1 Ʉʉgwa Yesʉ akaaɨla, "Leki kʉapɨsɨɨlya nɨangɨɨza, nʉ nyenye mʉleke kʉpɨsɨɨligwa ni Itunda, 2 kʉnsoko anga itɨ nɨmʉkʉapɨsɨɨlya nɨangiza, nʉnyenye ʉʉ nɨmʉkʉpɨsɨɨligwa ni Itunda, ngele yɨyo yɨɨyo nɨmʉkʉagemeelya ɨanyu, ni Itunda yɨyo ʉkʉmʉgemeelya. 3 Kʉnɨkɨ ʉone kɨntʉ kɨniino mʉliho la mʉnyandʉgʉ wako, papo paapo ʉhite kʉona kɨntʉ kɨkʉlʉ nɨkɨmolɨ mʉliho lako? 4 Angwɨ, ʉhʉmile ʉlɨ kʉmʉɨla ʉmʉnyandʉgʉ ako, ‘Mʉnyandʉgʉ tɨga nʉkʉhegelye kɨntʉ nɨkɨniino mʉliho lako, itungo lɨlo lɨɨlo ʉewe wingɨɨwe nɨkɨntʉ kɨkʉlʉ mʉliho lako? 5 Ʉewe wɨmʉteele! Heja hanza kɨntʉ nɨ kɨkʉlʉ nɨkɨkolɨ mʉliho lako, papo yʉkʉnonela kʉmʉhegelya kɨntʉ nɨkɨniino nɨkɨkolɨ mʉliho nɨla mʉnyandʉgʉ ako

6 "Leki kʉapi antʉ nɨ impyani ni mbugi maintʉ ang’wi Itunda aleke kʉmʉpɨlʉkɨla nʉ kʉmʉtaʉla, hangɨ leki kʉpumyi itai ang’wi Itunda kʉantʉ nɨidobya anga ngulima, ahumile kʉpanangɨla.

7 "Lompi nʉ nyenye mʉkʉpegwa, penzi nʉ nyenye mʉkʉlija, pɨndʉli nʉnyenye mʉkʉlʉgʉɨlwa. 8 Kʉnsoko, wɨhi nʉwɨlompa wɨpegwa nʉyʉ nʉwɨpenza wɨlija nʉyʉ nʉwɨpɨndʉla wɨlugʉɨlwa. 9 Itɨɨ, nyenyʉ mʉng’wanyu anga ng’wana wakwe wamʉlompe ndya, nʉanso ʉkʉmʉpa igwene? 10 Ang’wɨ, anga walompwe nsamaki, ʉkʉmʉpa nzokane? 11 Anga ize ʉnyenye nɨmɨanyamɨlandʉ, mʉlɨngile kʉapa ɨana anyu maintʉ nɨmaza, Kʉlʉ kʉʉlʉ ʉ Tata wanyʉ nʉa kigʉlʉ ʉkitʉma nakɨlɨnkɨɨe.

12 "Aya ɨhi nɨmʉloilwe ɨantʉ amʉtendeele, nʉnyenye atendeeli ʉʉ. Ɨyɨ yɨyɨ dogoelyo amalagɨɨlyo ang’wa Mʉsa nʉ ʉmanyisi nʉa amanga ang’wi Itunda.

13 Ingɨli kʉkɨɨla mʉlango nʉ ʉpinyɨ, kʉnsoko nzɨla nɨhongile kʉʉlimɨli ingɨ ngalɨ, nʉmʉlango nʉakingɨla kʉng’wanso ʉgalɨ, nɨ antʉ nɨakɨɨe nzɨla nanso ɨdʉ. 14 Ingɨ nzɨla nɨhongile kʉ ʉpanga mpinyɨ, nʉ mʉlango nʉa kingɨɨla kʉng’wanso ingɨ ʉpinyɨ, nɨ antʉ akeehʉda nɨahʉmile kʉmɨlɨnga nzɨla nanso.

15 "Hʉgʉki nɨ amanga aʉteele, antʉ nɨ ɨtendisa kɨna apolo anga nkolo kʉnʉ mʉkatɨ akete ʉlʉgʉ ʉkʉlʉ ɨhanga mbugi. 16 Mʉkʉalɨnga kʉntendo nɨ akitʉma, itɨ gwa, antʉ ɨkalane matogo mʉ mɨgʉnga, ang’wɨ nkʉyʉ mʉ mʉgagao? A, a! 17 Itɨ gwa, mʉtɨ nʉ ʉza wɨpeza nkali ninza, nʉ mʉtɨ nʉ ʉbɨ wɨpeza nkali nimbɨ. 18 Mʉtɨ nʉ ʉza shanga ʉhʉmile kʉpa nkali nimbɨ, hangɨ mʉtɨ nʉ ʉbɨ shanga ʉhʉmile kʉpa nkali ninza. 19 Kʉlʉlo mʉtɨ wɨhi nɨshanga wɨpeza nkali nɨnza wɨteng’wa nʉkʉgʉmɨlwa mʉmoto. 20 Kʉlʉlo antʉ nɨanso mʉkʉalɨnga kʉntendo nɨ akitʉma.

21 "Ingɨ shanga mʉntʉ wɨhi nʉɨmbɨla, Isekʉlʉ, Isekʉlʉ nʉʉzɨɨzingɨla kʉ ʉtemi nʉwa kigʉlʉ, ingɨ ʉyʉ nʉɨtʉma aya nʉ Tata wane nʉa kigʉlʉ nʉmaloilwe. 22 Lʉhikʉ nʉla ʉlamʉli antʉ ɨdʉ azɨɨza mbɨla, ‘Isekʉlʉ, Isekʉlʉ! Aɨ kʉtanantilye lʉkani lang’wi Itunda kʉlina lako, aɨ kɨaheja nɨa hing’wɨ nʉ kʉtenda mɨʉkʉɨlwa ɨdʉ kʉ ʉhumi nʉwa lina lako’, 23 Papogwa, nzɨɨza mʉɨla, ‘Kwee shanga aɨ nʉmʉmanyile hegi apa itɨ pantongeela ane, anya mɨlandʉ nyee.

24 "Kʉlʉlo, mʉntʉ wɨhi nʉkʉkela inkani yane izi nɨkʉtambʉla, ʉkimpyanigwa nʉ mʉntʉ nʉkete mahala, naɨ ʉzengile nyʉmba akwe mitalagwe. 25 Mbʉla nkʉlʉ ɨkakʉa, kɨhʉmo kɨkahʉma, ng’wega ʉkʉlʉ wɨkakʉnka nʉkʉkɨɨla nyʉmba nanso. Ingɨ nyʉmba nanso shanga ɨkagwa kʉnsoko ɨzengilwe mitalagwe.

26 "Ingɨ mʉntʉ wɨhi nʉkija inkani yane wahite kʉikomanɨɨlya, wimpyani nʉ mʉntʉ mʉpʉngʉ nʉʉzengile nyʉmba mihanga hanga. 27 Mbʉla ɨkakʉa, kɨhʉmo kikaza, ng’wega ʉkʉlʉ wɨkakʉnka wɨkamɨhingisa ɨnyʉmba nanso, nɨyo ɨkakumʉka ɨkagwa, ʉgwi wakwe aɨ ʉkʉlʉ.

28 Yesʉ naɨ wakondya kʉligitya inkani yɨhi izi, milʉndo wɨhi nʉwa antʉ wɨkakʉɨlwa ɨti naɨ ʉkʉmanyisa. 29 Kʉnsoko shanga aɨ ʉkʉmanyisa anga amanyisi amalagɨɨlyo ang’wa Musa, aɨ ʉkʉmanyisa anga mʉntʉ nʉkete ʉhʉmi.