1 rahiy lmelekuwt n ujenna am yjen d bab n imezdeγen ybekker bac adyeγ mam ayexdem g ijennis n tzurin. 2 aḏ yeṯfahem yiḏesen bac ayuc y kul yjen sisen dinar g as, yenkiyin al ijennis.
3 wembeƹd yeffeγ yid ttesƹa, yufa mam yesugum g lxdemeṯ g amas lḥumeṯ. 4 yaxy yuwayasen: «ureḥeṯ kennim zada xedmeṯ g ijenniw we afenxelṣeγ yeqƹeḏ.» yaxy reḥḥen.
5 aḏ iƹaweḏ yeffeγ azguwas aḏ yid maḍi 3 yerniy yenkiy ixeddamen iḍen al ijennis.
6 aḏ yid lxemsa n tmeddiṯ yeffeγ yufa ixeddamen iḍen man γiyr lxeḏmeṯ. ysesetnin: «maγer tetbeddim deh as kamel man γiyr lxeḏmeṯ?»
7 yaxy uwanas: «afelxaḍert wiγenisexdem ḥed.» yuwayasen: «berreṯ kennim zada al ijenniw.»
8 ina n tufuyt yuwa bab n ijenni y lliy mesteklef γares: «sγuy af ixeddamen tucdasen iflusnesen, aḏ ḏel s lliy usend d imeddefren.» 9 yaxy usend lliy xdemen seg lxemsa yelqa kul yjen sisen dinar.
10 aḏ mniyn usend lliy uḏellen lxeḏmeṯ d imezweren ḥseben talqan iṭer n tteniyeṯ. yaxy yelqa kul yjen sisen dinar. 11 aḏ mniyn leqqan g iflusen, meremren af bab n imezdeγen. 12 uwan: «rahiy inuh xdemen ssaƹeṯ ijeṯ aḏ cek tucidesen am neccin lliy nkennes as kamel g teffuyt.»
13 yerra y yjen sisen: «neči wifeḍlimexc ayya ṣṣeḥbiw. muc neṯfahem af udinar? 14 lqa lḥeqqiḵ treḥḥeḏ af imaniḵ. neči xseγ aḏuceγ y ayuh n umeddefer am cek. 15 yaxy wiγric lḥeq aggeγ g iflusniw mammeḵ xseγ? naγ cek teḥseḏetten afelxaḍert uliw d meqqar? 16 amyuh ḏuglen imeddeferen d imezweren aḏ imezweren d imeddeferen.»
17 mniyn yusi yesuwƹ yeggur al uwrceliym, yeqqim netta aḏ ṯnac seg tlamḏes weḥdesen g ubriḏ, yuwayasen:
18 «qa neccin taneli al uwrceliym, mani taluwyen midden neči lliy yeḏwel d bnaḏem we alucen y imeqqaren n lkuhhan aḏ lliy seḥfeḍen g cceriyƹeṯ, bac aḥekmen fella s tmettent, 19 we aleggen jar ifesn n iberraniyen bac aṯhezzan fella we alwetten s ṣṣut we alƹelqen af ṣṣelib. lekenti g as wi 3 takreγ.»
20 teqrebesd yedj n ṭarwa n zebediy aḏ nihnin yiḏes, tesjeḏ bac ateḍleb ḥaja. 21 yaxy yuwayas: «matta texseḏ.» terras: «agg ṭarwaw inuh, yjen af liminiḵ, yjen af llisariḵ g lmemlektiḵ.» 22 yaxy yuwayasen yesuwƹ: «kennim witsinemc matta tḍelbem. zeƹma taquddem aswem seg lkas lliy sesseγ siyes we aṣebrem?» rennas: «ih, netquddu.» 23 yuwayasen: «lkasiw taswem siyes we atuƹeḏbem amma geƹmez af liminiw naγ af llisariw witettuceγ kan y lliy yejrayi baba y nihnin.» 24 mniyn slen tlamḏes 10 ttenyaṯ uγen g lxeḍresen seg aydin 2 n aweṯen. 25 yaxy yesγuyasen yesuwƹ lkul yuwa:
«tessennem lliy lḥukkam n midden ttaniyeṯ ḥekmen disen aḏ imeqqernesen ḍelmen disen. 26 amma kennim yexs witegc am ayuh jarewem, lliy yexs ayeḏwel d meqqar jarwem, yexs afenidel d xeddam. 27 aḏ lliy yexs aydel d mezwar jarwem, yexs afenidel d xdim, 28 amyuh neči lliy yeḏwel d bnaḏem usiγd bac axedmeγ muc bac alxedmen, we afdiγ midden s imaniw.»
29 mniyn yeffeγ yesuwƹ aḏ tlamḏes seg riḥa, ḏbeƹƹent ggeṯ d midden. 30 aḏ wsiyn sen ileƹmayen geƹemzen af lḥacit n abriyḏ. mniyn slen lliy yesuwƹ iƹedda s tmesen, ṣeyḥen: «reḥmeneγ ayya siydneγ ay memmis n dawud.» 31 lekinti midden zheren fellasen bac asusmen. yaxy rnin ṣeyḥen iṭer: «reḥmeneγ ayya siydneγ, ay memmis n dawud.» 32 yebbed yesuwƹ. yesγuyasen. aḏ ysestnin: «matta texsem afeneggeγ.» 33 uwanas: «nexs aγentereḏ nzer, ayya siydneγ.» 34 yesxef fellasen, yeggi ifesnis af ṭiṭewinesen. yaxy ƹlewleh ḏwellen zerren, aḏ yyuren deferris.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)