1 wembeƹd yesγuy af tlamḏes lliy nihnin 12. yucesen lqudreṯ af cyaḍen bac atenzeƹezqen we aseḥlen lliy uḍennen. 2 qa inuh d ismawen n imersal 12: simƹan lliy mmalnas buṭrus, aḏ andrawus uwas, aḏ yeƹquwb memmis n zebediy aḏ yuwḥenna uwas, 3 aḏ filibbus aḏ berṯelmawus, aḏ tuwma, aḏ metta lliy yetlayem g ḍḍeribeṯ, aḏ yeƹquwb memmis n ḥelfa, aḏ teddawus, 4 aḏ simƹan lliy inaγγer af lbladis, aḏ yehuwḏa lliy mmelnas lesxeryuwṭiyi, aḏ lliy tayxan yesuwƹ.

5 ayuh n imersal 12 yenkiyin yesuwƹ aḏ iweṣṣayin yuwa:

«witreḥec al lliy muc d wuḏeyen, aḏ witteḏfec timurawin n ssamira. 6 amma ureḥeṯ al israyiliyen lliy weddren am tulli. 7 lemmi teggurem becreṯ temlem: < rahiy yeqrebbed lmelekuwt n ujenna. > 8 lliy uḍennen seḥlaten, aḏ lliy mmuṯen sekretten, aḏ lliy jdemmen kkestasen njestesen, aḏ cyaḍen zeƹzqetten. aḏ mammeḵ yucewem rebbiy s blac uceṯ s blac. 9 wugeyec iḏuwem iflusen naγ wureγ, aḏ lfejreṯ aḏ nḥas. 10 almiy tarezfem wugeyec teckert naγ ttebdileṯ n uṣireḍ aḏ ssebaṭ aḏ ageṭṭum iḍen. rahiy rebbiy tafenyuc matta teteḥteqemt.

11 aḏ kul man aḏeḏfem al tmura naγ al lḥumeṯ urzuṯ diyes af mam iferreḥ siwem teqqimem γares dinet almiy aruḥem. 12 lemmi aḏeḏfem al tezeqqas selmeṯ af middenes. 13 kan midden n aydin n tezeqqa stahelen nembelḥeq adj ayezwa slam n rebbiy fellesen. amma kan wistehlenc afenedyer slamwem. 14 kan ḥetta ḥed g tzaqqa naγ g tmura wiyefreḥ siwem aḏ wiyesseγd dwiywem, fγeṯ s yin tezzelzem lγubreṯ n idernuwem. 15 lḥeq afenemleγ. rahiy lḥaleṯ n seduwm aḏ ƹemuwra xiyr n lḥaleṯ n aydin n tmura g as n lḥesab.

16 qa neči tafennekiyeγ am izmaren jar leḏyub. rreṯ lbaluwem am tilefsiwin teqqimem ƹeqlin am tmelliwin. 17 rreṯ lbaluwem seg midden. rahiy tafennuwyen al lmḥakem we afenwetten s ṣṣuwṭ g lmjameƹesen. 18 we afennuyen bac abeddem zzaṯ lḥukkam aḏ lmuluk afelxaḍriw. we acehdem iḏiy zzaṯ wuḏeyen aḏ zzaṯ midden ttaniyeṯ lkul. 19 lemmi afenneṭfen, witteḥterec mammeḵ aḏuflayem naγ matta temlem. rahiy lweqt ḏḏin tafenyisiḵen rebbiy man amlem. 20 muc kennim lliy taḏuflayem amma d rruwḥ n babewem lliy tayuflay af imewenuwem.

21 tayuc kul yjen uwas y tmettant, ahuwnen ibaban ṭarwesen, we anden imeckenen af ibabnesen atennenγen. 22 we afenkerhen midden lkul afelxaḍert n ismiw, lekenti lliy ayeṣber al llexert ayemnaƹ. 23 kan durnewem g itmura seg tmurewin, rruleṯ al γiyris. lḥeq afenemleγ: witetriḥemc al tmurewin n israyil lkul qebbel man adaseγ neči lliy yeḏwel d bnaḏem.

24 lliy yeseƹzam xiyr n tilmiḏes, aḏ ṣeyed xiyr n xdimis. 25 lukan aydel tilmiḏ am lliy yeseƹzam diyes yeziyas, lukan aydel xdim am siydis yeziyas. kan nihnin uwan y bab n tzaqqa: < ay beƹelzebul. > nihnin ṯabet subben nnasnis lkul.

26 wittegeṯec sisen, afelxaḍert wiyetqimi ḥaja g cceḥden aḏ lliy yeḥrez tadyeḍher. 27 lliy mmelγawem felles g itellest amlet g ddu, aḏ lliy tsellem diyes d awecwec amlet af leḥyuḍ. 28 wittegeṯec seg indin lliy neγγen lbden akehaw afelxaḍert witquddunc anγen rruwḥ. amma gdaṯ seg lliy yetquddu ayenγ rruwḥ aḏ lbden jmiyƹ g jhennem. 29 yaxy muc nezzen sen iciwciwen s lfrenk yjen? aḏ witutṭi ḥetta d yjen sisen al tammurt man γiyr man ayessen siyes babewem. 30 amma kennim rebbiy yessen ḥetta lƹeded n udjuf n ixfewnewem lkul. 31 mala wittegeṯec. rahiy kennim xiyr n ggeṯ d iciwciwen.

32 kul yjen ayesteƹref siyyi zzaṯ midden, steƹrfeγ siyes neči zzaṯ baba lliy g ujenna. 33 aḏ kul yjen wiyesteƹrifc siyyi zzaṯ midden, wisteƹrifexc neči siyes zzaṯ baba lliy g ujenna.

34 widdunnuṯec lliy usiγd bac aggeγ slam af tammurt. widdusixc bac aggeγ slam amma uγiγd nuγu. 35 usiγd bac arreγ kul yjen yetnuγu yid babis, we asnuγeγ tefruxt yid yedjis, we asnuγeγ tesliṯ yid teḏuggaltis. 36 amyuh addel jar irnawen leƹdaweṯ.

37 memmun yexs babis naγ yedjis iṭriw wilyestahelc. aḏ mam yexs memmis naγ yellis iṭriw wilyestahelc. 38 aḏ mam wiyetqudduc ayeṣber af lƹeḏeb n ṣṣelib, wilyestahelc. 39 lliy ikerc g tmeddurtis atetyexser, aḏ lliy yexser temeddurtis afelxaḍriw tatetyerbeḥ.

40 lliy yeqbellewem yeqbelliḏ. aḏ lliy yeqbelliḏ yeqbel lliy yenkiyiḏ. 41 lliy yefreḥ s nnabiy afelxaḍert netta d nnabiy. rahiy tayelqa ṯweb n nnabiy. aḏ mam yefreḥ s argaz d ṣbiḥ afelxaḍert netta d ṣbiḥ. rahiy tayelqa ṯweb n yjen d ṣbiḥ. 42 aḏ kul yjen yuca ḥetta kan lkas n aman yebreḏ y yjen seg ayuh n imeckunen afelxaḍert netta d tilmiḏiw, lḥeq afenemleγ: rahiy ṯwebis wiyetḍiƹc xlaṣ.»