1 mniyn yezra midden, yuli al jbel ygeƹmez. yaxy qrebnes tlamḏes. 2 yaxy yuḏel yesseḥfaḍ disen:

3 <ayya sseƹdessen lliy fehmen s rruwḥ lliy nihnin tteḥtaqen rebbiy.

rahiy y nihnin lmelekuwt n ujenna.

4 ayya sseƹdessen lliy tƹiden af imanesen.

rahiy tatennisefreḥ rebbiy.

5 ayya sseƹdessen lliy ƹeqlin.

rahiy tawerṯen tammurt.

6 ayya sseƹdessen lliy lluzen aḏ lliy ffuḏen al abriyḏ ṣbiḥ.

rahiy tacebƹen.

7 ayya sseƹdessen lliy sexfen af midden.

rahiy tatenyerḥem rebbiy.

8 ayya sseƹdessen lliy ulawnesen d imellalen.

rahiy tazren rebbiy.

9 ayya sseƹdessen lliy tteγend g slam y midden.

rahiy tattusemman d ṭarwa n rebbiy.

10 ayya sseƹdessen lliy mdurren afelxaḍert n abriyḏ ṣbiḥ.

rahiy y nihnin lmelekuwt n ujenna.

11 ayya sseƹduwem kan ḏƹunewem midden aḏ durnewem aḏ uwan fellawem ggeṯ d dwiy s tikerkas afelxaḍrtiw. 12 fferḥeṯ tinyem. rahiy ṯwebwem g ujenna d meqqar. amyuh mdurren lenbiya qebluwem. >

13 kennim g ddunyeṯ am tisent g uču. aḏ kan tisent witmeleḥc mammeḵ tasner melḥis? aḏ ateḏwel maƹadc tṣelleḥ kan yuleweḥ al barra we atetƹefsen midden.

14 kennim d ddu n ddunyeṯ, tetḍharemd s ybeƹeḏ am tmura lliy tella nnaj almiyraz. 15 midden almiy asseγen g nnir witeggenc adug lgelbeṯ amma ateggent af mkan yeƹla bac ayḍewa y midden lkul lliy g lḥuc. 16 amyuh yexs adlem. djeṯ ayḍewa dduwem zzaṯ midden, bac azren ṣbiḥ lliy teggimt we amejden babuwem lliy g ujenna.

17 balek amlem lliy neči usiγd bac akseγ cceriyƹeṯ n muwsa naγ lliy uγentiḏ lenbiya. rahiy widdusixc bac akseγ lekenti usiγd bac atemmemmeγ lliy uγentiḏ. 18 lḥeq afenemleγ. ḥetta kan tammurt aḏ ujenna muksen, wiyetmukus ḥetta d lḥerf naγ d tinuqtet ijeṯ seg cceriyƹeṯ almiy yentem kul ciy.

19 rahiy kul yjen aytu ijeṯ seg ayuh n luwṣayaṯ timeckunin, aḏ ayṣeḥfeḍ midden bac aggen mammeḵ iteg, taydel wiyγerc ḥetta d lqimeṯ g lmelekuwt n ujenna. amma lliy ayeg sisneṯ aḏ atentyeṣeḥfeḍ y midden atdel lqimtis d temeqqart g lmelekuwt n ujenna. 20 qa tafenemleγ turuh. rahiy kan wiyernic lxiyruwem af lxiyr n lliy seḥfeḍen g cceriyƹeṯ aḏ iferysiyyen witeteḏfemc al lmelekuwt n ujenna xlaṣ.

21 tessennem lliy cceriyƹeṯ n muwsa tuwa y imezweren: «wineγc, aḏ lliy yenγa yestahel lmuḥakmeṯ.» 22 amma neči afenemleγ: «kul yjen ayγeccec af uwas yestahel lmuḥakmeṯ, aḏ mam aymel y uwas: ya ḍeyeƹ, yestahel tebeddiṯ zzaṯ lmeḥkemeṯ temeqqart. aḏ lliy asimel: ay yeγyul, yestahel timsi n jhennem.

23 kan tusid s lweƹḏtiḵ al mkan n teγrest aḏ dinet tesmitiḏ lliy jareḵd aḏ uwaḵ ḥaja, 24 adj lweƹeḏtiḵ zzaṯ mkan n teγrest. treḥḥeḏ tserliḏ uwaḵ saƹa, wembeƹd rred tuceḏ lweƹeḏtiḵ.

25 serla aγrimiḵ fiseƹ g ubriḏ al lmeḥekmeṯ qebbel man afiwiy aγrimiḵ al lqaḍi lliy afyuc y mam afyeg g lḥebs. 26 aḏ lḥeq afemleγ. rahiy witettefγec seg lḥebs almiy axelṣeḏ lliy fellaḵ lkul.

27 rahiy tessennem lliy cceriyƹeṯ n muwsa tuwa: «wizennac.» 28 amma neči afenemleγ: kul yjen ayesmuqel al temeṭṭuṯ bac ayeṯmetteƹ rahiy yezna siyes g ulis. 29 kan ṭiṭiḵ n limin tafetseγleḍ, ksiṯ aḏ luḥiṯ. rahiy mukes n ṭiṭ aḏ bƹeḏ af jehennem xiyr n iḏef al γares siyes. 30 aḏ kan fusiḵ n limin tafiseγleḍ. rahiy ikkesis aḏ bƹeḏ af jehennem xiyr n iḏef al γares siyes.»

31 tuwa zada: «lliy yellaf y lehlis asyuc tḥudjet n tulfa.» 32 amma neči afenemleγ: «kul yjen yellaf y lehlis man γiyr man atezna rahiy tatetiluz bac atezna. aḏ mam yenjef ijeṯ tellef. rahiy tayezna.»

33 tessennem lliy cceriyƹeṯ n muwsa tuwa y imezweren: «witrezzeṯec tjelliṯuwem, amma weffaṯ s lliy tuƹeḏḏemt y rebbiy.» 34 neči afenemleγ: «witjelleṯec xlaṣ la s ujenna afelxaḍert d lƹerc n rebbiy. 35 la s tammurt afelxaḍert tella adug iderenis. la s uwrceliym afelxaḍert d tmura n lmelek meqqar. 36 witjellac s ixfiḵ afelxaḍert witetqudduc rreḏ zzaw seg udjufis d mellal naγ d ṣeṭṭaf. 37 adj aydel dwiywem: ih, kan ih, naγ aha kan aha. amma lliy ayerni af aydin rahiy wiyeḥli.»

38 tessennem lliy cceriyƹeṯ n muwsa tuwa: «ṭiṭ s ṭiṭ aḏ ssin s ssin.» 39 amma neči afenemleγ: «wittereṯec ccer s ccer, lekenti lliy iwetteḵ af lxenk n limin sundas lxenk ttani. 40 aḏ mam yexs afixeṣem bac aywiy lḥweyjiḵ rni djes tlebetiḵ. 41 aḏ mam iluzzeḵ bac ayureḏ yiḏes almiyl, yyur yiḏes milin. 42 mam yeḍleb s γareḵ ḥaja ucested. aḏ mam yused ayerdel s γareḵ witerrac am idin.»

43 aḏ tessennem lliy cceriyƹeṯ n muwsa tuwa: «xs rnewiḵ aḏ kkereh leƹduḵ.» 44 amma neči afenemleγ: xseṯ laƹduwem, aḏ numreṯ lliy leƹnen diwem, ggeṯ ṣbiḥ yid indin lliy wifenγisenc, ḍelbeṯ lxiyr y lliy ddurrun diwem 45 bac adlem d ṭarwa n babewem lliy g ujenna. rahiy netta yetḍewa s tufuytis af ṣbiḥen aḏ af lliy wiḥlin, aḏ yesezwa anzar af ṣbiḥen aḏ af lliy wiḥlin. 46 kan texsem lliy xsennewem matta ṯwebwem zeγ? rahiy ḥetta lliy yetlayem g ḍḍeribeṯ iteg amyuh. 47 aḏ kan tefreḥḥem s yeṯmewem akehaw, matta teggim zeγ yuƹer? rahiy ayuh tteggent ḥetta lliy witemnenc s rebbiy. 48 yellaṯ kennim ḏuleṯ kamlin mammeḵ babuwem n ujenna kamel.