Lucas 5

Yesu alondola abemitsa bewe baxondotsi

1 Lwire luuma, Yesu abaa aimene kwa musike wa ngetsi ye Ngenesareti*5:1 Ngetsi ye Ngenesareti: inalukwa kandi ngetsi ye Ngalilaya.. Na bandu bangi bamutsungulako na imupfundeeresta kwexonda ihulikya akinwa kya Ongo. 2 Nianaxunga ku mato mabiri kwa musike wa ngetsi, abahyana ni bametenga muo kweyaxua amakira mabo. 3 Nianaurukira mu bwato buuma ku mo mabaa aho. Abwato ubo bwabaa bwa Simoni. Nianabwira Simoni mbu asheetsebo mwa ngetsi, hale hake na musike. Nianaikala mwa bwato ubo, atangira iyisa amubuanano wa bandu.

4 Yesu abere amechikitsa iyisa abandu, nianabwira Simoni mbu: «Sheetsa abwato mwa mundubi, muume amakira menyu mwa mechi nge mwahyana fi.» 5 Simoni nianamuxubitsa mbu: «Oho, Mwiyisa! Twamehyana akiro kyoshe, wetuwe tutaitire kiro na kati! Kubwishi bwa kinwa kyawe, naxubeumamo amakira.» 6 Naho, niabanaumamo amakira mabo, baba neita kikanda kinene kya fi. Na makira mabo matangira ihutukanga. 7 Kubwishi bwekyo, niabanasimira balikyabo bobabaa mwa bundi bwato mbu bahike baasikyebo. Balikyabo babere bahika, bauchutsa amato mabiri mo fi, nao mahika mu kashangi kexonda itsika.

8 Simoni Petero abere axunga ikyo, nianapfukama mwa mbere sa Yesu. Abula mbu: «Ninakuwetu, ipfunde hale nani, kureba niri mundu wa ntsambi!» 9 Byabaa bityo kubwishi Simoni na balikyabo boshe ni bameshishalira abungi bwa safi sobabaa bameita.

10 Na baala ba Sebetayo, Yakobo ne Yohana, babaa banahyana kuuma ne Simoni. Nabo niabanashishala. Wetuwe, Yesu nianabwira Simoni mbu: «Utaubahaa! Ihuluka tsene, ukaba muhyana wa bandu.» 11 Inyuma kwaho, baxubesiika amato kwa musike wa ngetsi. Niabanasiya abyoshe nekulikira Yesu.