1 Yesu abaa mwa hekalu, nianatsungutsa amesha mwa bandu kwexunga kwa baxoki abatula mwa kitonga kya mitulo. 2 Na kandi, nianaxunga ku muxumbakatsi muuma muchene, naye ni atoetsamo tuchere tubiri twa faranga. 3 Niyo Yesu aneena mbu: «Mwa kuli, anibabwira ku amuxumbakatsi muchene uyu yametula bingi irengya abandi bandu boshe. 4 Kureba abandi boshe aba bemetula bitwe byobitalaitse kubo. Wetuwe, amuxumbakatsi uyu, iye, mwa buchene buwe, ametula abyoshe byashaweteko mwebaho liwe.»

5 Bandu bauma babaa abashambala kuluenda hekalu. Niabashambala kwa hekalu iyo, ihimbirwe kushe mu mabale makwirire na bindi bindu bikwirire bya bandu batulaa Ongo. Wetuwe Yesu niananeena mbu: 6 «Abindu byo mutseneko ibi, kwendehika biro byo mutendexunga ibale literekirwe ku lindi. Abyoshe byendeshambulwa.»aHekalu ye Yerusalemu

7 Niyo abandu babutsa Yesu mbu: «Mwiyisa, abinwa ibyo byendehika mangoki? Tukendemenya tute ku byaxondehika?»

8 Yesu nianaxubitsabo mbu: «Munakohya, muteretingwa! Kubwishi bandu bangi bendehika mwetsina rani, benderebula mbu: ‹Ingye, ngye Kirisitu. Akianiro kyameeraho.› Wetuwe ni mutikulikirebo. 9 Mwa mango mwenderehulikya abandu abaneena kuluenda lwa bita na kahinchangano, ni mutiereubaha. Kureba abinwa ibyo binashushire ihika kasa, wetuwe, mo kishangi umo ho, ni itetsi yaba yo ntsindiro ya kihuo.»

10 Inyuma kwaho, Yesu nianabwirabo mbu: «Luanda lwendelwa na lundi. Na bwami bwendelwa na bundi. 11 Kwendetsuka tulingiti tutsibu. Na handu hangi, hendeba bulio butsibu na kicha kitsibu. Na kwa mbingu kwendeba tushingishiro tutsibu to twendeubahya abandu.

12 «Wetuwe lubere abyoshe ibyo bihike, mwendetsimbwa nenubibwa. Bendebatwala kwehura mwa masinakoki nebauma mu muliki. Na kandi bendebatwala mwa mbere sa bami na sa bakulukulu ba kihuo kubwishi bwa ngye. 13 Mwa nchira umo mo mukenderepfula kyo mwichi kwingye. 14 Tsene, kyo mungamenyire mwa mitima yenyu ni kyeki: mwa kashangi mwenderehura, ni mutereibutsiritsa lubere mbu mbeni mukahura mute. 15 Kubwishi ingye ngyenawene, ngyenikendebaha binwa bya buteateanya, ihikira ha balenda benyu batendekocha ibalwisa neri ibakubisa. 16 Na babuti benyu, na baala benyu, na kipfunga kyenyu, na bera benyu nabo, bendebaleta mwa mbere sa bakulukulu. Na bauma mwimwe bendechirwa lubancha lwa lupfu. 17 Na bandu boshe bendebabaa kubwishi bwa ingye. 18 Wetuwe, hate kiro na lupfiri lwa kwa mitwe yenyu lo lwendehera. 19 Munerebeera, kureba mwa nchira umo, mo mwendeufula abuingo bwenyu.»

20 Yesu nianaxubeneena mbu: «Mwa kashangi mwendexunga amulungu we Yerusalemu ametsungulwako na basura, ni mwamenya kwa reshambulwa rao lihara hofi. 21 Abandu bo bakendeba mwa kyango kye Yuteya ni bashaira mwa bitwa. Na bo bakendeba mwa mulungu we Yerusalemu ni batokamo. Na bo bakendeba mwa bihya, ni batikixube mwa mulungu.

22 «Kubwishi abiro ibyo byendeba biro byo Ongo endechira abandu bo lubancha, kwebula mbu abyoshe byo biandikirwe mwa Maandiko Makomire bibererere*. 23 Abiro ibyo, byendeba biro bya buhanya kwa bakule na bo baongya! Kubwishi mwa kihuo, mwendeba minubo mingi, ne Ongo endebwerekya abutsibuke buwe kwa luanda ulo. 24 Bandu bauma bendeitwa mu buhombo, na bandi bendeperekwa mwa bindi bihuo byoshe. Na bandu ba sindi nganda bendelyatanga amulungu we Yerusalemu ihikira arebererera ra kianiro kyabo.»

25 «Ahilolero hyendexungwa mwetsuba, na mwa mwetsi na mwa nyenyetsi. Na mwa kihuo muno abandu bendehita mushiki nepfa buba kubwishi bwa burunga bungi bwa milaba ya nyancha. 26 Bandu bangi benderewa kihumu kubwishi bwa buba, kweanikira ku byo byahika kwa kihuo, kureba abyoshe byo biwete amaala mu mbingu byedetinganyibwa. 27 Aho, bendenixunga ingye, ngye Muala wa Mundu nianihika mwa bipfu kuuma na maala na ngulu nyingi. 28 Mwa mango abinwa ibi byendetangira ixungwa, mubatuke, musikye amyete, kureba areufulwa renyu ni rahara hofi.»

29 Inyuma kwaho, Yesu nianachirabo amushinga uno, mbu: «Mulolere kwa muti wa tini na indi miti yoshe: 30 Mwa kashangi munerexunga kwa bisani byao abixoa, muneremenya ku akianiro kibuya kyahika. 31 Konoko, na mwa lwire mwendexunga abinwa ibi byahika, ni mwamenya kwa bwami bwa Ongo buli hofi. 32 Mwa kuli, anibabwira, abinwa ibi byendebererera, bandu bauma ba biro bino, ni batechi bapfa. 33 Ambingu na kihuo byendetsuka. Wetuwe, abinwa byani ibyo, bitendetsuka kiro na hake.»

34 Yesu nianaxuba ineena mbu: «Munakohya! Mutaitamiritsaa mwexonda ilya bingi kutsibu netamira. Mutainubyaa kubwishi bwa buingo bwenyu. Ali lute lutyo, alwire lo arefuluka ra Kirisitu lwendehika mu kindibukira, 35 ngakuno kwa muteo anaxuta. Kubwishi akiro ikyo, kyendehikira abandu boshe ba mwa kihuo. 36 Munerekohya, ni amuhema Ongo mu kintsi kashangi. Niyo mwendewata nyiki sehima abyoshe ibyo byobingahika, neixunguxula mwa mbere sani, ingye, ngye Muala wa Mundu.»

37 Yesu abaa anereshiba mwa hekalu ni aiisa abandu. Na mwe kiro, abaa anaya ionchira kwa kitwa kye Miseituni. 38 Na bandu boshe babaa banalamukira mwa hekalu mwe lutumbi kwemuhulikya.