Lucas 5

Yesʉ ʉkʉahola amanyisigwa ang’wandyo

1 Lʉhikʉ naɨlʉtyatile Yesʉ aɨwimɨkile mʉnshembo alʉzɨ nʉla Genezaleti, antʉ aɨakʉmʉnyoma ahume kʉtegeelya lʉkani lang’wi Itunda. 2 Mʉmpelo amazɨ akaona mabɨnɨ abɨɨlɨ, akazealekilwe papo abui akʉnɨng’anɨɨlya nyabu yao. 3 Yesʉ akanankɨla mibɨnɨ lang’wa Simoni, akamʉlompa walɨsuntɨɨlye mʉmazɨ kʉlɨ iniino nɨnshembo. Akikiɨ akandya kʉamanyisa iantʉ wazeʉmolɨ mibɨnɨ. 4 Naɨwakondya kʉmanyisa akamʉɨla ʉ Simoni, "Twala ibɨnɨ pamazɨ ɨdʉ mʉgʉmɨle ɨnyabʉ mʉmazɨ mʉbue insamaki."

5 Simoni akamʉsʉkɨɨlya ʉ Yesʉ, "Ʉewe Isekʉlʉ kagile kʉbua nsamaki ʉtikʉga kaʉlya anga kɨntʉ, kʉnsoko wewe ʉtambʉe kʉʉgʉmɨla ɨnyabu mʉmazɨ." 6 Naɨagʉmɨla ɨnyabu mʉmazɨ akabua nsamaki idʉ, sʉnga nyabu niao ikatula tamʉka. 7 Akaakʉlya awo naɨakete ibɨnɨ lʉlya azeaaɨlya. Akiza nsamaki yɨkizʉla, mʉmabɨnɨ ɨhi abɨɨlɨ ɨkatula hegenteela. 8 Simoni Petelo naɨwamaona ayaitɨ akatugama pang’wa Yesʉ, akalʉnga, "Isekʉlʉ hega kʉng’waane, kʉnsoko ʉnene nɨmʉntʉ nɨ mʉnyamɨlandʉ!"

9 Simoni nawa ɨhi naɨine aɨalɨkʉɨwe kʉnsoko ilʉndo nɨla nsamaki naɨabuile. 10 Itɨ ʉʉgwa ahʉmbaʉya ang’wa Simoni a Yakobo nʉ Yohana anaang’wa Zebedayo nɨenso akakʉɨlwa. Sʉnga ʉ Yesʉ akamʉɨla ʉ Simoni Petelo, "Leka kʉkʉɨlwa, kʉpumɨɨla ino shanga mʉkʉtula mɨabua nsamaki, ingɨ mʉkʉtulɨngɨila antʉ atule amanyisigwa ane."

11 Ʉʉgwa akasuntɨɨlya ɨmabɨnɨ mʉnshembo alʉzɨ, akaleka maintʉ ɨhi akityata ʉ Yesʉ.