1 Yesu abere ameotola ineena abinwa byoshe ibyo kwa bandu bobabaa abamuumpfiritsa, nianaya mwa mulungu we Kaperenaumu. 2 Mwa mulungu umo mwabaa ni muli mukulukulu muuma wa basura ba Baroma. Amukulukulu uyo, ni awete mupfubulwa yabaa atsiire kutsibu. Amupfubulwa uyo, ni mukoni, naye ni ali ku lwepfa. 3 Amukulukulu wa basura uyo aumpfaa kwa bandu abashambala kuluenda Yesu. Nianatumira Yesu yo bangumwa bauma ba Bayahuti mbu bamubwire mbu ahike alamye amupfubulwa uwe. 4 Abangumwa abo babere bahika ho Yesu ali, niabanaitondoola kuye mbu: «Ninakuwetu, amundu uyu naye analirene umukolere kya kuhema, 5 kureba anatsiyira aluanda lwetu. Na kandi, yatuhimbiraa asinakoki yetu.»

6 Niyo Yesu aenda kuuma na bangumwa abo. Abere ahika hofi na nyumba ya mukulukulu wa basura, amukulukulu uyo nianatuma bera bewe ira mwa Yesu kwemubwira mbu: «Ninakuwetu, utakiitamyaa kubwishi nitalirene mbu uingire mwa mwani. 7 Na kubwishi bwekyo, shanixunga ngyewene ni nitalirene ihika yo uli. Wetuwe iwe, neena kinwa kiuma ho na mupfubulwa wani akalama. 8 Kureba nani ninateekwa na bakulukulu bani. Nani niwete basura boninateeka. Nikebwira muuma mbu ‹enda›, ni aenda. Nikebwira na undi mbu ‹hika› ni ahika. Nikebwira mupfubulwa wani mbu: ‹Koleki› ni akolakyo.» 9 Yesu abere ahulikya abinwa ibi nianashishalira amukulukulu wa basura uyo. Nianabindukira amubuanano wa mwimitse neneena mbu: «Anibabwira ku mwa kihuo kyoshe kye Isiraeli ndatangire naxungamo mundu yali na bwimire bungana ngobu.»

10 Bo batumwaa babere bafuluka kwa mutsi, niabanashingana amupfubulwa ni amelama.

11 Inyuma kwaho, Yesu nianaya mu mulungu muuma walukwa mbu Naini. Abemitsa bewe kuuma na mubuanano munene wa bandu baimitsanya naye. 12 Abere axondehika hofi na lukyo lwa mupfunda wa mulungu, nianashingana bandu bobabaa bahete ndundwe ya mwana wa butsana kweya itayo. Amutsana uyo abaa mwana wa kyusha wa muxumbakatsi muuma. Bandu bangi ba kwa mutsi uko ni bahereketse amuxumbakatsi uyo. 13 Ninakuwetu abere amuxunga, nianamupfira boncho bungi. Nianamubwira mbu: «Utakiliraa!» 14 Yesu nianaipfunda hofi na sanduku nepfula kuyo na bandu bobabaa baheteyo batindira. Yesu niananeena mbu: «Wemutsana, anikubwira mbu, sisimuka!» 15 Na mutsana yabaa amepfa, nianasisimuka. Nianaikala, abanetangira ineena. Yesu nianamufulukitsa nina.

16 Abandu boshe abo batsimbwa na buba, batangiresingya Ongo mbu: «Mutahwa munene amehika mwa kati ketu! Ongo amehika itutabara twe bandu bewe!» 17 Akinwa ikyo kye Yesu akolaa kishanchana mwa kihuo kyoshe kye Yuteya na mwa bindi bihuo byoshe bya mwa misike.

18 Abinwa byoshe ibyo, abemitsa ba Yohana, baya imupfulirabyo. Kubwishi bwekyo, Yohana nianabirangira babiri mwa bemitsa bewe. 19 Nianatumabo ho Ninakuwetu ali, kwemubutsa mbu: «Mbeni iwe we Masiya yakendehika neri tulindire undi?» 20 Abemitsa abo bahika ho Yesu abaa ali. Bamubwira mbu: «Yohana Murubiki shatutuma kwiwe mbu tukubutse mbu mbeni we Masiya yakendehika neri tulindire undi?»

21 Mwa kashangi umo, Yesu nianalamya bandu bangi bobabaa abanubibwa na makoni, na birema na bobabaa baundirwe na bixwatsi. Nianaha bihumahumi bingi yo xumo yelola. 22 Yesu nianaxubitsa abemitsa bobatumwaa ne Yohana mbu: «Muende, shamupfulire Yohana abinwa byoshe ibyo byomwamexungako nehulikya. Abihumahumi abilola, na birema abienda, na babentsi abakomibwa, na batwitwi abahulikya, na bapfu abapfuka, na bachene abapfulirwa aMwatsi Mubuya. 23 Aashanirwe amundu yatendehetsa abwimire buwe mwingye.»

24 Abandu bo Yohana atumaa, niabanafuluka. Niyo Yesu atangira ibwira amubuanano wa bandu kuluenda Yohana, mbu: «Mbeni mwayaa ixungaki mwa bweru? Mbeni lusheke lo lwabaa alutenganyibwa na muyaa? Ihi! 25 Neri, kiki kyo mwayaa ilolako? Mbeni mundu yabaa aimbere ngimba sa kichiro kinene? Kiro nako! Bobanaimbala asangimba sa kichiro kinene na bo bali mu buxoki, mwa manyumba ma bami mo banaikala. 26 Kiki kyo mwayeexungako? Mbeni Mutahwa? Naki! Anibabwira ku abaa mutahwa, ni alengitse na mutahwa. 27 Kuluenda Yohana uyo kokyaandikwaa mwa Maandiko Makomire mbu:

‹Muumphe! Nalika andumwa yani mbu ikuxondolere,

kwebula mbu ikutemulire anchira.*.›

28 «Anibabwira imwe, ku mwa bandu boshi ba kwa kihuo, mutali ya lengitse Yohana. Wetuwe amulere kutsibu mwa bwami bwa Ongo yanamulengitse.»

29 Abandu boshe na bafutishi ba koli bo bahulikyaa amyatsi wa Yohana bamenya ku Ongo anakola byobitunganene, baba nerubikwa naye. 30 Wetuwe, aBafarisayo na beyisa ba Muomba, baitindira kuluenda ibo, kye Ongo abaa axonda ikolerabo. Kubatyo, baitinda irubikwa ne Yohana.

31 Yesu nianabula kandi mbu: «Nendelinganya abandu ba mwa biro bino nende? Nende ye bashushire? 32 Bashushene na bana baikere mwa mbua, abaumananga binwa mbu:

‹Shatubatsihira murumbu, wetuwe, mutashamutsina!

Shatubaimbira nyimbo kandi sa kiriro, wetuwe, mutashamulira!›

33 «Rero Yohana Murubiki ahikire, abaa muhanga weihangira ilya, nexoma tifai, nemwe ni mwerebula mbu aundirwe na kixwatsi. 34 Muala wa Mundu ahikire ilya nexoma, nemwe amubula mbu: ‹Tsene kwa mundu uyu mukuhu na mutamitsi! Na mwira wa bafutishi ba koli na bandi bakotsi ba bibi›. 35 Wetuwe abandu boshe bo baimirire abuteateanya bwa Ongo, baneremenya kwa buteateanya ubo butunganene.»

36 Mufarisayo muuma nianalalika Yesu mbu ahike alye biryo mwamwe. Yesu nianaingira mwa nyumba ya mufarisayo uyo, nianaikala netangira ilya. 37 Mwa mulungu umo mwabaa mukatsi muuma wa ntsambi. Amukatsi uyo nianaumpfao ku Yesu alya bilyo mwa nyumba ya mufarisayo. Nianaingiramo ni awete ku ngaha ye bale, yo iuchwire lungo lwa kichiro kinene.Mukatsi muuma akababya abishando bya Yesu mwa mpfiri siwe 38 Nianaimana ira nyuma ku Yesu, hofi na bishando biwe ni alira. Na sandiro siwe seretotya abishando bya Yesu. Niyo amukatsi uyo erekababyabyo mwa mpfiri siwe. Nianakokera abishando bya Yesu nehakabyo lungo. 39 aMufarisayo uyo yalalikaa Yesu abere axunga batyo, nianaibubukya mbu: «Amundu uyu ali mutahwa, nge angamenyire ku uhe mukatsi yamemupfulako na wa bwokoki, nge amemenya ku amukatsi uyu mukotsi wa ntsambi.»

40 Yesu nianabwira aMufarisayo uyo mbu: «Simoni, niwete kinwa kye kubwira» Ne Simoni naye nianaxubya mbu: «Mwiyisa, neena.» 41 Yesu nianabula mbu: «Kwabaa bandu babiri ni baindikirwe na mundu muuma. Muuma mubo ni aindikirwe tinari* maana matano. Na undi ni aindikirwe tinari makumi atano. 42 Kubwishi abandu babiri aba babaa batawete kyepfuha, yaindikaabo nianashashira ababiri. Eo! Inde mwa bandu babiri aba, yangatsiyira kutsibu nina asatinari?» 43 Simoni nianaxubya mbu «Anianikira ku yashashirwaa mwinda munene.» Yesu nianamubwira mbu: «Wamexubya kushe.»

44 Niyo Yesu akebera ira amukatsi ali, nianabwira Simoni mbu: «Utatsene kwa mukatsi uyu? Shaniingira mwa mwawe muno, utashauniha mechi meoya abishando. Wetuwe, amukatsi uyu, iye, shanikarabya abishando byani mwa ndiro siwe, nekababyabyo mwa mpfiri siwe. 45 Utashaunikokera mwa mango shauniketsa. Wetuwe iye, ihuluka ho shaniingirira muno, atatangire alika ikokera abishando byani. 46 Utashaunihaka mapfuta kwa mutwe wani, wetuwe iye, shanihaka lungo kwa bishando byani*. 47 Kyokituma nikubwira ku nakiro asantsambi sa mukatsi uyu saluwa, nameshashirato. Kubatyo, amenibwerekya kwanitsiyire kutsibu. Wetuwe, yarameshashirwa bike, anatsiira like.» 48 Nianabwira amukatsi mbu: «Namekushashira asantsambi sawe.»

49 Bo babaa abalya kuuma naye, niabanatangira ibutsabutsanya mbu: «Esi! Munduki uyuno, yangashashira ntsambi?» 50 Wetuwe Yesu nianabwira amukatsi mbu: «Abwimire bwawe bwamekuufula, iendere mu buholo.»