1 lweqt ḏḏin iƹedda yesuwƹ jar imezdeγen as n sebbeṯ. yaxy lluzen tlamḏes uḏellen tqeṭfen g tisbulin n irden tteten. 2 mniyn zrenten iferysiyyen uwanas: «qa tlamḏeḵ tteggen lliy ḥram igges as n sebbeṯ.» 3 yerrasen.

«yaxy witeƹzimemc matta yeggi dawud aḏ lliy yiḏes mniyn lluzen? 4 yuḏef al tezeqqa n rebbiy. yeča tqurset n ṣṣedqeṯ lliy yusi učus ḥram felles aḏ af lliy yiḏes, kan lkuhhan akhaw tqudden atečen. 5 naγ witeƹzimemc g cceriyƹeṯ n muwsa lliy lkuhhan xeḏmen g lheykel ḥetta g as n sebbeṯ, aḏ ayuh yusi γarsen muc d bekkeḍu? 6 lekenti afenemleγ: qa yella dehnit mammun d meqqar iṭer n lheykel. 7 aḏ luken tefhemmem lmeƹna n dwiy n rebbiy: < neči xseγ rreḥmeṯ muc lweƹdeṯ. > rahiy witteḥkimemc af lliy wiγersenc bekkeḍu. 8 aḏ neči lliy yeḏwel d bnaḏem d bab n sebbeṯ.»

9 wembeƹd iḥewel s yin yuḏef al lmjameƹesen. 10 aḏ diyes argaz fusis yeqqur. aḏ weqt lliy smuḏen iferysiyyen attehmen, mleymen fellas sestnent: «yaxy ḥlal seḥli n imuḍan as n sebbeṯ.» 11 yerrasen: «kan yjen siwem γares izmer yjen aḏ yudayes g burriƹ as n sebbeṯ. yaxy muc tatisemneƹ we atyeṭṭef? 12 aḏ kennim tessennem lliy bnaḏem xiyr n izmer ggeṯ. mala igga n lxiyr as n sebbeṯ ḥlal.» 13 wembeƹd yuwa y argaz: «zzel fusiḵ.» yezzeliṯ. yaxy teḥla, teḏwel lebas ƹliha am ttani.

14 lekenti iferysiyyen ffeγen, mleymen af yesuwƹ bac atenγen. 15 yesla sisen yeffeγ s yin aḏ ḏbeƹƹent ggeṯ d midden, yseḥlayin lkul. 16 aḏ yuweyesen: «rreṯ lbaluwem amlem d mam neči.» 17 amyuh yentem lliy yused af imi n nnabiy icƹeya lliy yuwa seg lemmi:

18 «qa wuhnit d lƹebdiw lliy wezixt.

aḏ lliy xsext,

siyes ferḥeγ ggeṯ.

tasezwiγ fellas rruwḥiw

bac aymel af lḥeq y midden ttaniyeṯ.

19 wiyetnuγuc, wiyetṣedeƹc,

aḏ wisseγdi ḥetta d yjen ṣṣutis g ubriḏ.

20 wiyetrezic teqeṣbeyt ḥetta lukan teceqqeq,

aḏ wiyesbessic teftilt ḥetta lukan teddexen

almiy adyeḍher lḥeq,

21 we asteƹqeḏen midden g ismis.»

22 wembeƹd uγennesd argaz yeƹma aḏ d bekkuc aḏ yeskenni cciyḍan, yseḥlayi, yeḏwel izer aḏ ydugga. 23 ṯƹejben midden lkul uwan: «balek wuh d memmis n dawud.» 24 mniyn iferysiyyen slen ayuh uwan: «wiyezzeƹziq cyaḍen kan s beƹelzebul meqqar n cyaḍen.» 25 yesla yesuwƹ dwiysen. yaxy yuweyasen:

«kul lmemlekeṯ atnuγun ṭarwes g beƹḍhum tatexreb. aḏ kul tmura naγ tezeqqa atnuγun ṭarwes tatuda. 26 kan cciyḍan ayzeƹzeq cciyḍan tanuγun, almiy nuγun mammeḵ zeγ tateqqim lmemlektesen? 27 aḏ kan neči zeƹzaqeγ g cyaḍen s beƹelzebul, ṭarwawem s mam tzaƹzeqenten? ayuh yeseḵen lliy dwiywem γaleṭ. 28 lekenti kan s rruwḥ n rebbiy zeƹzaqeγ g cyaḍen. rahiy lmelekuwt n rebbiy yusewemd turuh. 29 mmeltiḏ mammeḵ yetquddu yjen ayeḏef al lḥuc n yjen qwey we aywiy lliy diyes. rahiy wiyetqudduc ayeg amyuh kan wiyeqqinc qwi diyn qebbel.

30 lliy muc iḏiy rahiy d ḍḍeddiw, aḏ mam wiyetleyimc iḏiy yetferreq. 31 afelxaḍert n ayuh afenemleγ: rahiy kul bekkeḍu aḏ aγlaḍ iγefri rebbiy y midden. amma tikerkas af rruwḥ lqudus wittiγefferc rebbiy. 32 aḏ mam yuwa tuflayt fella neči lliy yeḏwel d bnaḏem astedyeγfer rebbiy. amma lliy yuwa tuflayt af rruwḥ lqudus wisteddiγefferc rebbiy g ddunyeṯ aḏ g laxert.

33 kan ccejreṯ teṣbiḥt, tatuc lγelleṯ teṣbiḥt. amma kan ccejreṯ witteḥli tatuc lγelleṯ witteḥli. seg lγelleṯ asnem ccejreṯ. 34 ay ṭarwa n tlefsiwin. mammeḵ tetqudum aḏ kennim witteḥlim aḏuflayem dwiy d ṣbiḥ? rahiy imi ydugga s matta yetfaḍ af ul. 35 bnaḏem ṣbiḥ, seg ṣbiḥ lliy g ulis yettefγed matta d ṣbiḥ. aḏ bnaḏem lliy wiyeḥli yettefγed seg ulis matta wiyeḥli. 36 amma tafenemleγ: as n lḥsab midden tamḥesben af dwiy n lbaṭel lkul. 37 rahiy s dwiḵ amenƹeḏ naγ aḥesleḏ.»

38 lweqt ḏḏin rennas lbeƹḍ n lliy seḥfeḍen g cceriyƹeṯ aḏ iferysiyyen uwan: «ayya lmuƹellem, nexs anzer lmuƹjizaṯ teteggetteṯ.» 39 yaxy yuwayasen:

«ljiyl lkafer lliy wiyeḥli idelleb g lmuƹjizaṯ. aḏ wisentetis kan lmuƹjizaṯ n nnabiy yuwnes. 40 aḏ mammeḵ yeqqim yuwnes g jjar n trabit 3 d ussan aḏ iḍanaṯ, amyuh taqimeγ neči lliy yeḏwel d bnaḏem g jjar n tammurt 3 d ussan aḏ iḍanaṯ. 41 takeren midden n ninwa as n lḥsab g uḏem n ayuh n ljiyl we acehden fellas, afelxaḍert nihnin taben mniyn yeḥmeqqesen yuwnes. aḏ qa turuh diyes mammun d meqqar iṭer aḏ xiyr n yuwnes. 42 tatekker lmelikeṯ n lqibelt g uḏem n ayuh n ljiyl as n leḥsab we atecheḏ fellas, afelxaḍert tused seg ṭṭerf n tammurt bac atesseγd y dwiy n suleyman. aḏ qa turuh diyes mam d meqqar iṭer aḏ xiyr n suleyman.

43 almiy ayeffeγ rruwḥ lliy yesken argaz seg midden ayenneḍ g lexla iruzzu af rreḥeṯ, lekenti witetyettifc. 44 aymel: < taḏuleγ al umkaniw lliy feγeγ siyes. > we asyeḏwel, atyaf d lfareγ, yefreḍ yezƹem. 45 we ayreḥ, we adyeγ yiḏes 7 d lerwaḥ iḍen wiḥlin iṭris, we aḏeḏfen lkul we aseknen g aydin n argaz. we addel lḥaleṯ n ayuh n argaz ḥref n lḥaltis temezwert. aḏ amyuh taddel lḥaleṯ n ayuh n ljiyl lliy wiyeḥli.»

46 mniyn netta yusi ydugga y midden, yedjis aḏ yeṯmas wsiyn sugumen lberra xsen asufleyen. 47 yaxy yuwayas yjen seg lliy ḥderren: «qa yedjiḵ aḏ ayeṯmaḵ bbedden barra axsen aḵuflayen.»

48 yerras: «d mam yemma? d mam yeṯma.» 49 aḏ yezzel fusis al tlamḏes yuwa: «inuh d yemma aḏ d yeṯma, 50 afelxaḍert kul yjen ayeg matta yexs baba lliy g ujenna netta d uwa aḏ weltma aḏ yemma.»