1 ayuh d zmem n leṣel n yesuwƹ lmesiyḥ memmis n dawud, memmis n ibrahiym.

2 ibrahiym ixelfed isḥaq, aḏ isḥaq ixelfed yeƹquwb, aḏ yeƹquwb ixelfed yehuwḏa aḏ yeṯmas. 3 aḏ yehuwḏa ixelfed fareṣ aḏ zareḥ seg ṯamar. aḏ fareṣ ixelfed ḥeṣruwn aḏ ḥeṣruwn ixelfed ram.

4 ram ixelfed ƹemminedab lliy ixelfed neḥcuwn lliy ixelfed selmun. 5 selmun ixelfed buƹez seg rahab lliy ixelfed ƹubid seg raƹuṯ, aḏ ƹubid ixelfed yessa. 6 aḏ yessa ixelfed dawud lmelek,

aḏ dawud ixelfed suleyman seg lliy tusi d lƹileṯ n uriyya. 7 aḏ suleyman ixelfed reḥebƹam lliy ixelfed abiyya lliy ixelfed ssa. 8 aḏ ssa ixelfed yehucafaṭ lliy ixelfed yuram lliy ixelfed ƹuziyya.

9 aḏ ƹuziyya ixelfed yuṯam lliy ixelfed ḥaz lliy ixelfed ḥizqiyya. 10 aḏ ḥizqiyya ixelfed menessa lliy ixelfed amun lliy ixelfed yuciyya. 11 aḏ yuciyya ixelfed yekunya aḏ yeṯmas g ussan n iwey n wuḏeyen al babel.

12 beƹd iwey n wuḏeyen al babel yekunya ixelfed ceƹeltiyel lliy ixelfed zerubabel. 13 aḏ zerubabel ixelfed abihud lliy ixelfed ƹelyeqima lliy ixelfed ƹazur. 14 aḏ ƹazur ixelfed ṣaduq lliy ixelfed ƹexim lliy ixelfed ƹeliyud. 15 aḏ ƹeliyud ixelfed liƹazer lliy ixelfed mettan lliy ixelfed yeƹquwb. 16 aḏ yeƹquwb ixelfed yuwsef argaz n meryem lliy tuγed yesuwƹ lliy mmelnas lmesiyḥ.

17 aḏ leƹded n llejyal seg ussan ibrahiym al ussan n dawud 14 n jiyl, aḏ seg ussan n dawud al ussan n iwey n wuḏeyen al babel 14 n jiyl, aḏ seg ussan n iwey n wuḏeyen al babel al lmesiyḥ 14 n jiyl.

18 qa mammeḵ yluled yesuwƹ lmesiyḥ. tusi yedjis meryem temuxdeb y yuwsef aḏ qebbel man anejfen tqam ara seg rruwḥ lqudus. 19 aḏ afelxaḍert yuwsef yusi d lƹeqel wiyeqqil atetyefḍeḥ aḏ ixemmem atettiseyyeb g cceḥden. 20 aḏ mniyn yusi yetxemmem g aydin yeḍherresd lmleyka s rebbiy g tirjelt yemmal: «ay yuwsef memmis n indin lliy ixelfed dawud; witteggec aγed meryem tesliṯiḵ al tzaqqaḵ, afelxaḍert lliy tatteru siyes netta seg rruwḥ lqudus. 21 qa tatteru afrux aḏ cek tatsemmiḏ yesuwƹ, afelxaḍert d netta lliy taysemneƹ midnis seg ibekkaḍnesen.»

22 am ayuh lkul yentem lliy yuwayi rebbiy af imi n nnabiy lliy yuwa seg lemmi:

23 «qa teqiyert tatqam ara,

we ateru afrux,

we asesγuyen ƹimmanuyel.»

lliy lmeƹnes, rebbiy iḏenneγ.

24 mniyn yekker yuwsef, yeggi lliy yuwayas felles lmleyka n rebbiy, yuγed tesliṯtis al tezeqqas. 25 lekenti wiyuḏifc felles almiy tiru afrux, ysemmeyi yesuwƹ.