1 Yesʉ akaatambʉɨla amanyisigwa akwe, "Aɨ ʉkolɨ mʉntʉ ʉng’wɨ mʉgolɨ aɨ ʉkete milihwa wakwe. Mʉgolɨ nʉanso akaɨlwa kɨna milihwa wakwe wakulanga insao nʉilihilwe. 2 Lʉhikʉ lʉng’wɨ mʉgolɨ akamitanga milihwa, akamʉkolya. ‘Makani kɨɨ aya nɨkija kʉng’waako? Itungo ɨlɨ mbaɨle ialo nɨla nsao yane nɨnʉkilihile, kʉnsoko shanga ʉkʉlongoleka kʉtula wɨmilihwa wane hangɨ.’ 3 Itɨ gwa mɨlɨhwa ʉyʉ akasɨga kɨna. ‘Mʉgolɨ wane ʉkʉnihegelyaa ʉwilihwa wane. Itungo ɨlɨ kʉtenda ʉli? Kʉlɨma kʉleng’wa, hangɨ kenda kilompeelya kʉhung’wa mɨnyala. 4 Itungo ɨlɨ nalɨnga nɨkakʉtenda, anga nihegigwe mʉ mʉlɨmo ɨantʉ ahume kʉnsɨngɨɨlya mʉmatolao.’

5 "Kʉlʉlo akaitanga ʉng’wɨ ʉng’wɨ mʉantʉ naɨ adaigwe, akamʉkolya nʉa ng’wandyo, ‘Itɨɨ, ʉdaigwe inga nʉmʉgolɨ wane? 6 Mʉdaigwa nʉa ng’wandyo akasʉkɨɨlya. ‘Madebe igana nɨ makʉmi mʉnana na ataano na makuta amɨzeitʉni.’ milihwa ʉyʉ akamʉɨla ʉmʉdaigwa. ‘Hola itʉtʉ naɨ miandɨkɨe, kayanga andɨke makʉmi kenda na abɨɨlɨ.’ 7 Sʉnga akamʉkolya mʉdaigwa nʉa kabɨɨlɨ. ‘Haɨ ʉewe ʉdaigwe inga?’ Nʉanso akamʉsʉkɨɨlya. ‘Mɨsʉta magana abɨɨlɨ angano.’ Milihwa akamʉɨla ‘Hola itʉtʉ naɨ miandɨkɨe, andike igana nɨ makʉmi mʉtandatʉ.’ 8 "Itɨ gwa ʉmʉgolɨ akamʉlʉmbɨɨlya ʉmilihwa ʉyʉ nɨshanga mʉhʉɨɨli, kʉnsoko antʉ nɨshanga amʉhʉɨɨe Itunda kɨna ʉkete ʉlɨngi wɨdʉ, kʉsoko antʉ a mʉʉnkumbigʉlʉ ɨtʉmɨla mahala ɨdʉ, ingɨ antʉ nɨɨmʉtyata Itunda shanga ahʉgu anga nɨanso."

9 Yesʉ nʉyo akalongoleka kʉtambʉla, "Ʉnene kʉmʉɨli, tʉmɨli nsao kidumɨlya ahʉmbaʉ ɨanyu, ingɨ anga iʉle mʉsɨngɨɨligwe ni Itunda mʉlikalo nʉla kalɨ na kalɨ. 10 Mʉntʉ wɨhi nɨ mʉhʉɨɨli maintʉ nɨ maniino, ʉkʉtula mʉhʉɨɨli kʉ maintʉ nɨ makʉlʉ, hangɨ mʉntʉ wɨhi nɨshanga mʉhʉɨɨlɨ kʉ maintʉ nɨ maniino, shanga ʉkʉtula mʉhʉɨɨli kʉ maintʉ nɨdʉ. 11 Kʉlʉlo gwa nga ʉhite kʉtula wɨmʉhʉɨɨli kʉtʉmɨla ʉgolɨ nʉwa mihɨɨ, nyenyu gwa nʉkʉʉpeza ʉgolɨ nʉwa kɨ nkolo? 12 Hangɨ anga ɨze ʉnyenye shanga mɨahʉɨɨli kʉ ʉgolɨ nʉwa mʉntʉ mʉngɨɨza, nyenyu gwa nʉkʉmʉpa ʉgolɨ wanyu?

13 "Kʉtilɨ mʉntʉ nʉhumile kʉitʉmɨla agolɨ abɨɨlɨ, kʉnsoko ʉkʉmʉbɨpɨlwa ʉng’wɨ nʉkumʉlowa ʉmʉya, ang’wɨ ʉkʉtula nʉlwijo kʉ mʉgolɨ ʉng’wɨ nʉkʉmʉdalaha ʉmʉya. Shanga mʉhumile kʉmitʉmɨla Itunda palʉng’wɨ ni mpia."

14 Ingɨ Apalisayo naɨ alowa mpia naɨija nanso, akamʉdalaha ʉ Yesʉ. 15 Papo gwa ʉ Yesʉ akaatambʉɨla, "Ʉnyenye midaiye mɨagoloku ntongeela ya antʉ, Ingɨ Itunda ʉɨlɨngɨle inkolo yanyu. Ingɨ iko nɨkɨkʉigwe nɨantʉ ingɨ Itunda ʉkɨbɨpɨwe kɨntʉ nɨkanso.

16 "Malagɨɨlyo ang’wa Musa nʉandɨkwa nʉa amanga ang’wi Itunda aɨ itanantigwa kʉpikɨɨla itungo lang’wa Yohana Mʉbadisi. Kʉpumɨɨla itungo lɨlo, Nkani Nza niya Ʉtemi wang’wi Itunda ikʉtanantigwa, mʉntʉ wɨhi ʉkingɨlaa kʉngulu mʉʉtemi nʉwanso. 17 Ingɨ ipepeele ilunde ni ihɨɨ kʉhega, kʉkɨla ʉnyinyʉ nʉandɨkwa kʉhega mʉ malagɨɨlyo ang’wa Musa.

18 "Mʉntʉ wɨhi nʉʉkʉmʉleka mʉkɨma wakwe nʉkʉtɨna mʉsʉngʉ mʉngɨɨza, ʉkʉgoolya, hangɨ mʉntʉ wɨhi nʉʉkʉmʉtina mʉsʉngʉ nʉlekilwe nʉmʉgoha, mʉntʉ nʉanso ʉkʉgoolya.

19 Yesʉ akalʉnga, "Ai ʉkolɨ mʉntʉ ʉng’wɨ mʉgolɨ, aɨ wɨtugalaa ngʉo aʉgʉlwi ʉkʉlʉ naʉkengo nʉa zabalaʉ naya nɨ melʉ pe, hangɨ mahikʉ ɨhi aɨ wishiɨ kʉ ʉsambo. 20 Mʉʉla nʉitangwa Lazalo aɨɨza ʉtatɨe nkomele mʉɨlɨ wakwe wɨhi, aɨ wɨletwaa nʉkʉikwa pa mʉmpita nʉa nyʉmba amʉgolɨ nʉanso. 21 Lazalo aɨ wɨawaa kʉlya maminyangʉɨlwa andya nalagae pɨhi ameza amʉgolɨ, itɨ gwa mbwa aɨyɨza kʉlapa inkomele yakwe.

22 "Panyambele, Lazalo akasha, a Malaɨka akamʉhola akamʉtwala wikiɨ palʉng’wɨ Ibulahimu. Nʉ mʉgolɨ ʉyʉ akasha, akaɨkwa mʉkɨbɨɨla. 23 Kʉng’wanso kʉantʉ nɨakʉle ʉmʉgolɨ aɨ ʉkete lwago, akagoza kʉlɨ, akamʉona ʉ Lazalo wikiɨ palʉng’wɨ nʉ Ibulahimu. 24 Papo mʉgolɨ akalila, akitʉnta. ‘Tataane Ibulahimu mbaisɨɨlye, ʉmʉlagɨɨlye ʉ Lazalo wine ɨshaala kakwe mʉmazɨ waze wantontelye ilangʉ, kʉnsoko kʉnʉ kʉashi nkolɨ mʉ lwago la moto.’

25 "Ingɨ ʉ Ibulahimu akamʉsʉkɨɨlya, ‘Ng’waane kɨmbʉka mʉ ʉpanga wako aɨ wɨlija maintʉ ɨhi nɨmaza, nʉ Lazalo aɨ wagaa. Itungo ɨlɨ ʉkolɨ ʉkʉtetembwa, nʉewe ʉkaga. 26 Kʉleka nanso, pakatɨ itʉ lɨpʉʉwe ikombo ilundu, kʉnsoko awo nɨakolɨ kitoitʉ nɨaloilwe kʉpembya kʉng’waanyu aleng’we, nawa nɨakolɨ kʉng’waanyu nɨaloilwe kʉpembya kitoitʉ aleng’we.’ 27 Mʉntʉ ʉyʉ naɨ mʉgolɨ akaminena, ‘Itɨ gwa tata wane kʉʉlompa mʉlagɨɨlye ʉ Lazalo walongole kʉ anyandʉgʉ ane, 28 kʉnsoko nkete aheu ane ataano. Wende waahʉgʉlye nɨenso aleke kʉpembya kʉnʉ mʉlwago.’

29 "Ibulahimu akamʉsʉkɨɨlya, ‘Aheu ako akete Musa nɨamanga ang’wi Itunda, leka aategeelye wawo.’ 30 Mʉntʉ ʉyʉ naɨ mʉgolɨ akalʉnga, ‘Aa shanga ikondile, tataane Ibulahimu, Ingɨ anga ahangwe ahʉgʉligwe nʉ mʉntʉ nʉiʉkile kʉpuma kʉnʉ kʉashi, akʉmija nʉkila itʉnʉ.’ 31 Ingɨ ʉ Ibulahimu nʉng’wenso akalʉnga. ‘Anga ahite kʉategeelya Musa nɨamanga ang’wi Itunda, shanga akʉmʉkela ka nʉ mʉntʉ nʉiʉkile kʉpuma kʉnʉ kʉashi."’