1 Lwire luuma, Yesu abaa handu hauma ni ahema Ongo. Abere ameotola ihema, muuma mwa bemitsa bewe nianamubwira mbu: «Yohana aiyisaa abemitsa bewe ihema Ongo. Nawe, Ninakuwetu, utuiyise netwe kotwangahema Ongo.» 2 Yesu nianabwirabo mbu: «Mwa kashangi mwahema Ongo, ni mwabula mutya:

‹Tata, abandu boshe bamenye kwiwe we Ongo, we ukomire,

Abwami bwawe buhike.

3 Uneretuha abilyo byetu bya kintsi lwire.

4 Uneretushashira asantsambi setu,

kubwishi netwe tunashashira aboshe bobametukolera bubi;

uteretusiya mbu tuhimwe na myereko.›»

5 Yesu nianabwira abemitsa bewe kandi mbu: «Tuanikire amushinga uno: Hangaba mundu muuma mwimwe ni awete mwira uwe. Na mwira uwe uyo angamuhikira mu kati ka kiro, ni amubwira mbu: ‹Ee mwira wani, unisombye mikati ishatu, 6 kubwishi mwira wani muuma amenihikira ni atoka mu luendo, nani ndawete biryo byemuha.› 7 Na yarali mwa nyumba akemuxubitsa mbu: ‹Utaniiraako burunga, mberanikingire alutsi. Ingye na bana bani twahara tuonchire. Ndangakibatuka mbu nikuhe mikati.› 8 Anibabwira ku nakiro atindebatuka kwemuha amikati, kureba iye mwira uwe, ni akanabatuka nemuha byaralaireko kubwishi bwareiminga liwe.

9 «Nani anibabwira mbu munerehema, nemwe mukerehabwa. Munerexonda, nemwe mukerebonekya. Munerekongota kwa lutsi, nemwe mukerekingulirwa. 10 Kureba kintsi mundu yahema yanahabwa. Na yaxonda yanabonekya. Na yakongota yanakingulirwa. 11 Inde ishe wa mwana mwa kati kemwe, muala akemuhema fi ni akamuha nchoka? Hatali! 12 Neri, muala akemuhema iyi ni akamuha kiratsi? Ihi! 13 Nakiro mbu munaba bandu babi, mwichi iha abana benyu yo bindu bibuya. Tsene, Ixo wenyu yali mu mbingu, mbeni ni atihe aMutima Akomire bobanamuhemao?»

14 Lwire luuma, Yesu abaa ni ahentsa kixwatsi kyokyatumaa mundu muuma aba mutsiru. Akixwatsi kyabere kyametoka mwa mundu uyo, mu kashalimo, amundu uyo nianatangira ineena. Na kichiri kya bandu bashishala kutsibu. 15 Wetuwe, bauma mwa bandu abo, babula mbu: «Belisebuli, amukulukulu wa bixwatsi, yaha amundu uyu amaala marehentsabyo!» 16 Na bandi ni abaxonda imuereka. Kubwishi bwekyo, niabanamuhema mbu abwerekyebo kalolero katengire mu mbingu.

17 Wetuwe, Yesu ni ahara echi amianikire yabo. Nianabwirabo mbu: «Bandu ba mu bwami buuma, bakerelwa bonabene ku bonabene, abwami ubo ni bwameshambukala. Na bandu ba mu kipfunga kiuma, nabo bali bangalwa bonabene ku bonabene, akipfunga ikyo ni kikashambukala. 18 Eo, Shitani naye akeilwisa yenawene, abwami buwe ni bwendesimika bute? Anibabwira ikyo, kureba imwe amubula mbu anihentsa abixwatsi mwa maala ma Belisebuli. 19 Niri anihentsa abixwatsi mwa maala ma Belisebuli, na bana benyu banahentsabyo mu maala mande? Kubwishi bwekyo, abana benyu abo, bonabene bobakendebachira alubancha! 20 Wetuwe ingye, niri anihentsa abixwatsi mwa maala ma Ongo, ni bula mbu abwami bwa Ongo bwamebahikira.

21 «Mwa kashangi mundu wa nyiki awete ku biruu alanga anyumba yiwe, abindu biwe ni bikanalangwa mu buholo. 22 Wetuwe, undi mundu yali na nyiki silengitse sa nina nyumba iyo, akehika imuhenda nemuhima, amundu wa sanyiki uyo, ni akamunyaa abiruu biwe byoshe byabaa ainihire, neaba abindu byamemunyaa.

23 «Yatali kwa munda wani ni mulenda wani. Na yataniasikya kwetuma, ishancha ni rashancha.»

24 Yesu nianabula kandi mbu: «Mwa mango akixwatsi kineretoka mwa mundu, kinatubatuba hohatali bandu kweya ixonda hokikatamukira. Nakyo kitabonekitseho, ni kyaneena mbu: ‹Nikafuluka mwa nyumba yani mo shanitenga.› 25 Kyahika mwa nyumba iyo, ni kyashinganayo ni yamebitsibwa netondekwa kushe. 26 Kubatyo, ni kyayebinga bindi bixwatsi birinda bibi kutsibu irengyakyo. Abixwatsi byoshe ibyo ni byaingiromo neikalamo. Na miberere mitsindu ya mundu uyo ni yaba mibi kutsibu irengya amibere.»

27 Yesu abere ali aneena abinwa ibyo, mukatsi muuma mwa mubuanano wa bandu, nianalehya amulenge, abula mbu: «Amukatsi yakubutaa ne nekuongya, aashanirwe!» 28 Wetuwe, Yesu nianaxubya mbu: «Bobaashanirwe kushe, ni bobahulikya akinwa kya Ongo nekola nga kokibwire.»

29 Na bandu bangi babere bamebuanana hofi ne Yesu, Yesu nianabula mbu: «Abandu ba kianiro kino bandu babi! Abaxonda mbu babwerekibwe kalolero. Wetuwe, batikyendehabwa kandi kalolero kali kate akalolero ka mutahwa Yona. 30 Amutahwa Yona abaa kalolero ku becha i Ninawi*. Nani, konoko, ngye Muala wa Mundu, konendeba kalolero kwa bandu ba kianiro kino.

31 «Mwa lwire Ongo endechira abandu bo lubancha, amwamikatsi yatokaa ibunyetako* endepfuka kuuma na mo bandu ba kianiro kino kwebasongera. Kubwishi iye, atokaa kihuo mbinga kwehulikya abinwa bya buteateanya bwa mwami Salomo. Na yali hano ye mukulukulu ku mwami Salomo.

32 «Alwire lo Ongo endechiramo alubancha, lwendeba lwahika, becha mwa mulungu we Ninawi bendepfuka kuuma nemwe mo bandu ba kianiro kino, kwebachira lubancha. Kureba, ibo, babere bahulikya binwa byo Yona ahubiriibo, bahingye amiberere yabo. Tsene, na yali hano ye mukulukulu ku Yona!»

33 Yesu nianabula kandi mbu: «Hatali mundu yangawakya itala nebisharo, neri nepfunikiraro mu kitonga. Wetuwe, anerehanikaro ku kahango, kwebula mbu abandu bobaingira mwa nyumba balole kwa kyaka. 34 Amesha retala ra mubiri wawe. Amesha mawe mali matalwere, amubiri wawe woshe ni akaba mu kyaka. Wetuwe, amesha mawe mali malwere, amubiri wawe woshe ni akaba mu mutsimya. 35 Kubwishi bwekyo, unakohya akyaka kyokiri mwiwe kitangebinduka mutsimya. 36 Tsene, amubiri wawe woshe akeba mu kyaka, butsira kitambo kyokiri mu mutsimya, amubiri wawe woshe ni akaba mu kyaka kya kuli, ngakuno ko aretala linakukoletsa mwa kyaka kyaro.»

37 Yesu abere amemala ineena abinwa ibyo, Mufarisayo muuma nianamubwira mbu ahike alye ku bilyo mwamwe. Yesu nianaingira mwa nyumba, aikala atangira ilya. 38 aMufarisayo uyo nianashishala kwexunga ko Yesu alya butsirekaraba kwa minwe, nga kwa ndungo yabo yabaa ibwire.

39 Ninakuwetu amubwira mbu: «Mo Bafarisayo imwe, munakomya ira nyuma wa lungu na mbale. Wetuwe, mwa myete yenyu ni muuchwire kalabwa ka bwitsi na bundi bubi. 40 Imwe, muli biashaasha! Mutechi ku Ongo yabumbaa byobiri ira nyuma, yanabumbaa na byobiri mwa kati? 41 Munereasikya abachene mwa bindu byo biri mwa lungu neri byobiri mwa mbale. Na batyo, abindi bindu byoshe ni bikahotsibwa kwimwe.

42 «Mulyae mo Bafarisayo Munerehana muhango muuma we kumi wa biti byobihumura kushe na munyeere neri wa sindi nini, wetuwe, muneresuntsuura ikola kyokitunganene, ni mwaba nesuntsuura itsiyira Ongo. Naho, ikyo ni kyomulirene ikola, butsira ilika ihana amuhango muuma we kumi wa bindi bindu ibyo.

43 «Mulyae mo Bafarisayo muneretsiyira iikala kwa bipfumbi byera buxondotsi mwa masinakoki. Na kandi muneretsiyira iketsibwa mu lubaho mwa mibuanano. 44 Mulyae momushushene na masinda momatangakimenyibwa ho mali, na ma bandu banatsukako butsira imenya!»

45 Muuma mwa beyisa ba Muomba nianabwira Yesu mbu: «Mwiyisa, kuluenda kouneena utyo, ni itukamba reutukamba!»

46 Yesu nianaxubya mbu: «Mulyae nemwe mo beyisa ba Muomba! Munerehekya abandu bo mitsio mitsito, naho imwe mutalinda muhira kuyo kwa myolota yenyu kuluenda areasikya abandu abo.

47 «Mulyae imwe! Kubwishi amwerehimbira abatahwa bo masinda, naho boxokulitsa ni bobaitaabo. 48 Nemwe kweira mutyo, ni mwameba tuliho kushe neikiritsa bya boxokulitsa bakolaa. Kureba ibo, bobabaa banereita abatahwa, nemwe, momuhimbirabo amasinda! 49 Kubwishi bwekyo, Ongo mwa buteateanya buwe aneenaa mbu: ‹Nikendetumirabo batahwa na ndumwa. Wetuwe bakendeita bauma mubo, na bandi bendenubyabo.› 50 Kubwishi bwekyo, ashiama ya batahwa boshe bobaitwaa, ihuluka arebumbwa ra kihuo, abandu ba kianiro kino, bendehwayo. 51 Abwiti ubo bwatangiraa ku Aberi ihikira ku Sakariya* yaitirwaa mwa hekalu hakatikati ka butanda bwa mitulo na handu hohakomire kutsibu. Anibabwira imwe, ashiama ya bandu boshe abo, abandu ba kianiro kino, bendehwayo.

52 «Mulyae mo beyisa ba Muomba! Munerebisha abandi bandu alufunguro kwebula mbu bataingiraa hohaiyisibwa kuluenda aremenya Ongo. Mwenabene munerexonda iingiraho, na bobaxonda iingiraho amuhangirabo.»

53 Yesu abere amehuluka mwa nyumba umo, abeisa ba Muomba na Bafarisayo niabanamutsibukira kutsibu nemubutsa binwa bingi. 54 Babaa abaxonda imutea kinwa kwebula mbu baate kinwa kyemusongera.