1 Yesʉ wɨkapʉma pa Nyʉmba ang’wi Itunda, naɨʉkʉgenda, amanyisigwa akwe ɨkamʉhanga ɨkatulitambʉɨla makani a Nyʉmba ang’wi Itunda. 2 Yesʉ wɨkaaɨla, "Ʉzaʉ, mʉhʉmile kʉmagoza ayaitɨ ɨhi! Kʉmʉila taɨ, kʉtilɨ igwe nɨlʉkʉsaga migwe lʉlya; intʉ yɨhi yɨkʉgazangigwa."

3 Yesʉ naɨwɨkiɨ mʉlʉgʉlʉ nʉla Mɨzeɨtʉni, amanyisigwa akwe ɨkamʉhanga kɨmpelo itambʉlye, ɨkamʉkolya, "Kʉtambʉɨle makani aya akʉpʉmɨla nalɨ? Nikɨlɨngasɨɨlyo nɨkakʉonela itʉngo lakʉtʉlya kʉng’wako nʉ lʉhikʉ lampelo."

4 Yesʉ wɨkaasʉkɨɨlya, "Hʉgʉki mʉleke kʉkongwa nʉ mʉntʉ. 5 Kʉnsoko azile antʉ ɨdʉ azelʉnga ʉnene nɨ Kilisito, antʉ nɨanso akʉalimɨlya antʉ ɨdʉ. 6 Mʉkija makani a mbita ning’ung’u nɨla mbita, ingɨ mʉleke kʉhʉsha, kʉnsoko nanso atakɨwe kʉpʉmɨla. Ingɨ ɨmpelo ɨkɨlɨ. 7 Antʉ ihɨɨ ɨng’wɨ akikʉa nɨantʉ ihɨɨ nzʉya; antʉ a ʉtemi akʉtʉlikʉa nɨantʉ a ʉtemi ʉya. Izala lɨkʉpumɨla nɨ mɨtentemo ihɨɨ ɨkʉpumɨla matʉmbɨ nɨ matʉmbɨ. 8 Nanso ɨhi ingɨ anga ng’wandyo nʉwa ʉwaɨ nʉwakipepalya ng’wana.

9 "Sʉnga akʉmʉamba nʉkʉmaja ang’wɨanyu akʉbʉlagwa. Antʉ ɨhi akʉmʉbɨpɨlwa kʉnsoko mʉnihʉɨɨe nene. 10 Matungo nɨlanso antʉ idʉ nɨanihʉɨɨe akʉleka kʉnihʉɨɨla, akipɨlʉka nʉkibɨpɨlwa. 11 Akigela amanga ɨdʉ nɨaʉteele nawo akʉalimɨɨlya antʉ idʉ. 12 Kʉnsoko akongeeleka ʉpɨlʉki, ʉlowa nʉwa antʉ idʉ ʉkʉkepa. 13 Ingɨ kʉ mʉntʉ wɨhi nʉkʉgigimɨɨlya kʉpikɨɨla lʉhikʉ nʉlampelo yʉyo ʉkʉponyigwa. 14 Igɨ impelo nɨkɨlɨ kʉpikɨɨla, Nkani Nza niya ʉtemi wang’wi Itunda yɨkʉtanantigwa mʉ ʉnkʉmbigʉlʉ wɨhi ingɨ antʉ ɨhi ije.

15 "Itɨ gwa, anga maona ‘Kɨntʉ nɨ kɨbɨ nɨkɨleta ʉgazangigwa nɨkɨtambʉwe nʉ mʉmanga ʉ Danieli kimɨkile mʉnyʉmba, mʉntʉ nʉkʉsoma nʉwalɨnge ɨndogoelyo akwe, 16 papo gwa, antʉ nɨishiɨ mihɨɨ a kʉ Yʉda amankɨɨle mʉmalʉgʉlʉ. 17 Mʉntʉ nʉkolɨ mitembe nʉwaleke kʉsima kʉhola kɨntʉ kɨhi mʉnyʉmba akwe. 18 Ʉyu nʉkolɨ kʉmʉgʉnda nʉwaleke kʉsʉkila matʉgalo kitolakwe. 19 Akutula nʉ lwago asʉngʉ nɨalito nawa nɨakonsha mahikʉ niyanso! 20 Lompi ʉlʉmanko lanyʉ lʉleke kʉtʉla lʉhikʉ nʉla mpepo ang’wɨ Lʉhikʉ nʉla Kʉsʉpya! 21 Kʉnsoko matʉngo nanso akʉtʉla alwago lʉkʉlʉ nɨɨza lʉkɨlɨ kigela pʉma ʉtundwi nʉwa ʉnkʉmbigʉlʉ kʉpikɨɨla lelo, kʉnsoko lwago nʉlanso shanga ɨzepumɨla hangɨ. 22 Itunda anga aɨwaleke kukepya mahikʉ nanso, kʉtilɨ anga ng’waa mʉntʉ wɨhi naʉzehuma kʉgunɨka; ingɨ gwa kʉnsoko aantʉ nɨahoilwe mahikʉ nanso akʉkepigwa.

23 "Itɨ gwa, mahikʉ nanso mʉntʉ anga wamʉile; Kilisito ʉkolɨ apa, ang’wɨ ‘Ʉkolɨ apo,’ mʉleke kʉhʉɨɨla. 24 Kʉnsoko akigela amanga aʉteele niantʉ idʉ nɨakʉtula lʉnga ʉnene nɨ kilisito. Akʉtenda mɨʉkʉɨlwa mɨkʉlʉ nɨkʉhʉma kʉalimɨlya antʉ ihʉmikile ga nawa nɨasagʉwe ni Itunda. 25 Tegeelyi, nakondya kʉmʉhʉgʉla makani nakɨlɨ kʉpika.

26 Itɨgwa, anga amʉɨle gozi ʉkolɨ kijangwa,’ mʉleke kʉlongola kʉng’wanso; ang’wɨ, ‘Gozi, ʉkilisito wɨpɨhile mʉkati,’ mʉleke kʉhʉiila; 27 kʉnsoko, anga ʉlʉpito nʉlipita kʉpʉma kʉ kilya nʉkigeeleka kʉ ng’weli, ʉʉ yɨkatʉla lʉhikʉ nʉlakɨza ʉ Ng’waa Mʉntʉ.

28 Pa mʉimba ʉkolɨ, papo indɨ yilingɨɨla.

29 "Anga lʉkɨle ʉlwago nʉlanso, lyoa lɨkʉlima nʉ ng’weli shanga ʉkelya ni nzota yɨkʉtʉngʉka kʉpuma kilunde, ningulu niya kigʉlʉ yɨkʉhingiɨka. 30 Sʉnga, ikilingasiilyo ka Ng’waa Mʉntʉ kɨkigela migʉlya, papo ndʉgʉ yɨhi mihɨɨ izemʉnang’anɨkɨla; akʉmʉona ʉ Ng’waa Mʉntʉ ʉpembilye migʉlya amalʉnde nikʉlyo. 31 Nʉyo ʉkʉalagɨɨlya amalɨka nao azekʉa ipembeguma, nɨanso aze ilingɨɨla antʉ nɨahoilwe kʉpʉmiila mpande yɨhi nɨ yihɨɨ, kʉpʉma mpelo ɨyɨ nigʉlʉ nɨmpelo ngɨɨza nigʉlʉ.

32 Imanyisi kʉ mpyani a mʉkʉyʉ. Anga mʉone ʉdu matʉtʉ akwe andya kʉtegeta, mɨlɨnga kɨna malɨma ahʉmbeela. 33 Nʉnyenye ga anga mʉone makani aya ɨhi akitʉng’wa, lɨngi kɨna matungo akʉpembya ʉ Ng’waa Mʉntʉ ahumbeela. 34 Kʉmʉtambʉɨla ɨtai ʉwileli ʉwʉ shanga ʉkʉkɨla makani aya apʉmile. 35 Igʉlʉ ni ihɨɨ yʉkʉkɨla, ingɨ itʉnʉ nkani yane shanga ikʉkɨla.

36 "Ingɨ, itʉngo nɨlanso ang’wɨ lʉhikʉ nʉlanso, kʉtilɨ mʉntʉ nʉlingɨle lʉkʉpɨka nali; a malaɨka ang’wɨ Ng’waa Mʉntʉ; ingɨ Tata dʉ wɨng’wene ʉlɨngile. 37 Kʉnsoko anga naɨitʉile mahikʉ ang’wa Nʉhʉ, ʉʉ izetʉla kiza kʉ Ng’waa Mʉntʉ. 38 Kʉnsoko mahikʉ nanso, kɨhʉmo kikʉlʉ aɨkɨkɨlɨ, antʉ aɨalongolekile kʉlya nʉkʉng’wa, ɨkazetina nʉkʉtinwa, kʉpikɨɨla nʉ Nʉhʉ naɨʉkingɨla mibɨnɨ ikʉlʉ nɨlitangwa sapina. 39 Antʉ shanga aɨalɨngile ntʉni kikʉpʉmɨla. Mbula ɨkakʉa matungo malɨpu, antʉ ɨkasha kʉ kihʉmo ka mazɨ. Itɨʉʉ izeetʉla itʉngo nʉʉzɨzɨza ʉ Ng’waa Mʉntʉ. 40 Matʉngo nanso antʉ abɨɨlɨ akʉtula akolɨ kʉ mʉgʉnda; mʉntʉ ʉng’wɨ ʉkʉholwa ʉng’wɨ ʉkʉlekwe. 41 Asʉngʉ abɨɨlɨ azesia na lwala palʉng’wɨ ʉng’wɨ ʉkʉholwa ʉmʉya ʉkʉlekwe.

42 Itɨ gwa, ihambi, kʉnsoko shanga mʉlɨngile lʉhikʉ kɨɨ nʉzile Isekʉlʉ wanyʉ. 43 Kɨmbʉki gwa ikani ɨlɨ. Mʉkola nyʉmba anga ɨze ʉlɨngile lʉhikʉ nʉ mii ʉzile, shanga ʉkʉlala, shanga ʉkʉleka nyʉmba akwe ɨkumʉlwe. 44 Kʉlʉlo, nʉnyenye ga hʉgʉki, kʉnsoko Ng’waa Mʉntʉ ʉzile matungo nɨshanga mʉsɨgɨɨe."

45 Yesʉ wɨkalongeleka kʉlʉnga, nyenyʉgwa nʉkete mitʉmi nʉmʉhʉɨɨe hangi nʉkete mahala, Mʉkʉlʉ wakwe nʉhumile kʉmʉɨka wɨmɨɨle antʉ akwe, azeapa ɨantʉ ndya kʉ matungo nɨmaza? 46 Mitʉmi nʉanso ʉkiloa anga mʉkʉlʉ wakwe wahange ʉkʉtenda iti. 47 Kʉmʉtambʉila taɨ, ʉzemʉɨka ʉmitʉmi nʉanso mɨmɨɨli nʉwa nsao yakwe yɨhi. 48 Ingɨ mitʉmi ʉyʉ anga watule mʉbɨ ʉkitambʉila mʉnkolo akwe: Mʉkʉlʉ wane watinya kʉsʉka,’ 49 sʉnga wandye kʉakʉa itʉmi aʉya, wandye kʉlya nʉkʉng’wa palʉng’wɨ nɨagala ntʉlɨ, 50 sʉnga mʉkʉlʉ wakwe ʉzile lʉhikʉ nɨshanga ʉsɨgɨɨe nitʉngo nɨshanga ʉine. 51 Ʉkʉmʉpɨsɨɨlya ibɨ, nʉkʉmʉɨka palʉng’wɨ nɨateele. Kʉng’wanso kʉko yɨkʉtula kɨlɨlo nʉkʉkelya mino.