1 Inyuma kwaho, abandu boshe bobabaa mwa Bushenge Bukulu bwa Bayahuti niabanabatuka netwala Yesu mwa mbere sa Pilato. 2 Niabanatangira imusongera mbu: «Twashinganaa amundu uyu ni asheeretsa abandu ba mwa luanda lwetu. Erehangirabo mbu batafutaa koli ya Kaisari. Na kandi ereihalilitsa mbu ye Kirisitu Mwami.»

3 Pilato nianabutsa Yesu mbu: «Mbeni we Mwami wa Bayahuti?» Yesu amuxubitsa mbu: «Kyowamebula kyenekyo!» 4 Niyo Pilato abwira boshebakungu na mubuanano wa bandu mbu: «Ingye, ndanixunga kyo kyangatuma amundu uyu achirwa lubancha lwepfa.»

5 Wetuwe, ibo baiminga kutsibu mbu: «Asheeretsa abandu mwa meiso mewe mwa kyango kyoshe kye Yuteya. Atangiriraao mwa kyango kye Ngalilaya, tsene yoyu amehika nao kuno.»

6 Mwa kashangi Pilato ahulikyaa abinwa ibyo, nianabutsa mbu: «Mbeni Yesu mwicha i Ngalilaya? 7 Abere amemenya ku Yesu mwicha i Ngalilaya ye Herote abaa ateekirwe, Pilato nianatuma Yesu ira mwa Herote, kubwishi Herote abaa ali i Yerusalemu mwa biro umo.»

8 Herote abere axunga ku Yesu, nianamoa kutsibu. Ihuluka biro bingi abaa anaipfutsa imuxunga kubwishi abaa anereumpfa abandu ni abashambala kuluenda iye. Kalengyo abaa axonda ixunga ku Yesu niakola kashingishiro. 9 Nianamubutsa binwa bingi. Wetuwe, Yesu atamuxubitsa kiro na kinwa.

10 boshebakungu na Beisa ba Muomba bobabaa aho, nianahambala mwesongera Yesu. 11 Herote na basura bewe bashekenyula Yesu nemunena. Niabanamuimbakya lukimba lukwirire, nemufulukya ira mwa Pilato. 12 Mwa lubere, Herote ne Pilato babaa balenda. Wetuwe, itangira alwire ulo, babinduka bera.

13 Aho, Pilato nianakongya boshebakungu, na bakulukulu ba Bayahuti na bandu. 14 Nianabwirabo mbu: «Mwameniletera amundu uyu mbu asheeretsa abandu. Kubwishi bwekyo, namemubutsa kuluenda abinwebyo mwa mbere senyu, wetuwe ndamuxungireko kinwa kibi mwa binwa byomumusongerako. 15 Ne Herote konoko, naye, atamuxungireko bubi bosheboshe. Nekyo kyo kyametuma anifulukitsaye. Tsene muumpfe, amundu uyu hatali bubi bosheboshe bwakolire bo bungatuma aitwa. 16 Kubwishi bwekyo, nikamuhumbisa, niyo namuminula.» [ 17 Mu kintsi lwire lukulu lwa Pasaka, Pilato abaa analikulira abandu bo mundu muuma wa muliki.]

18 Wetuwe, abandu boshe niabanalehya amirenge kuuma mbu: «Ita mundu uyu! Utuboholere Baraba!» 19 Ne Baraba uyo, abaa aminirwe kubwishi bwa kahinchangano ka bandu bakolaa mwa mulungu na kandi kubwishi aitaa mundu.

20 Pilato abaa axonda ibohola Yesu. Kubwishi bwekyo, nianaxubeneene na bandu. 21 Wetuwe, abandu niabanalehya kandi amirenge mbu: «Umuhangike ku musalaba! Umuhangike ku musalaba!»

22 Pilato nianaxubebutsa abandu ngendo ya kashatu mbu: «Akolire bubiki? Ingye ndaxungire kibi kyoshekyoshe kyokyangatuma aitwa. Kubwishi byekyo, nikamuhumbisa mu ngonyi niyo namubohola.»

23 Wetuwe, abandu baiminga kutsibu, balehya amirenge mbu Yesu ahangikwe ku musalaba. Pilato nianahimwa kubwishi bwa burunga bwa bandu. 24 Niyo Pilato akola nga kwa bandu abobabaa abamuhema. 25 Nianaboholerabo amundu yo babaa abahema. Naho amundu uyo, ni aminwaa kubwishi bwa kainchangano mwa mulungu na kandi abaa ameita mundu. Niyo Pilato ahabo Yesu mbu bamuire ngakuno ko bashashire.

26 Abasura niabanatwala Yesu ho bakamuhangika kwa musalaba. Niabanakorana na mundu muuma mbu ye Simoni ni afuluka mwexwa. Simoni uyo, abaa mwicha mwa mulungu we Kurene. Niabanamutsimba, bamuhekya amusalaba wa Yesu mu nyiki. Nianakulikira Yesu.

27 Muoba wa bandu bangi nianakulikira Yesu. Mubo ni muli bakatsi bo bamulirira, neiririkana kubwishi bwaye. 28 Yesu nianakebera ira bali, nianabwirabo mbu: «Mo bakatsi be Yerusalemu, mutaniliriraa, wetuwe muililire mwenabene na bana benyu. 29 Kubwishi, kwendehika biro bya bandu bendebula mbu: ‹Baashanirwe abakatsi ngumba bo batatangire babuta na bo batatangire baongya!› 30 Mo biromo,

abandu bendetangira ibwira abitwa mbu: ‹Mutukunukire!›

Na tutwa mbu: ‹Mutubishe*!›

31 «Kubwishi, bali banganikolerekyo ingye, ngye niri ngakuno muti mubishi, bate ko bakendebakolera imwe mo muli ngakuno miti myumu?»

32 Habaa na balume babiri bakotsi ba bibi bo baletwaa kwehangikwa kuuma ne Yesu. 33 Babere bahika ho hanalukwa mbu: «Kahangatsi», bahangika Yesu ku musalaba. Niabanahangika na bakotsi babiri ba bibi abo, muuma kwa malyo ma Yesu, na undi kwa malembe mewe.Arehangikwa kwa musalaba 34 [Aho, Yesu niananeena mbu: «Tata, ushashirebo, kubwishi batechi kyobakola.»]

Abasura niabanaabana asangimba sa Yesu mwikubirato mbayi. 35 Abandu bobabaa baimene aho ni abasindera. Abakulukulu ba Bayahuti bamushekenyula mbu: «Aufulaa abandi. Tsene aiufule yewene ali ye Kirisitu, yalondolwaa ne Ongo!»

36 Abasura nabo bakolera Yesu yo muchechu. Baipfunda hofi naye kwemuletera tifai ya ngala. 37 Niabanamubwira mbu: «Iwe uli we Mwami wa Bayahuti, uiufule wenawene!»

38 Hambashiro wa mutwe uwe habaa kashai kaandikirweko mbu: «Uyu ye Mwami wa Bayahuti.»

39 Muuma mwa bakotsi ba bibi abo bobabaa bahangikirwe kuuma naye kwa misalaba, nianakamba Yesu mbu: «Mbeni, ute we Kirisitu? Utibaiufule, netwe uketuufula!»

40 Wetuwe, mulikyabo nianamukemera, mbu: «Utaubahire Ongo nakiro mbu uchirirwe lubancha lwepfa ngakuno amundu uyu? 41 Itwe alubancha lotuchirirwe lwa butunganane, kubwishi twamechirwalo kweimitsanya na bibi byotwakolaa. Wetuwe amundu uyu, iye hate kiro na kibi kyakolaa.»

42 Ni yabula mbu: «Yesu, unaniubuka mwa mango wendehika kwe wima.» 43 Yesu nianamuxubitsa mbu: «Mwa kuli, anikubwira ku munolwire ukaba kuuma nani mwa Paratiso.»

44,45 Bwabere bwaxondeba kati ka mwishi, aretsuba litsima. Kubwishi bwekyo, amutsimya axwika akihuo kyoshe, ihikira mu saa mwenda. Na pasiya yo yabaa ihanikirwe mwa hekalu ya Ongo iberekera mwa katikati*.

46 Yesu nianailakira kutsibu mbu: «Tata, natereka amutima wani mwa minwe sawe.» Abere ameneena abinwa ibyo, nianatoa mutima*.

47 Amukulukulu wa basura, abere axunga byobyametsuka, nianasingya Ongo mbu: «Mwa kuli, amundu uyu abaa atunganene!»

48 Abandu boshe bo bahikaa kwexunga byobyameba, niabanafuluka, neenda niabaibandanga kwa bipfuba kubwishi bwa buyongya. 49 Abandu boshe bobabaa bechi Yesu, na bakatsi bo bamukulikiraa ihuluka i Ngalilaya niabanaimana hale kwelola ku byo byabaa abitsuka.

50,51 Habaa mundu muuma aretsina liwe ni ye Yosefu, wa mwa mulungu we Arimatayo, mwa kyango kye Yutea. Yosefu uyo, abaa mundu mubuya kandi ni atunganene. Abaa alindilire alehika ra bwami bwa Ongo. Na kandi abaa muuma wa mwa Bushenge Bukulu bwa Bayahuti. Wetuwe iye, abaa ataikiritsenye na balikyabo mwa luhota lwabo lwa reita Yesu. 52 Nianaendera Pilato kwemuhema andundwe ya Yesu. 53 Nianabula mbu bakimyeyo kwa musalaba, nianabungirayo mu mushangi akwirire, netayo mwesinda rorabaa litimirwe mu lukanga. Na resinda iro, ni litatsaratabwamo kiro na mundu.Aresinda 54 Alwire ulo, lwabaa lwakatano mwe luoloolo, na Sabato yabaa aixonda itangira.

55 Abakatsi abo bobabaa bahereketse Yesu ihuluka i Ngalilaya bakulikira Yosefu. Baxunga aresinda na kwa ndundwe ya Yesu yaterekwaamo.

56 Inyuma kwaho, niabanafuluka kweya ikola lungo na mapfuta mehaka andundwe ya Yesu. Na mwa lwire lwa Sabato niabanatamuka nga kwa Muomba aherebo rubu.