1 Mu lwire luuma lwa Sabato, Yesu nianaingira mu nyumba ya mukulukulu muuma wa Bafarisayo kwelya biryo. Abandu bobabaa bali mwa nyumba umo niabanasita Yesu yo mesha kwelola ngakuno akakolaki. 2 Tsene, na mwa mbere sa Yesu ni muli mundu muuma ahahire amubiri. 3 Yesu nianabutsa abeyisa ba Muomba na Bafarisayo mbu: «Kuluenda aMuomba wetu, mbeni atuhere rubu neri ihi, ilamya mundu mu lwire lwa Sabato?» 4 Wetuwe niabanaitsirira. Tsene, Yesu nianapfula kwa mukoni uyo, nemulamya, nianamubwira mbu iendere. 5 Yesu nianabutsabo kandi mbu: «Inde mwimwe amwana uwe neri anga iwe ingaba iketoera mu kiribu, mbeni angatinda ilibita itosayomo chuba nakiro mbu mu lwire lwa Sabato?» 6 Batakocha imuxubitsa kinwa.

7 Yesu nianakengula kwa bandu bobabaa balalikirwe abaixoa abipfumbi bya ira buxondotsi. Kubwishi bwekyo, ni yahanabo mu mushinga mbu: 8 «Mwa kashangi mundu mulebe akekulalika mu buheruki ni utiereikala kwa bipfumbi bya ira buxondotsi. Kubwishi mwa bandu bo balalikirwe mungaba mundu yapfirwe xoni ikulengya. 9 Amundu yapfirwe xoni uyo akehika, yashabalalika mwe babiri, ni akakubwira mbu: ‹Siira amundu uyu yo buali.› Aho, ni ukaxubuka kweya ikala kwa kipfumbi kye ira nyuma. 10 Wetuwe mwa mango wamelalikwa, ni waikala kwa kipfumbi kye ira nyuma. Kubwishi mwa kashangi yashakulalika akahika ni akakubwira mbu: ‹Mwirani, ipfunde ira buxondotsi ino.› Aho, ni ukapfibwa xoni na bandu boshe bo balya kuuma nawe. 11 Kureba kintsi mundu yandaiurukya, yakendekimibwa. Wetuwe yandaihohya iye, yakendeurukibwa.»

12 Inyuma kwaho, Yesu nianabwira amundu yashamulalika mbu: «Mwa mango auteka bilyo bya linye, bibe bya mu kati ka mwishi, neri bya mu luoloolo, ni utilalikeho bera bawe, neri banyakyenyu, neri ababuti bawe, neri abahuwenwe bawe baxoki. Kwebula mbu nabo bangendekulalika ni waba nga wamefulukitsibwa byo wakoleraabo. 13 Wetuwe mwa mango auteka biryo bya linye, ni werelalika abachene, na birema na bo baxuneera, na bihumamahumi. 14 Batyo, ni ukaashanirwa, kubwishi abandu abo batawete kyo bangakufulukitsa. Ongo endekupfuha mwa mango endepfukya abandu bo banakola byo bitunganene.»

15 Mundu muuma mu bobabaa abalya kuuma ne Yesu, abere ahulikya abinwebyo, nianabwira Yesu mbu: «Ameashanirwa amundu yakendelya kwa mbia ya mwa bwami bwa Ongo!»

16 Yesu nianamuxubitsa itsukira amushinga uyu mbu: «Mundu muuma atekaa biryo bingi bya linye nelalika bandu bangi. 17 Akashangi ka relya kabere kaeraho, nianalika amupfuku uwe kwebwira babaa amelalika mbu: ‹Muhike, tsene abindu byoshe byaharaho.› 18 Wetuwe aboshe abo, kintsi muuma mubo nianatangira ineena kyo kituma atahika. Amubere nianamubwira mbu: ‹Nameula ixwa, nishushire itangularo. Anikuhema unishashire.›

19 «Na undi naye nianabula mbu: ‹Naulaa bimasa ikumi bye nikerekolesa kwehinga, naya ierekabyo nga bingakola. Anikuhema unishashire.› 20 Na undi kandi nianabula mbu: ‹Nikinali mwa kiutu. Kubwishi bwekyo, ndangahika.›

21 «Amupfuku uyo abere afuluka nianapfulira ninakuwabo abinwa byoshe ibyo. Aho, ninakuwabo abere aumpfa abinwa ibyo, nianatsibuka. Nianabwira amupfuku uwe mbu: ‹Enda chuba mwa mbua na mwa mitanga ya mwa mulungu, nge waniletera muno abachene, na birema na bihumamahumi, na bo baxuneera.› 22 Inyuma kwaho, amupfuku nianafuluka nebula mbu: ‹Ninakuwetu, byoshaunikalihya, namekolabyo. Wetuwe, hakinali buali›.

23 «Niyo ninakuwabo abwira amupfuku uyo mbu: ‹Uye mwa nchira sa mwa bihya na sa mwa mikiki ya maxwa. Abandu boukatimana, unamingabo mbu baingire mwa mwani nge anyumba yani yauchula. 24 Mwa kuli, anibabwira ku hatali kiro na muuma mu bonalalikaa yakendelya kwa mbia yani!›»

25 Lwire luuma, bandu bangi niabanaenda kuuma ne Yesu. Nianakebera, nebwirabo mbu: 26 «Amundu yaxonda inikulikira ni anitsiira ilengya ishe, ne nina, ne mukatsi uwe, na bana bewe, na baala babo, na bali babo. Na kandi ni anitsiira ilengya abuingo buwe. Atakolire atyo, ni atangaba mwimitsa wani. 27 Yatangaheka amusalaba* uwe nenikulikira, atangaba mwimitsa wani.

28 «Mwa mango mundu muuma mwimwe axondehimba nyumba nyire, ni angaikere kasa kwelola ngakuno angabonekya bitwe byakakola nabyo kwekinda amulimo uyo. 29 Wetuwe, ali angahimba amusingi nefundwa iuchutsa anyumba iyo, aho abandu boshe bo bakerexunga anyumba iyo ni bakeremusheka mbu: 30 ‹Amundu uyu atangiraa ihimba nyumba iyi, wetuwe amelemwa iuchutsayo!›

31 «Mwa mango mwami mulebe axonda ilwa bita na undi mwami, ni sashushire iikala kasa kwelola ngakuno kuuma na basura bewe bihumbi ikumi angalwa nehima aundi mwami ya hika na basura bihumbi makumi abiri. 32 Akexunga ku atangalwa na mwami mulikyabo uyo, angamulikako ndumwa akinali hale kwexonda nchira ya buholo. 33 Nemwe konoko, hatali mundu mwimwe yangaba mwimitsa wani ali atangasia abyoshe byaraweteko.»

34 Yesu niananeena kandi mbu: «Amunyu kindu kibuya. Wetuwe, amunyu ni angaba akehetsa abuloke bwao, ni mungahirwaki kandi kwebula mbu atwe? 35 Amunyu uyo, ni atakilaitse kwa butaka na kwa mboleo. Analekerwa hambua. Yawete matwi mehulikya, ahulikye!»