1 beƹd mag ykemmel yesuwƹ aweṣṣi n tlamḏes lliy nihnin 12. iḥewel s yin ireḥ yesseḥfaḍ aḏ yetbeccer g tmurewin. 2 mniyn yesla yaḥya lliy yusi g lḥebs matta yeggi lmesiyḥ, yenkiyas lbeƹḍ n tlamḏes. 3 yesestun: «d cekkin d lmesiyḥ lliy tadyas naγ ansugem γiyriḵ?» 4 yaxy yerrasen yesuwƹ yuwa: «berreṯ, amlet y yaḥya lliy teslim aḏ lliy tezrim: 5 lliy aƹman zren, aḏ lƹeybin yyuren, aḏ lliy jdemmen ḥlan aḏ tmukes njestasen, aḏ ibekkucen uflayen, aḏ lliy mmuṯen kkeren, aḏ lbcereṯ tetaṣel al iqellilen. 6 ayya sseƹdis lliy witetmukuc ṯiqtis diyi.» 7 mniyn ffeγen tlamḏa n yaḥya, yuḏel yesuwƹ ydugga af yaḥya y midden yemmal:

«af matta truzum g ṣṣeḥreṯ? yenda truzum af teqeṣbayt yethuzzu diyes aḍu? 8 naγ truzum af argaz ireḍ lḥweyej ṣbiḥen? rahiy lliy reḍen g lḥweyej ṣbiḥen llan g leqṣur n lmluk. 9 mala matta texsem azrem γaḍih? kan texsem azrem nnabiy. rahiy netta iṭer n nnabiy. 10 aḏ d netta lliy yetweri felles g lktab: «qa tanekyeγ zzaṯiḵ mersuliw lliy tafiseḥder abriyḏiḵ.» 11 lḥeq afenemleγ: widuγineṯ tiseḏnan xlaṣ yjen xiyr n yaḥya lmeƹmedan g ddunyeṯ. lekenti meckun g lmelekuwt n ujenna xiris.

12 rahiy s manis yuḏel yaḥya lmeƹmedan yetbeccer, uḏellen midden tzaḥamen af imi n lmelekuwt n ujenna aḏ kul yjen sisen yexs ayeḏef d mezwar, 13 afelxaḍert cceriyƹeṯ n muwsa aḏ lenbiya lkul becren s lmelekuwt n ujenna lliy yeḍherred seg ussan n yaḥya. 14 kan texsem aḏemnem. rahiy yaḥya wuh d netta d iyliya lliy tesugumem diyes adyer. 15 sseγdeṯ yeqƹeḏ kan γarwem timezzuγin.

16 s mam tacebheγ ayuh n ljiyl? nihnin am imeckenen geƹmzen g amas n lḥumeṯ. sγuyun af beƹḍhum mmalen:

17 <nwettewem lmegrun, witerqisemc.

nesgujder zzaṯuwem witƹidemc. >

18 yused yaḥya lliy yetzumu aḏ wisesc crab. yaxy uwan: < cciyḍan yeskenni. > 19 wembeƹd usiγd neči lliy yeḏwel d bnaḏem tetteγ, sesseγ. yaxy uwan <ayuh d argaz itet ggeṯ, aḏ yses g crab aḏ d ṣṣaḥeb n lliy tlayemen g ḍḍereyeb aḏ lliy γelden. > lekenti lḥekmeṯ n rebbiy tatetesnen almiy zeren lfeyettis.»

20 wembeƹd yuḏel yesuwƹ iḥemmeq af tmurewin lliy zrenneṯ ggeṯ seg lmuƹjizaṯis afelxaḍert midnesneṯ wittebenc.

21 yuwa: «y ḥlilek ay kurezin, y ḥlilek ay biyt ṣeyda, lukan yeggi rebbiy g ṣuwr aḏ ṣeyda matta yeggi diwem seg lmuƹjizaṯ rahiy taben midnesneṯ s luwel aḏ ireḍḍen ibercucen aḏ cetƹen iγeḍ af ixfewensen. 22 lekenti tafenemleγ. rahiy lḥaleṯ n ṣuwr aḏ ṣeyda taddel xiyruwem g as n lḥesab.

23 aḏ cem ay kefrnaḥuwm, yenda tuliyyeḏ al ujenna? aha, qa tazwiḏ al lqeƹ n burriƹ n temettent. lmuƹjizaṯ lliy tezritent, lukan tezrineṯ seduwm. rahiy teqqim al as wuh. 24 lekenti afenemleγ: as n lḥesab lḥeltwem taddel ḥref n lḥaleṯ n seduwm.»

25 aḏ g lweqt ḏḏin, yuflay yesuwƹ yuwa:

«fḥemdeγ ay baba, rebbiy n ujenna aḏ tammurt, afelxaḍert teḥrezeḏ ayuh af lḥukema aḏ ifqihen aḏ tsiḵnet y lliy yetjed fellesen kul ciy am imeckenen. 26 ay baba, amyuh mammeḵ texseḏ iṣar.»

27 «rahiy yuciḏ baba kul ciy. widdis ḥetta d yjen yeseniḏ nembelḥeq am baba. aḏ widdis ḥetta d yjen yessen baba nembelḥeq am neči. aḏ indin lliy tasentiḏsiḵneγ senent zada.

28 sted al γari, afenriḥeγ, ayya lliy taƹbin lkul seg ṯqel meqqar lliy af irewenwem. 29 qameṯ sdeliw, ḥefdeṯ fella. rahiy neči d lƹeqel aḏ uliw d ṣbiḥ, iḏiy taṯhennan ulawnewem. 30 sdel lliy s γari yezhel qamis, aḏ ṯqel lliy tafentiḏuceγ yexfif.»