1 Mwa kashangi umo, kuhika bandu bauma, bapfulirao Yesu kuluenda aBangalilaya bo Pilato aitisaa ni abatula Ongo. 2 Yesu nianabutsabo mbu: «Mbeni amuanikira mbu aBangalilaya abo baitwaa kubwishi ibo bo banabaa bakotsi ba ntsambi ilengya abandi Bangalilaya boshe? 3 Ihi! Anibabwira ku nemwe mutahingyitse amiberere yenyu, ni mukendepfa ngakuno ibo. 4 Mbeni, amuanikira ku abandu ikumi na munane bobapfaa ni bametererwa na nyumba nyire ye Siloamu, mbu bobabaa babi ilengya becha i Yerusalemu boshe? 5 Ihi! Wetuwe anibabwira, nemwe, mutahingyitse amiberere yenyu, ni mwendepfa mwe boshe ngakuno ibo.»

6 Na kandi Yesu nianachirabo amushinga uyu mbu: «Mundu muuma abaa ahingire muti wa tini mwexwa liwe ra misabibu. Lwire luuma nianahika kwexondako bipfuma. Mu xumo nyibi atabonekyakoki. 7 Kubwishi bwekyo, nianabwira mukotsi uwe wa rexwa iro mbu: ‹Utatsene! Myaka ishatu iyi ni aninahika hano kwexonda bipfuma kwa muti uku, ni ndanibonekyakoki. Kondao, kubwishi abihya amutaka wo busha.› 8 Wetuwe, amukotsi uyo nianaxubya mbu: ‹Ninakuwetu, tangawalikao kandi amwaka unoho, nikashekererao, neongerera mutaka muinu mwa kisina kyao. 9 Kuti anganendehetako bipfuma kwa mwaka wahika. Na ali atahetireko bipfuma, niyo wabula mbu akondwe.›»

10 Lwire luuma lwa Sabato, Yesu abaa ni aiisa mu sinakoki. 11 Nomo ni muli mukatsi muuma. Amukatsi uyo abaa amebanda myaka ikumi na munane ni aundirwe na kixwatsi. Akixwatsi ikyo ni kyamemuonda amuongo, naye ni atangakikocha iindamuka kiro na hake. 12 Yesu abere amuxunga, nianamubirangira, amubwira mbu: «We mukatsi iwe, wamelamibwa abukoni bwawe!» 13 Niyo Yesu amuhirako asaminwe. Mwa kashangi umo, amukatsi uyo nianaindamuka, aba nesingya Ongo.

14 Wetuwe, amukulukulu wa sinakoki, iye, atsibuka kubwishi Yesu ni amelamya mundu mu lwire lwa Sabato. Nianabwira amubuanano woshe mbu: «Mutahabire ku mweinga munaba biro ndatu bya mulimo. Kunchi, munerehika ilamibwa mo biromo, wetuwe ni mute mwa lwire lwa Sabato.» 15 Wetuwe, Ninakuwetu nianamuxubitsa mbu: «Muli boshetulimi tubiri! Mbeni kintsi muuma mwimwe atanaabula anga iwe neri apunda iwe kwa kisibo mu lwire lwa Sabato kweya ilisayo mechi? 16 Eono, kwa mukatsi uyu naye, wa mwa lubuto lwa Iburahimu amebanda myaka kumi na munane ni aminirwe ne Shitani. Mbeni nge naye atanganaminulwa mu lwire lwa Sabato?»

17 Yesu abere ameneena atyo, aboshe bobabaa abakubirisanya naye baxubuka. Wetuwe, abandu boshe bobabaa mwa mubuanano, ibo bamoa kubwishi bwa binwa bibuya kutsibu bwabaa erekola.

18 Yesu nianaxubeneena mbu: «abwami bwa Ongo bushushireki? Nikashushanyabo naki? 19 Bushushene na kaheke ka haratali, ko mundu muuma ayaa ibiba mwa ixwa liwe. Akaheke ako kaxuka, kabinduka muti munene, na sanyonyi sitoka mwa kyanya, sihimba asanyutu sato mwa ndabi sao.»

20 Yesu axubeneena kandi mbu: «Nikalinganya abwami bwa Ongo naki? 21 Bushushene na chachu ya mukatsi muuma atsimbaa, nianahirayo hauma na bilo makumi abiri na bitano bya shano ya ngano, nayo ikaka.»

22 Yesu, abere ali ya urukira i Yerusalemu, nianatsuka mu milungu na mu mitsi ni aiisa. 23 Mundu muuma amubutsa mbu: «Ninakuwetu, mbeni bandu bakeho bo bendeufulwa?» Yesu amuxubitsa mbu: 24 «Munereitsibuhiritsa kweingira mwa lukyo lupfunda. Kubwishi, anibabwira imwe, ku bandu bangi bendexonda iingira mulo, wetuwe batiendekocha.

25 «Mwa kashangi nina anyumba endebatuka nekinga alutsi, imwe mwendeimana hambua ni amukongota nebula mbu: ‹Ninakuwetu, utukingulire.› Naye endebaxubitsa mbu: ‹Ndechi ho mutenga!› 26 Nemwe mwendetangira ineena mbu: ‹Esi! Tutalyaa nexoma kuuma nawe? Wabaa neiisa mwa mitanga ya mwa mitsi yetu?› 27 Wetuwe, naye endebaxubitsa mbu: ‹Ndechi ha mutenga. Mutengeho, mo bakotsi ba bubi!›

28 «Mo lwire umo, mwendexunga Iburahimu ne Isake, ne Yakobo na batahwa boshe, mwa bwami bwa Ongo, wetuwe imwe, ni mwamekabulwa hambua. Aho, ho mwendelira neshiya meno. 29 Abandu bendetenga mwa Mahuluke-tsuba na mwa Malenge-tsuba, i bunya-luulu na bunye-tako ni baya mwa linye ra bwami bwa Ongo. 30 Muumpfe! Bandu bauma mwa batsindu bendeba baxondotsi, na baxondotsi bendeba batsindu.»

31 Mwa kashangi umo ho, Bafarisayo bauma bahikira Yesu, ba mubwira mbu: «Uitokere hano, uye handi, kubwishi mwami Herote axonda ikuitisa.» 32 Wetuwe Yesu nianabwirabo mbu: «Shamubwire amuterere uyo mbu nikinahentsa abixwatsi nelamya abakoni munolwire na mungya. Na mwa bwakya mo nendemaliritsa amulimo wani. 33 Nishushire iba ku luendo munolwire na mungya, na mwa bwakya, kubwishi amutahwa atangaitirwa handi, iri ite i Yerusalemu.

34 «Mo becha i Yerusalemu, mo becha i Yerusalemu! Abatahwa na bandu be Ongo amebatumira mo munaitabo mu ikabulabo mabale! Namexonda ibabuanyanya ngendo nyingi, ngakuno kwa ngoko inabuanyanya abwalutse mwa bibaba byayo. Wetuwe, mutinda! 35 Muumpfe! Anyumba yenyu yeshiba mushaka. Anibabwira, imwe, mutikiendenixunga kandi ihikira kashangi ko mwendeneenamo mbu: ‹Asingibwe ya hika mwe tsina ra Ninakuwetu.›»