1 rreṯ lbaluwem aggem lxiyr zzaṯ midden bac afennezren. kan teggim amyuh wiγerwemc ṯweb al babewem lliy g ujenna.

2 kan tṣedqeḏ af yjen witegc ṭbel mammeḵ tteggen lliy xsen atenzren midden g lmjameƹ aḏ ibriyḏen, bac atencekren midden. lḥeq afenemleγ: «rahiy lqan ṯwebsen.»

3 amma cekkin almiy taṣedqeḏ witedjac fusiḵ zelmaḍ ayessen mag yettuc ffus n limin. 4 yexs addel ṣedeqtiḵ g cceḥdan aḏ babiḵ lliy g ujenna d netta lliy izer matta yeḥrez. netta lliy tafyuc ṯwebiḵ.

5 lemmi tetẓellim witteggic am indin lliy sseḵanen g imanesen aḏ lliy xsen adlen bbedden g lmjameƹ aḏ g ibriyḏen bac atenezren midden. lḥeq afenemleγ. rahiy lqan ṯwebsen.

6 amma cekkin almiy teẓelleḏ, ḏef al lbiytiḵ. arr lbab fellaḵ. ẓẓal y ibabiḵ lliy witeḍhirc. aḏ babiḵ lliy yessen matta teḥrezeḏ netta lliy tafyuc ṯwebiḵ.

7 lemmi tetẓellim witƹeweḏic dwiy am idin mammeḵ tteggen lliy ẓullen y lleṣnem. rahiy nihnin ddunun lliy s uƹeweḏ n dwiy ggeṯ talqen lliy ḍelben. 8 witteggec am nihnin afelxaḍert babewem yessen matta texsem qebbel man atḍelbem.

9 amma ẓelleṯ amyuh.

<ay rebbiy babenneγ lliy g ujenna,

ayemqudes ismiḵ.

10 adyas lmelekuwtiḵ,

we aydel mag texseḏ af tammurt

mammeḵ yella g ujenna

11 ucaneγ kul as man aγenyekfa seg aγrum.

12 aγferaneγ ibekkaḍnenneγ,

mammeḵ netsameḥ neccin

lliy γelden iḏenneγ.

13 aḏ wiγentedjac anuda g ccer,

amma semmenƹaneγ seg cciyḍan.

14 kan tsemḥem midden af aγleḍesen, afenyeγfer babewem lliy g ujenna ibekkaḍnuwem. 15 aḏ kan witsemḥemc midden wifenniγefferc babewem lliy g ujenna ibekkaḍnuwem. >

16 lemmi aẓwumem witkecceccec mammeḵ tteggen lliy xsen asiḵnen imanesen, tkecceccen bac asiḵnen y midden lliy nihnin zumen. lḥeq afenemleγ: rahiy nihnin lqan ṯwebsen. 17 almiy aẓwumeḏ sireḏ uḏmiḵ teggeḏ ifuḥan y ixfiḵ 18 bac asiḵeneḏ uẓwumiḵ muc y midden amma y babiḵ lliy witzerrec diyes. aḏ netta lliy yessen matta yeḥrez. tafyuc ṯweb.

19 wiḥḥerzec lkenz g ddunyeṯ mani atyeč ssus, we atyeḏen ṣdiḏ, we aḏeγzen felles ysereqen. 20 amma aḥḥerzeṯ lkenz g ujenna mani wityetteč ssus, aḏ witaḏenc ṣdiḏ, aḏ witeγezenc felles ysereqen. 21 rahiy mani yella lkenziḵ yella uliḵ.

22 ṭiṭ d nnir n bnaḏem. kan uliḵ d meqqar aḏ witḥesdec, tadleḏ tetreqeḏ. 23 amma kan teteγeḏ s ṭiṭ. rahiy tadreḏ g ttellest. aḏ kan ṭiṭiḵ tuwyeḵ al tellest. rahiy tellestiḵ d ttemeqqart.

24 wiyetqudduc ḥetta d yjen ayeḏbeƹ sen g lweqt yjen, afelxaḍert tayexs yjen sisen iṭer n ttani we atyeḏbeƹ. witquddemc aƹebdem rebbiy aḏ iflusen g lweqt yjen.

25 turuh tafenmleγ: «witteggec lhem n ddunyeṯ af tḵerminuwem, wimelec matta taneč naγ matta tansu naγ matta tanireḍ. rahiy temeddurt xiyr n uču aḏ lbden xiyr n uṣireḍ. 26 smuqleṯ al iciwciwen g ujenna. rahiy nihnin la ḵerzen la medjren la tlayemen g itxubay. aḏ babewem lliy g ujenna iṭaγesend lqesmesen. rahiy kennim xiyr n iciwciwen ggeṯ.

27 mam siwem s uxemmemmis yetquddu ayerni g lƹemris ḥetta ssaƹeṯ ijeṯ? 28 aḏ maγer tetxemmemmem af uṣireḍ? smuqleṯ al ayuh n tnuwarin n lγabeṯ. rahiy nihintin la teƹebneṯ la ttelemneṯ. 29 lekenti tafenemleγ: «ḥetta suleyman g lmejdis meqqar wiyeriḍc ḥaja yezƹem am ijeṯ sisneṯ.» 30 kan rebbiy amyuh yeṣereḍ g rbiƹ n lγabeṯ lliy yetrefref ijuwas aḏ yetemluweḥ al ača g timsi. muc kennim bjel bac afenisireḍ? ayya lliy liymanuwem ḍƹiyf.

31 witteggec lhem n ddunyeṯ af tḵerminuwem, wimelec matta aneč, naγ matta ansu, naγ matta anireḍ? 32 ayuh n iḥajeyen lkul ttezelen fellesen midden lliy witemnenc s rebbiy. rahiy babewem lliy yella g ujenna yessen lliy tetestḥeqqemt lkul. 33 amma kennim zleṯ deffer lmelekuwt n rebbiy aḏ matta yexs. aḏ netta ta yerniy afenyuc ayuh n iḥajeyen lkul.

34 witxemmemmec af ača. rahiy lliy n ača djet y ača. wireniṯec y kul as lhem af lliy diyes.»