1 Alwire lukulu lwa mikati yoitemo chachu, lolunerelukwa mbu Pasaka, ni aluxonda ihika. 2 boshebakungu na beisa ba Muomba babaa berexonda ko bangaita Yesu. Wetuwe babaa ni baubahire abandu.

3 Shitani nianaingira mu Yuta yabaa alukwa mbu ye Isikariyote. Yuta uyo abaa muuma mwa ndumwa ikumi nebiri sa Yesu. 4 Nianaenda isimola na boshebakungu na bakulukulu ba balangi ba hekalu, kweumpfiritsanya nabo kwangahota Yesu kubo. 5 Niabanamoa kutsibu, niabanalaana ku bakamuha faranga. 6 Yuta nianaimira, nianatangira ixonda kashangi kabuya kwa ngahabo Yesu butsira abandu imenya.

7 Alwire lukulu lwa mikati itemo chachu luhika. Nalo ni lo lwire lobalirene ixootamo abyana bya-buli, kubwishi bwa bilyo bya Pasaka. 8 Yesu nianalika Petero ne Yohana mbu: «Muende mututekere biryo bya Pasaka nge twalyabyo.»

9 Niabanamubutsa mbu: «Auxonda mbu tutekerebyo hai?»

10 Nianaxubitsabo mbu: «Muumpfe: mweba mwaingira mwa mulungu, mwekorana na mulume ni ahete kibindi kya mechi. Amulume uyo, ni mwamukulikira mwa nyumba yakaingiramo. 11 Ni mwabwira nina anyumba iyo mbu: ‹Mwiyisa akubutsa mbu mbeni liri hai arechumbi rakaliramo abilyo bya Pasaka kuuma na bemitsa bewe.› 12 Naye akababwerekya ichumbi liali ra kwa korofa, lirimo abyoshe byobilaitse. Umo momukatekera abiryo bya Pasaka.»

13 Abemitsa bewe abo niabanaenda, batimana abyoshe ni binali nga ko Yesu shabwirabo. Ba baneteka abiryo bya Pasaka.

14 Akashangi kabere kaeraho, Yesu nianaikala kwelya kuuma na sandumwa siwe. Yesu alya biryo bya Pasaka kuuma na sandumwa siwe 15 Nianabwirato mbu: «Nalabwaa kutsibu ilya abiryo bya Pasaka iyi kuuma nemwe, buxondotsi ninubibwe. 16 Mwa kuli anibabwira ku ndikendelya kiro na hake ku Pasaka, ihikira lwire lonikendelya ku yoibererere mwa bwami bwa Ongo.»

17 Inyuma kwaho, Yesu nianatsimba alungu, nianasima Ongo, abula mbu: «Mutsimbe alungu ulu, mushangirelo. 18 Mwa kuli, anibabwira kwetangira akashangi kano nitikendexoma kandi tifai ino kiro na hake ihikira alwire lwa bwami bwa Ongo bwendehika.»

19 Inyuma kwaho, Yesu nianatsimba amukati, nianasima Ongo, nianacha muo, nianahao abemitsa bewe. Aneena mbu: «Uno wo mubiri wani wametulwa kubwishi bwemwe. Munerekola mutyo kweniubuka.»

20 Babere bameotola ilya, Yesu nianatsimba alungu lwa tifai, nianahalobo neneena mbu: «Alungu luno yo Ndaane Nyihya kwetsukira mwa shiama yani yoikashesheka kubwishi bwemwe.

21 «Wetuwe mulole, amundu yakanihotera ali hano, abobetsa kuuma nani mwa mbale. 22 Muala wa Mundu akapfa ngakuno kwe Ongo atondekaa. Wetuwe, alyae amundu yakamuhotera.» 23 Abemitsa bewe niabanatangira ibutsanya mbu mbeni inde mubo yakakola akinwa ikyo?

24 Inyuma kwaho, mwa kati ka bemitsa bewe niamunahuluka buhaka butsibu bwa remenya mbu mbeni inde ye mukulukulu ku balikyabo. 25 Yesu nianabwirabo mbu: «Abandu ba sindi nganda, abami babo banaimanirabo mu maala. Na bobali na maala kubo banereiluka mbu: ‹Bakotsi ba bibuya›. 26 Wetuwe imwe, muterekola mutyo. Amukulukulu mwimwe, ni yaba nga ye mulere. Na yaimanirire abandi ni yaba ngakuno ye mupfuku. 27 Kubwishi bwekyo, inde ye mukulukulu ku mulikyabo? Mbeni yaikere ni alya, neri yakola? Mbeni ate yaikere ni alya ye mukulukulu? Wetuwe nakiro mbu batyo, ingye niri mwa kati kenyu ngakuno mupfuku.

28 «Imwe mo mwamebeera kuuma nani mwa myereko yani. 29 Kubwishi bwekyo, ngakuno ko Tata anihaa abwami nani ko nabahabo. 30 Mwendelya nexoma mutyo kuuma nani mwa bwami bwani. Nemwe mwemukendeikala kwa ndebe sa bwami kwechira lubancha asanganda ikumi nebiri sa Baisiraeli.»

31 Yesu nianabwira Simoni mbu: «Simoni, Simoni, umpfa! Kwebaereka, Shitani amehabwa rubu lwebaulula ngakuno ko banaulula abulo. 32 Wetuwe, ingye namekuhemera kwebula mbu utasiyaa abwimire bwawe. Nawe, mwa mango ukanifulukira kandi, ni watsibuhiritsa banyakyenyu.» 33 Petero nianamubwira mbu: «Ninakuwetu, ingye niikiritse iya mwa muliki, linabe na repfa kuuma nawe.»

34 Yesu nianamuxubitsa mbu: «Petero, anikubwira ku munolwire, lubere axongole ikokobike, ukaba ni wameiana ingye ngendo ishatu mbu utanichi.»

35 Inyuma kwaho, Yesu nianabutsa abemitsa bewe mbu: «Mwa mango na batumaa butsira faranga, neri shaho, neri bilyato, mbeni hali kindu kyo mwahushaa?» Niabanaxubya mbu: «Ihi.»

36 Yesu nianabwirabo mbu: «Wetuwe tsene, yawete ku faranga atsimbe kuto, na yawete ku shaho atsimbe kuyo. Na yatawete ku buhombo, autse arekoti liwe aule buuma. 37 Anibabwira kwa binwa ibyo, byobiandikirwe mwa Maandiko Makomire bishushire inihikira mbu: ‹Aanchwaa mwa bandu babi*.› Kubwishi abinwa byobinitsene biri hofi nehika kwa ntsindiro yabyo.»

38 Abemitsa bamubwira mbu: «Ninakuwetu, talola ku hano tuliho na mahombo mabiri.» Naye nianaxubya mbu: «Muendere aho!»

39 Yesu nianatengaho, nianaurukira kwa kitwa kya Miseituni nga kwabaa atula aira. Abemitsa bewe niabanamukulikira. 40 Abere amehikako, nianabwira abemitsa bewe mbu: «Muheme Ongo, kwebula mbu mube na maala mehima amyereko.»

41 Inyuma kwaho, nianasiabo ku buende bwa retala bale lingatoera liri shalikabulwa. Nianashinga amapfi, nianatangira ihema Ongo mbu: 42 «Tata, ukeshasha, alungu lwa minubo ulu tsukyalo hale nani! Wetuwe, na kiro lwaba lutyo, litabaa nga ko nishashire, wetuwe areshasha rawe rolikolwae.»

[ 43 Niyo malaika atoka mu mbingu amukimira kwemuha nyiki. 44 Yesu nianatsimbwa na kindowa, abanelengeretsa kwehema Ongo. Asandubano sosabaa asimuchikako siba ngakuno matondi ma shiama mo matoangira hashi.]

45 Abere amekinda ihema, nianabatuka, nianaxuba hashasiya abemitsa bewe. Nianashinganabo ni bameya tulo, kubwishi ni bahotokire kwa buyongwa. 46 Nianabutsabo mbu: «Kubwishi bwaki amuya tulo? Mubatuke, muheme Ongo niyo mukaba na nyiki sa rehima amyereko.»

47 Yesu abere akinali aneena, mu kashalimo niakunapfumbuka muoba wa bandu. Ne Yuta, muuma mwa ndumwa ikumi nebiri sa Yesu ni yaxondolerebo. Nianasheera hofi ne Yesu kwemukokera. 48 Yesu nianamubutsa mbu: «Yuta, mbeni mwenikokera mo wanihotera ngye Muala wa Mundu?»

49 Abemitsa ba Yesu babere baxunga ku byobikatsuka, niabanamubutsa mbu: «Ninakuwetu mbeni tukomangebo mu buhombo?» 50 Mu kashalimo, muuma mubo nianakomanga amupfuku wa shebakungu, nemucha arekwitwi ra kwa malyo. 51 Wetuwe, Yesu niananeena mbu: «Muendere aho!» Nianapfula kwe kwitwi ra mupfuku uyo, nemufumyaro.

52 Inyuma kwaho, Yesu nianabwira boshebakungu na bakulukulu ba balangi ba hekalu na bangumwa ba Bayahuti boshabahika kwemutsimba mbu: «Kubwishi bwaki mwamenihikira ni muhete mahombo, na ngonyi, ngakuno ndi munyai? 53 Abiro byoshe nabaa kuuma nemwe mwa hekalu, wetuwe mutanitsimba. Wetuwe, kano ko kashangi kenyu, kandi kashangi ka maala ma bubi mo makola mu mutsimya.»

54 Inyuma kwaho, abandu abo niabanatsimba Yesu, niabanamutwala nemuhikya mwa nyumba ya shebakungu. Petero nianamukulikira kashando bunono.

55 Niabanachana muliro mwa kati ka mbuwa ya shebakungu, Petero nianaikala hauma nabo kweanyukala. 56 Mwa mango mucha muuma axungaa ku Petero ni aikere hamusike wa muliro, nianamusita amesha, abula mbu: «Amundu uyu naye abaa kuuma ne Yesu.» 57 Wetuwe Petero nianaiana, abula mbu: «We mukatsi! Ndechi amundu uyo!» 58 Hanyuma wa kishangi kike, undi mundu naye nianaxunga ku Petero, nianamubwira mbu: «Iwe nawe, uli muuma nabo!» Wetuwe Petero nianamuxubitsa mbu: «Ingye nde muuma nabo!»

59 Kwabere kwametsuka nga saa nguma, undi mundu nianaiminga ku Petero nebula mbu: «Mwa kuli, amundu uyu abaa kuuma ne Yesu, kubwishi naye mwicha i Ngalilaya.»

60 Wetuwe Petero nianaxubya mbu: «We mulume! Ndechi kyo uxondeneena.» Mwa kashangi umo, Petero akinaneena, axongole niainakokobika. 61 Ninakuwetu nianakebera nesindera Petero. Aho, Petero nianakengula ku Yesu amemuxunga. Nianaubuka abinwa byamubwiraa mbu: «Munolwire, buxondotsi axongole ikokobike, weba ni wameiana ingye kashatu ku utanichi!» 62 Petero nianahuluka hambua, nianatangira ilira mu buyongwa butsibu.

63 Abandu bobabaa abalanga Yesu babaa bamusheka nemuhumba. 64 Bamuxwika abusu, nemubutsa mbu: «Kola butahwa! Inde yamekuhumba?» 65 Niabanamubwira bindi binwa byemukamba.

66 Bwabere bwamekya, abangumwa ba Bayahuti, na boshebakungu na beisa ba Muomba niabanakorana. Niabanaleta Yesu mwa Bushenge Bukulu bwabo. 67 Niabanamubutsa mbu: «Mbeni we Kirisitu? Utubwire!» Yesu nianaxubitsabo mbu: «Nakiro na babwira mbu ngye iye, mutiniimirire. 68 Na kandi nikebabutsa kinwa, mutinixubitse. 69 Wetuwe, ihuluka tsene Muala wa Mundu akaikala kwa malyo ma Ongo Nina Maala.»

70 Aho, aboshe niyo bamubutsa mbu: «Rebula mbu iwe we Muala wa Ongo?» Yesu nianaxubitsabo mbu: «Byo mwamebula byenebyo.»

71 Mwa ntsindiro, niabanabula mbu: «Tutakilaire ku kaliho! Twenabene twameiumpfira byameneena yewene.»