1 lmelekuwt n ujenna am 10 n tqeyyarin qamneṯ inernesneṯ reḥneṯ bac aƹreḍneṯ y leƹruws. 2 aḏ disneṯ 5 frihat aḏ 5 aha. 3 yaxy qamneṯ tindin lliy wissinnec inernesneṯ s uḏi lliy disen akehaw. 4 amma tindin lliy ssenneṯ awyenneṯ iḏesneṯ uḏi g lmaƹuwn.

5 mniyn iƹeṭṭel leƹruws, nudemneṯ aḏ ṭṭeṣneṯ lkulhum. 6 yid azgen n yeḍ sleneṯ ṣeyyeḥ: «qa yused leƹruws neggezmeṯ bac atleqqaneṯ.»

7 yaxy kkerneṯ tiqeyyarin lkul jreneṯ inerrenesneṯ. 8 aḏ uwaneṯ lliy wissinnec y lliy frihat: < ucemteneγ fercu n uḏi s γarḵmeṯ. rahiy inernenneγ tbessan. >

9 yaxy rrentasneṯ lliy frihat: < balek wiγennikeffic. amma ureḥmeṯ al lliy yezenza g uḏi teseγmeṯ. >

10 lekenti mniyn reḥneṯ bac aseγneṯ, yuṣel leƹruws. aḏ uḏefneṯ yiḏes al tzaqqa n tmeγra lliy ḥderneṯ. yaxy yeqqes lbab 11 wembeƹd rrented tiqeyyarin ttanyaṯ uwaneṯ: «ayya siydneγ ayya siydneγ mireneγ lbab.»

12 yaxy yuwa: «lḥeq afentemleγ. neči wifentessineγ.»

13 rreṯ lbaluwem mala afelxaḍert witisinemc aydin n as, aḏ aydin n ssaƹeṯ.

14 lmelekuwt n ujenna am yjen tayerzef. yesγuy af ixdimnis. yedjasen iflusnis d lemeneṯ. 15 yuca y yjen sisen 5 d lweznaṯ. aḏ y wissen 2 lweznaṯ. aḏ y attani lweznaṯ 1, y kul yjen felḥaseb n lqudretis. wembeƹd yerzef.

16 aḏ ƹlewleh ireḥ weddin lliy γares 5 d lweznaṯ yseγ, yezenza sisneṯ, yerbeḥ 5 iḍen. 17 aḏ am idin yeggi weddin lliy γares senneṯ. yerbeḥ senneṯ iḍen. 18 amma weddin lliy yelqa lweznaṯ ijeṯ ireḥ yeγez burriƹ yenbeliṯ diyes.

19 beƹd isuggasen d iziraren yerred bab n ixdimen. yesγuy fellasen bac atenniḥaseb. 20 yusesd wuddin lliy yelqa 5 d lweznaṯ. yucas 5 n lweznaṯ ttanyaṯ. yuwayas: «ay siydi, cek tucidiḏ 5 n lweznaṯ, aḏ qa tinuh d 5 iḍen rbeḥextent.»

21 yuwayas siydis: «teggiḏ teṣbiḥt ayya ixdim ṣbiḥ aḏ lliy d ṯṯiqeṯ. cek testeḥfdeḏ af ufercu. tarniγ aggeγ jar ifesniḵ lliy iṭer n ayuh. sed freḥ iḏiy.»

22 wembeƹd yusesd lliy yelqa senneṯ. yuwayas: «ay siydi, cek tucidiḏ senneṯ. aḏ qa tinuh d senneṯ iḍen rbeḥextent.»

23 yuwayas siydis: «teggiḏ teṣbiḥt ayya ixdim ṣbiḥ aḏ lliy d ṯṯiqeṯ. cek testeḥfdeḏ af ufercu. tarniγ aggeγ jar ifesniḵ lliy iṭer n ayuh. sed freḥ iḏiy.»

24 wembeƹd yusesd lliy yelqa lweznaṯ ijeṯ yuwa: «ay siydi ssenγaḵ tuƹerreḏ. tmeddejreḏ lliy ḵrezen ttaniyeṯ. aḏ tetleyameḏ lγaleṯ n lliy zzun ttaniyeṯ. 25 yaxy ugeḏḏeγ, reḥḥeγ nbelleγ lwezentiḵ g tammurt. qa ayuh d lementiḵ.»

26 yerras siydis: «ayya ixdim lliy wiyeḥli aḏ d buxli. mala tesnneḏ lliy neči meddejreγ mag ḵrezent ttaniyeṯ, aḏ tleyameγ seg lliy zzunt ttaniyeṯ? 27 muc xiyr lukan teggiḏ iflusniw g lbenkeṯ bac atenelqiγ nihnin aḏ lfeyedtesen.»

28 wembeƹd yuwa y ixdimnis: «kstas lweznaṯ, tucemteṯ y lliy γares 10. 29 lliy γares tarniγ asuceγ almiy ayfaḍ. amma lliy wiγrec tasekseγ ḥetta lliy yusi γares. 30 amma ayuh n xdim lliy wiyeḥli zeƹzeqet al tellest barra mani diyes ƹeyyeḍ aḏ aγezzi n cwerb s uγenna.»

31 «almiy tadereγ neči lliy yeḏwel d bnaḏem s lmejdiw aḏ iḏiy lmleykew lkul, tageƹemzeγ af lƹerc n lmejdiw. 32 we amleymen zzaṯiw midden lkul. we aferqeγ jarsen mammeḵ yetferreq lliy yesefraḏ jar tulli aḏ teγatin.

33 we aysebbed tulli af liminis aḏ tiγatin af lisaris. 34 wembeƹd aymel lmelek y lliy af liminis: «sted ayya lliy inumrewem baba, bac awerṯem lmelekuwt lliy yejreyewemtiḏ rebbiy s manis yeggi ddunyeṯ. 35 afelxaḍert mniyn lluzeγ tsetecmiḏ, aḏ mniyn ffuḏeγ tsessumiḏ, aḏ mniyn usiγ d aγrib tseskenmiḏ jarwem. 36 aḏ mniyn usiγ d ƹeryan teksimiḏ, aḏ mniyn uḍenneγ tehwim fella, aḏ mniyn usiγ ḥbesseγ tusimiḏ.»

37 yaxy rennas ṣbiḥen: «ayya siydneγ lemmi nezraḵ telluzeḏ nsečaḵ? naγ nezreḵ teffuḏeḏ nseswaḵ? 38 naγ lemmi nufaḵ d aγrib nseseknaḵ jerenneγ? aḏ d ƹeryan nekseyaḵ? 39 naγ lemmi nezraḵ tuḍenneḏ naγ teḥbeseḏ nuseḵd?»

40 yaxy asenyer lmelek: «lḥeq afenemleγ. madam teggim ayuh y yjen seg yeṯma imeckunen inuh, teggimt y neči.»

41 wembeƹd aymel y lliy af lisaris: «beƹdeṯ fella ayya cyaḍen al timsi n diyma lliy tejra y leblis aḏ ixedemnis. 42 afelxaḍert mniyn lluzeγ wiltsečemc. aḏ mniyn ffuḏeγ wiltsswemc. 43 mniyn usiγ d aγrib wiltseseknemc jarewem, aḏ mniyn usiγ d ƹeryan wilteksimc aḏ mniyn usiγ uḍenneγ aḏ ḥbesseγ wiltusimc.»

44 yaxy aserren inuh we amlen: «ayya siydneγ lemmi nezraḵ telluzeḏ naγ teffuḏeḏ naγ d aγrib naγ d ƹeryan naγ tuḍenneḏ naγ teḥbeseḏ aḏ wifnexdimc.»

45 yaxy asenyer: «lḥeq afenemleγ. madam witeggimc ayuh y yjen seg ayuh imeckunen, witeggimc y neči.» 46 we areḥen inuh al uƹeḏḏeb n diyma, aḏ ṣbiḥen al tmeddurt n diyma.»