›»

13 Shitani abere ameereka Yesu mwa nchira soshe ito, nianamusiya kasa, ihikira mu lundi lwire.

14 Yesu nianafuluka mwa kyango kye Ngalilaya ni aendibwa na maala ma Mutima Akomire. Na myatsi iwe iya ngulu mwa kyango kyoshe ikyo. 15 Abaa anaiyisa abandu mwa masinakoki mabo. Abandu boshe ni banamusingya.

16 Lwire luuma, Yesu nianaya mwa mulungu we Nasareti wauxukiraamo. Na lwire lwa Sabato lwabere lwaeraho, nianaingira mwa sinakoki nga kwatula aira. Nianabatuka kwesoma aMaandiko Makomire. 17 Niabanamuha amubungo wa kitabo kya mutahwa Isaya. Abere abungulakyo, nianabonekya ho haandikirwe mbu:

18 «aMutima wa Ninakuwetu ali kuuma nani.

Kubwishi Ongo anihakaa mapfuta kwepfulira abachene aMwatsi Mubuya.

Amenituma kwepfulirao bo baminirwe ku bakaminulwa.

Na kwa bihumahumi arexubelola.

Na bo banubibwa, ihirabo mu luliko.

19 Kwepfulirao abandu ku amwaka we Ninakuwetu wakabwerekyabomo abubuya buwe, amehika*.»

20 Inyuma kwaho, Yesu nianabunga amubungo wa kitabo ikyo, nianafulukitsao amukotsi wa mwa sinakoki, aba neikala. Abandu boshe bobabaa mwa sinakoki umo bamusita amesha. 21 Ni yabwirabo mbu: «aMaandiko Makomire aya mo mwameumpfa niri anibasomerao, mamebererera munolwire.»

22 Abandu boshe bamoera Yesu, baba neshishalira abinwa bya lukoo byabaa ereneena. Berebula mbu: «Era! Mbeni ate muala wa Yosefu uyu!»

23 Yesu nianabwirabo mbu: «Nichi kwamuxonda initea kinwa mwa mushinga wabula mbu: ‹Mushake, uilamye wenawene!› Yo mukanibwira kandi mbu: ‹Twameumpfa abyoshe byowamekola i Kaperenaumu. Kunchi, ukolebyo na mwa mulungu wenyu muno.›»

24 Yesu nianaxubebula mbu: «Mwa kuli, anibabwira ku hate kiro mutahwa yanakokerwa kushe kwa wabo. 25 Anibabwira mwa kuli ku mwa kihuo kye Isiraeli mwabaa baxumbakatsi bangi mwa kianiro kya mutahwa Eliya. Mwa kianiro umo, Ongo atawisaa mpfula mu myaka ishatu na myetsi ndatu, kuba nchala ntsibu kwa kihuo kyoshe*. 26 Ongo atatumaa Eliya kweasikya kiro na muxumbakatsi muuma mubo. Wetuwe, anamutumaa ku muxumbakatsi muuma ho wa mwa mulungu we Sereputa, mwa kihuo kye Sitona*.

27 «Na kandi, mwa kihuo kye Isiraeli, mwabaa babentsi bangi mwa kianiro kya mutahwa Elisha. Wetuwe, hatali kiro na muuma mubo yakomibwaa ali ate Naamani ho, mwicha mwa kihuo kye Suriya*.»

28 Abandu boshe bobabaa mwa sinakoki iyo, babere bahulikya abinwa ibyo, niabanatsibuka kutsibu. 29 Niabanabatuka, niabanahentsa Yesu mwa mulungu, bamukurira hambashiro wa katwa ka mutsi wabo abaa ahimbirweko. Babaa niabaxonda imuhumira mwa ngubula. 30 Wetuwe, Yesu nianashenchera mwa kati kabo, aiyendera.

31 Inyuma kwaho, Yesu nianakimira mwa mulungu we Kaperenaumu, mwa kyango kye Ngalilaya. Alwire lwa Sabato lwabere lwahika nianaiyisa abandu. 32 Abandu bashishalira ameiso mewe mo kutsibu kubwishi abinwa biwe ni biwete maala.

33 Mwa sinakoki umo, mwabaa mundu aundirwe na kixwatsi. Amundu uyo nianatangira iilakira kutsibu mbu: 34 «Ee, Yesu we Nasareti! Autuxondakoki? Mbeni uhikire kwetuhwerekeretsa? Nikwichi kushe. Iwe wo Ukomire wa Ongo.»

35 Yesu nianakemera akixwatsi ikyo kutsibu mbu: «Tsira, ube netenga mwa mundu uyu!» Akixwatsi ikyo kikuba amundu uyo hashi mwa kati ka bandu. Niakinamutokamo, butsira imubabatsa.

36 Abandu boshe niabanashishala kutsibu nebutsabutsanya mbu: «Binwaki bino? Amundu uyu ahentsa abixwatsi mu maala na mu nyiki, na mwa kashangi umo ni byabanehuluka mwa mundu!» 37 Na kwikyo, angulu mbuya ya Yesu niainashanchana mwa kyango kyoshe ikyo.

38 Yesu nianahuluka mwa sinakoki umo, nianaya mwa nyumba ya Simoni. Abere mbu ahika umo nianashingana netsala wa Simoni ni alwere shishira ntsibu. Niabanahema Yesu mbu amulamye. 39 Yesu nianaindamirira kwa munda wa mukoni abaa aliko, nianakemera ashishira iyo, niainamutokamo. Na mwa kashangi umoho, amukatsi uyo nianabatuka, abanetangira itekulira Yesu yo bilyo.

40 Aretsuba rabere rapfunika, baletera Yesu abakoni boshe bobabaa bali na makoni ma lwawelwawe. Yesu ni yeretereka aminwe iwe ku kintsi muuma mubo, nianalamyabo. 41 Abixwatsi byerehulukanga mu bandu bangi, ni abiyilakira mbu: «Iwe we Muala wa Ongo!» Wetuwe, Yesu nianakemerabyo kutsibu, atahabyo na kashangi keneena, kubwishi nibichi ku ye Kirisitu.

42 Bwabere bwakya, Yesu nianatenga mwa mulungu we Kaperenaumu nianaya handu ho hatali bandu. Abichiri bya bandu bangi niabanaya imuxonda. Babere bamemuxunga, baxonda ko bangamuleamya kwebula mbu atakisiyaabo kandi.

43 Wetuwe, Yesu nianabwirabo mbu: «Nishushire ipfula aMwatsi Mubuya wa bwami bwa Ongo mu indi milungu namo. Kubwishi, ikyo kyo kyatumaa Ongo anituma.»

44 Yesu abaa muhanga wepfula aMwatsi Mubuya mwa masinakoki ma mwa kyango kye Yuteya.