1 g aydin n lweqt yesla hiyruwdus lḥakem n ljalil s yesuwƹ. 2 yaxy yuwa y ixedemnis: «qa wuh d yaḥya lmeƹmedan, yekker seg lliy mmuṯen. afelxaḍert n ayuh iteg g lmuƹjizaṯ.»
3 yusi qebbel, hiyruwdus yeṭṭef yaḥya, yeqqeni s tselslin, yeggi g lḥebs 4 afelxaḍert yusi yaḥya yemmalas. ḥram fellaḵ lliy tenjefd hiyruwdiya lehlis n uwas filibbus lliy yusi yedder. 5 hiyruwdus yusi yexs ayenγ yaḥya, lekinti yugeḏ seg midden afelxaḍert yusi yaḥya γarsen d nnabiy.
6 aḏ g umessi lliy teggent as n tlaliṯ n hiyruwdus, terqeṣ yellis n hirudiyya g amas. yaxy teƹjebbas y hiyruwdus. 7 yedjul tasyuc matta tateḍleb. 8 aḏ beƹd mag čawer yedjis, tuweyas: «aγiḏd al dehnit af ṭbeq iγef n yaḥya lmeƹmedan.»
9 yaxy yeḥzen lmelek lekenti yuwayasen asucen matta texs, afelxaḍert yedjul af aydin zzaṯ lliy nnaḍḍen yiḏes. 10 yenkiy mam ireḥ lḥebs yeqdeƹ iγef n yaḥya. 11 aḏ uγentiḏ af ṭbeq, ucent y tefruxt tewyi al yedjis. 12 usend tlamḏa n yaḥya qamen tiddis nbalenteṯ. wembeƹd reḥḥen uwan y yesuwƹ.
13 mniyn yesla yesuwƹ aydin, yerkeb g leflukeṯ ireḥ weḥdes al umkan widdis ḥed. yaxy slen siyes midden ḏbeƹent af idernesen seg timurawin. 14 yezwa yesuwƹ al cceṭ yezra midden ggeṯ yesxef fellesen yseḥla imuḍanesen.
15 temeddiṯ usennesd tlamḏes uwanas: «ayuh n umkan widdis ḥaja aḏ as ireḥ, adj areḥen midden al tmurewin bac asγen man ačan.»
16 lekenti yesuwƹ yuwayasen: «muc lazem areḥen uctasen kennim ačan.»
17 yaxy uwan: «wiγernexc dehnit kan 5 d tiqurseṯin aḏ sen n trubay.» 18 yuwa: «aγtettend al deh.» 19 aḏ yuwa y midden: «ndeṯ y uču af rbiƹ.» wembeƹd iqam aydin 5 n tiqurseṯin aḏ sen n trubay. yesmuqel al ujenna, yeḍleb rebbiy bac anumerneṯ. yerza tiqurseṯin, yucineṯ y tlamḏes, ferqentent af midden.
20 čen lkul cbeƹan, wembeƹd qamen tlamḏa 12 d tiƹellagin ƹebbenneṯ seg lliy yefdelled.
21 aḏ wsiyn lliy čen teqrib 5000 d irgazen man γiyr imeckenen aḏ tiseḏnan.
22 aḏ yuwa yesuwƹ y tlamḏes arekben ƹlewleh g lflukeṯ we atsebqen al lḥacit ttani n iylel. aḏ yeqqim netta bac ayenkiy midden aruḥen. 23 aḏ beƹd mag rewḥen midden yuli al jbel bac ayeẓẓal weḥdes, mniyn tuda tufuyt yusi weḥdes dinet.
24 aḏ tusi leflukeṯ n tlamḏa g amas n iylel čeṯen diyes lemwaj al deh aḏ deh, afelxaḍert aḍu yusi s zzaṯ. 25 aḏ lexra n yeḍ yused yesuwƹ al tlamḏes yeggur af aman. 26 mniyn zrent yeggur af aman rjijen uwan: «rahiy d lxyal.» aḏ ṣeyḥen s tiwdi.
27 yaxy ƹlewleh yufleyasen yesuwƹ, yuwa: «sezreṯ ulawnewem, wittegeṯec. rahiy d neči.»
28 yuwa buṭrus: «siydneγ, kan d cekkin nembelḥeq, mliḏ afdeseγ ggwureγ af aman.»
29 yuwayas yesuwƹ: «yya.» yezwa buṭrus seg leflukeṯ yeyyur af aman ireḥ al yesuwƹ.
30 lekenti mniyn iḥus s aḍu yugeḏ, yuḏel iγerreq. yaxy yuwa: «ayya siydneγ semenƹiḏ.»
31 ƹlewleh yezzel yesuwƹ fusis yeṭṭefi, yuwayas: «ayya lliy liymaniḵ ḍƹiyf, maγer tcukkeḏ diyi.»
32 mniyn uleyyen al leflukeṯ, yersa aḍu. 33 yaxy usend lliy g leflukeṯ sjeḏnas, uwanas: «cek nembelḥeq d memmis n rebbiy.»
34 aḏ mniyn qdaƹen al ljiheṯ ttani n iylel, zwan g lḥumeṯ n jinnisaret. 35 fhemment midden n aydin n lḥumeṯ, becren s iṣalis imuḵen lliy tmas. yaxy uγennesd imuḍanesen lkul. 36 aḏ ḍlebben siyes atenyedj aṭfen g temma n rdis akehaw. aḏ lliy ṭṭefen diyes lkul ḥlan.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)