10 yexs aggeḏ ttebuwt seg isγaren n ssenṭ, ṭṭulis 2 derƹan aḏ wezgen aḏ leƹerḍis am lƹelwis dereƹ aḏ wezgen. 11 we atγelfeḏ s wureγ ṣbiḥ s jjaj aḏ barra, we asteggeḏ lḥacit n wureγ. 12 we asteggeḏ 4 n tḥelqeṯin n wureγ we atenteggeḏ af treknis, kul senneṯ s ljiheṯ. 13 we aggeḏ sen igeḍman seg isγaren n ssenṭ, we atenγelfeḏ s wureγ, 14 wembeƹd atenseḏfeḏ g aydin n tḥelqeṯin n ttebuwt bac atqamem sisen. 15 aḏ yexs aqimen igeḍman diyn g tḥelqeṯin, witmukusenc sisneṯ xlaṣ. 16 we aggeḏ tiḍγaγin n luwṣayaṯ lliy tafuceγ g ttebuwt.

17 we aggeḏ ddan seg wureγ ṣbiḥ. netta d lƹerc n rreḥmeṯ. ṭṭulis derƹin aḏ wezgen aḏ lƹerḍis dereƹ aḏ wezgen. 18 we aneḥteḏ f leḍrafis sen iqeruwbin n wureγ. 19 we aydel kul lqeruwb af ṭṭerf n ddan, we adlen mmuneḥten seg wureγ n ddan aḏ lṣeqqen diyes. 20 we adlen mqeblen, aḏ frewnesen lliy sreḏḏen tteḏnen ddan lliy smuqulnas. 21 we aggeḏ ayuh n ddan nnaj ttebuwt lliy teggeḏ diyes tiḍγaγin n luwṣayaṯ lliy tafuceγ.