1 Yesu nianachira abemitsa bewe amushinga uyu mbu: «Kwabaa muxoki muuma, naye ni ali na mwimanitsi wa bitwe biwe. Lwire luuma abandu niabanaya isongera amwimanitsi uyo ira mwa ninakuwabo mbu ashanchashancha abitwe biwe. 2 Niyo amuxoki uyo, abirangira amwimanitsi uyo, nemubutsa mbu: ‹Mbeni mwatsiki wo nerekuhulikyako? Tsene, utikibe mwimanitsi wa bitwe byani. Kubatyo, kola amuancho wabyo.›

3 «Amwimanitsi uyo nianaibwira mwa mutima uwe mbu: ‹Ninakuwetu uyu axondenitengya kwa mulimo. Ngairande? Areyehinga ndangakocharo, na rehemeretsa naro nikapfiraro xoni. 4 Ahaa! Namemenya kyo nikakola mwa kashangi nikatengibwa kwa mulimo kwebula mbu niyo abandu bangerenikokera mwa manyumba mabo!›

5 «Amwimanitsi uyo, nianabirangira kintsi mundu yabaa aliko mwinda wa ninakuwabo. Nianabutsa amuxondotsi mbu: ‹Uliko mwinda wa binduki bya ninakuwetu?› 6 Nianamuxubitsa mbu: ‹Niriko mwinda wa ngunguru iana sa mapfuta.› Amwimanitsi uyo, nianamubwira mbu: ‹Ikala hashi, leta chuba amaruba mawe ma mwinda, andikako makumi atano.›

7 «Inyuma kwaho, nianabutsa aundi mbu: ‹Naweno, uliko mwinda wa binduki bya ninakuwetu?› Nianaxubya mbu: ‹Niriko mwinda wa mifuko iana ya ngano.› Amwimanitsi uyo, nianamubwira mbu: ‹Leta amaruba mawe ma mwinda andikako lunane.›

8 «Kubatyo ninakuwabo nianasima amwimanitsi mubi uyo kubwishi akolaa mu bwenge. Kureba, abandu ba kihuo kino banerekola abindu byabo mu bukalange kutsibu kwetunganyanya abinwa byabo na balikyabo irengya abandu ba kyaka.»

9 Yesu nianaxuba ineena mbu: «Nani anibabwira mbu munerekolesa abitwe bya bitingo bya kwa kihuo kino kwenyana mubyo. Kubwishi bwekyo, byendeba byamehwa ni mwendekokerwa mwa bwikalo bwa biro byoshe.

10 «Na mundu woshewoshe yangainihirwa mu bindu bike kutsibu, yanganaxube inihirwa mu bindu bingi. Na kintsi mundu yatangaba mubi mu bindu bike, niatanganaba na mubi mu bindu bingi. 11 Ku batyo, imwe muli mutangainihirwa mwa bitwe bya bitingo bya kihuo kino, inde ni yakendebaha abitwe bya kuli? 12 Muli mutainihirwa kwelanga bindu bya undi mundu, hatali mundu yangabaha byenyu.

13 «Hatali mukotsi yangakocha ikolera bo ninakuwabo babiri, ni akabaa muuma netsiyira aundi. Neri niakanaba ku munda wa muuma nenena aundi. Mutangakolera Ongo nekolera bitwe.»

14 Mwa mango aBafarisayo babere bali yobaumpfa abinwa byoshe byo Yesu abaa aneena, beremunena kubwishi ni banatsiira abitwe kutsibu. 15 Yesu nianabwirabo mbu: «Imwe munaxonda iibwerekya mwa mbere sa bandu ku mo mutunganene mwa mbere sabo. Wetuwe Ongo anamenya amitima yenyu. Kureba kya bandu abaxunga ku kibuya mwa mbere sabo, Ongo, iye, anabaakyo kutsibu.

16 «aMuomba wa Musa na Bitabo bya batahwa, byabaaho ihikira akianiro kya Yohana Murubiki. Ihuluka akianiro ikyo, aMwatsi Mubuya wa bwami bwa Ongo wanapfulwa. Na kintsi mundu anaihangana kweingira mwa bwami ubo. 17 Wetuwe, lichire chuba ambingu na kihuo kwesintsibana, wetuwe kwa Muomba kutendetoka kiro na ndomo nguma.

18 «Amulume akehentsa mukatsi uwe, nehikya undi ni asingira. Na yashahikya amukatsi yashahentsibwa na mulume uwe naye ni amesingira.»

19 Yesu nianacha kandi undi mushinga mbu: «Kwabaa muxoki muuma ni anereimbala ngimba sikwirire, na sa kichiro kinene. Nianaba mu mukene abiro byoshe. 20 Ni hali na muchene muuma aretsina liwe ni ye Lasaro. Ne Lasaro uyo, amubiri uwe woshe ni auchwire binyoho. Na kandi ni ereonchitsibwa halukyo lwa muxoki uyo. 21 Abaa anerexumira ilya ku byobitoanga kwa mesa ma muxoki uyo. Asambwa nato serehika kwekombakomba abinyoho biwe.

22 «Lwire luuma, Lasaro nianapfa. Abamalaika bahika, bamutwala mu mbingu hofi ne Iburahimu*. Na muxoki naye nianapfa, niabanamuta. 23 Abere ali yanuba kutsibu mwa i kutsimu, nianabatula mesha mewe, axunga Iburahimu hale naye ne Lasaro ni ali hamusike kuye. 24 Nianailakira mbu: ‹Eh tata Iburahimu, Unipfire bwoncho! Aninuba kutsibu mwa muliro muno. Unitumire Lasaro atobetse amutwe wa mwolota uwe mwa mechi anitoetse itondi linibobole alulimi.›

25 «Wetuwe, Iburahimu nianamuxubitsa mbu: ‹We mwana wani, iwe, ubuka ku mwa buingo bwawe wabaa muxoki kutsibu, ne Lasaro ni ali bulio. Tsene, Lasaro iye, achirwa mikocho, nawe aunuba. 26 Na kandi, hakati ketu nemwe hali kiribu kire. Kubwishi bwekyo, bobali hotuli ino munda, bali abaxonda iya yomuli, litsibu. Na bobali yomuli, nabo litsibu kwehika hano hotuli.› 27 Amuxoki nianabwira Iburahimu mbu: ‹Unishashire, tata Iburahimu, lika Lasaro mwa mwetu. 28 Ko niwete baala betu batano, aende yatonderebo, nabo batangechehika ahandu ha minubo hano.› 29 Wetuwe, Iburahimu nianamuxubitsa mbu: ‹Baala benyu bawete kwa Bitabo bya Musa na bya batahwa kwetonderabo. Banereumpfa ngakuno ko bibwire.› 30 Amuxoki aneena mbu: ‹Ihi, mbe tata Iburahimu ikyo kyonakyene kitalingirirene. Wetuwe, ali mupfu muuma angaba akepfuka neya yo bali, bangahingya amiberere yabo.›

31 «Wetuwe, Iburahimu amuxubitsa mbu: ‹Baala benyu bali batahulikitse ko abitabo bya Musa na bya batahwa bibwire, ni batangaimirira mundu nakiro mbu shatoka mwa bapfu.›»