1 Lwire luuma lwa Sabato, Yesu abaa atsuka mu maxwa ma ngano. Abemitsa bewe batangira ihulula bikumba bya ngano, bapfungapfungabyo mwa minwe sabo, babanelya asambeke*.

2 Bafarisayo bauma babutsabo mbu: «Esi! Kubwishi bwaki amukola kyo kitalirene ikolwa mu lwire lwa Sabato?»

3 Yesu nianaxubitsabo mbu: «Mbeni mutatangire mwa soma kyo mwami Ndauti akolaa mwa mango, iye na bandu babaa ali nabo ni bakukwitse? 4 Mbeni ataingiraa mwa nyumba ya Ongo*, nianatsimba mikati ya bandu babaa bametula Ongo. Mbeni atalyaayo, neha babaa ali kuuma nabo? Naho aMuomba wetu ni abwire kwa bakungu ba hekalu bonabeneho ni bobanalirene ilya ku mikati iri ngeyo*.» 5 Yesu nianabwirabo kandi mbu: «Ingye Muala wa Mundu, ngye Nina aSabato.»

6 Lundi lwire lwa Sabato, Yesu nianaingira mwa sinakoki, nianaiisa abandu. Nomo mwabaa mulume muuma wa makonongola mwa minwe ya malyo. 7 Abeisa ba Muomba na Bafarisayo babaa bamuteire amesha, kwelola tikuno akalamya amulume uyo mu lwire lwa Sabato. Baira batyo kwebula mbu baate kinwa kyo kyangatuma bamusongera. 8 Wetuwe Yesu ni echi amianikire yabo. Nianabwira amulume wa makonongola mwa minwe mbu: «Batuka, imana hakatikati ka bandu.» Amulume uyo, nianabatuka neimana hakatikati ka bandu. 9 Tsene, Yesu nianabwirabo mbu: «Anibabutsa, kihe kya Muomba wetu abwire mbu kilirene ikolwa mwa lwire lwa Sabato? Mbeni ikola kibuya neri ikola kibi? Ilamya mundu neri imwita?» 10 Yesu nianasindera aboshi, nianabwira amundu uyo mbu: «Lambula aminwe yawe.» Nianalambula aminwe iwe, iba nelama. 11 Wetuwe abeisa ba Muombabo na Bafarisayo niabanatsibuka kutsibu. Niabanatangira ibutsabutsanya ko bangaira Yesu.

12 Mo biromo, Yesu nianauruka kwa kitwa kweya ihema Ongo. Bukya ni ahema. 13 Bwabere bwamekya, Yesu nianabirangira abemitsa bewe, alondola mubo mo ikumi na babiri, alukabo mbu ndumwa: 14 Simoni yo Yesu atolaa aretsina mbu ye Petero, ne Andereya mualabo, Yakobo, ne Yohana, ne Firipo, ne Baritolomayo, 15 ne Matayo, ne Tomasi, ne Yakobo muala wa Alufayo, ne Simoni wa mwa kikanga kya baselote*, 16 ne Yuta muala wa Yakobo, ne Yuta Isikariyote yahotaa Yesu.

17 Yesu nianakima ampfuli kuuma na bemitsa bewe. Abere ahika mwa kibotebote, nianaimana. Ashinganamo mubuanano munene wa bemitsa bewe, na mubuanano munene kutsibu wa bandu abatoka mwa kyango kye Yuteya na mwa mulungu we Yerusalemu, na kwa munda wa milungu ye Tiro, ne Sitona, kwa musike wa ngetsi. 18 Abandu abo bahikaa kweumpfiritsa Yesu na kwelamibwa amakoni mabo. Na bobabaa baundirwe na bixwatsi, nabo, Yesu nianalamyabo. 19 Abandu boshe babaa ni abaxonda ipfula ku Yesu, kubwishi mwiye ni amutoka maala, nao ni amalamya aboshe.

20 Yesu nianasindera abemitsa bewe, abwirabo mbu:

Muashanirwe mwe bachene

kureba abwami bwa Ongo bwenyu.

21 Muashanirwe mwe bobapfire nchala tsene,

kubwishi mwendeuwuta.

Muashanirwe, mwe mulira tsene,

kureba mwendesheka.

22 Muashanirwe, imwe, mwa mango abandu abababaa neicha kwimwe, nebakamba, nebatera

kubwishi bwa Muala wa Mundu.

23 Mwa mango abinwa ibyo byenderebahikira, muneremoa neshaaluka, kureba Ongo ababikirire luhembo lunene mu mbingu. Batyo ko aboshekulitsa babaa bananubya abatahwa*.

24 Wetuwe mulyae mwe baxoki, kureba mwaotwere chirwa mikocho yenyu.

25 Mulyae mwe muuutire tsene, kureba mwendekukutsa;

Mulyae mwe musheka tsene, kureba mwendeba mu kiriro netoya mixonya.

26 Mulyae imwe, mwa kashangi abandu boshe ababahalilitsa,

kureba batyo kwa Boshekulitsa babobabaa banahalilitsa abatahwa babesi.

27 Yesu nianaxuba ibula mbu: «Wetuwe, momunihulikya anibabwira mbu: ‹Muneretsiyira abalenda benyu, ni mwa kolera bibuya bo bababaire. 28 Bo babatukanga, munerehema Ongo aashanirebo. Na bo babanubya munerehemerabo Ongo. 29 Amundu akekubanda luhyu kwe tema, ni wamubindulira alindi tema. Na mundu akekunyaa arekoti rawe, ni wamulika aheke na shimishi. 30 Mundu woshewoshe yakuhema kindu, ni wamuhakyo. Na yakunyaa abindu byawe, ni utibule mbu akufulukitsebyo.›» 31 Kya muxonda mbu abandu babakolere, nemwe ni kyomwakolerabo.

32 «Mukeneretsiyiraho bobabatsiyire, ni muwete simeki? Ni hatali. Banabe na bakotsi ba santsambi banatsiira bo batsiirebo. 33 Ni mungaba mukerekolera kibuya bo babakolera bibuya, ni muli na simeki? Ni hatali. Na bakotsi ba santsambi banakolerana batyo. 34 Kandi, mukeneresombyaho bo mwichi ku bangabapfuha, ni muli na simeki? Na bakotsi ba santsambi banerekunesombyanya ni bainihire ipfuhwa biwabo.

35 «Wetuwe, imwe, muneretsiyira abalenda benyu, nekolerabo bibuya. Ni mweresombyabo, butsira iba neene repfuhwa. Batyo, mwendehabwa luhembo lunene, mwendeba bana ba Ongo Nina-mu-mbingu. Kureba, iye, anakolera bibuya bobatasima na bakotsi ba bibi. 36 Munerepfirana boncho ngakuno ko ixo wenyu anabapfirabo.»

37 Yesu nianaxubebula mbu: «Ni mutierechira abandu yo lubancha, nemwe ni yo muterechirwalo. Ni mutierepfumaula abandi bandu, nemwe niyo mutenderepfumaulwa. Mutereancha abibi bya balikyenyu, nemwe niyo mutiendereanchirwabyo. 38 Munerehana, nemwe niyo mukenderehabwa. Na kyo mukenderehabwa kyo kyendelengwa kushe, netsindairwa, nehirianyibwa neuchutsa asashaho senyu neshesheka. Ko munerelengera abandi bandu, nemwe ko mwenderelengerwa.»

39 Yesu ninaxubechirabo aundi mushinga uyu mbu: «Mbeni, akihumahumi kyangakocha iendya kindi kihumahumi? Ihi! Kikekola kityo, abibiri ni bikatoera mu kiribu. 40 Amwiya atangalengya amwiisa uwe. Wetuwe kintsi mwia yashaotola iiisibwa kushe, ni endeba ngakuno amwiisa uwe.

41 «Kubwishi bwaki aulola kwa kati ko kali mwa lisha ra munyakyenyu, wetuwe, ni utalaire kwa ngingi ya muti yoiri mwa lisha rawe? 42 Wangakochote ibwira munyakyenyu mbu: ‹Munyakyetu, nilike nitengye akati ko kali mwa lisha rawe›, naho ni utalaire kwa ngingi ya muti yo iri mwa lisha rawe? Shetulimi tubiri iwe! Tangawatengya kasa angingi ya muti yoiri mwa lisha rawe, niyo wangakochetengya akati ko kali mwa lisha ra munyakyenyu.»

43 Yesu nianabula kandi mbu: «Hatali muti akwirire wangahetako bipfuma bibi, neri muti mubi wangahetako bipfuma bikwirire. 44 Kintsi muti anamenyerwa kwa bipfuma byao. Abandu batahanula bipfuma bya tini neri bipfuma bya musabibu ku muti wa mahwa. Muti wa tini 45 Batyoho, amundu mubuya anereneena binwa bibuya ni atengyabyo mwa mwete uwe. Na mundu mubi naye, anereneena binwa bibi byobiuchwire mwa mwete uwe. Kubwishi, abunu bwa mundu bunereneena byobiuchwire mwa mbikyo ya mwete uwe.»

46 Yesu nianabula kandi mbu: «Kubwishi bwaki amwereniluka mbu: ‹Ninakuwetu, Ninakuwetu›, ni mutamukola byo ni babwira? 47 Nga babwerekya kwa mundu ya niimitsa, nehulikya abinwa byani, nekola nga ko bineenire ashushire: 48 Ashushire mundu ya himbaa nyumba. Nianatima kasa kutsibu nehika kwa lukanga. Na kwa lukanga uko, kwahiraa amusingi wahimbaako anyumba. Kwabere kwamewa mpfula ya kiti, alwichi luuchula, na ngukutsi iibanda kwa nyumba uko. Wetuwe, anyumba iyo itakunuka, kureba yabaa ni isimikire. 49 Wetuwe, ula yaumpfa abinwa byani butsira ikola nga ko bineenire, ashushire mundu yahimbaa nyumba yiwe kwa mutaka butsira musingi. Alwichi lwabere lwameuchula, angukutsi niainaibanda kwa nyumba uko. Mu kashalimo, niainakunuka, neshambukala ayoshe.»