1 yerniy yesuwƹ yuflay s tinfes, yuwa:

2 «lmelekuwt n ujenna am yjen d lmelek yeggi ibay n tmeγra n memmis. 3 yenkiy ixdimnis bac aseḥedren midden y tmeγra. lekenti wiqqilen midden adesen. 4 iƹaweḏ lmelek yenkiy ixdimnis tijekkelt iḍen, yuwayasen: < mleṯ y lliy tseḥedremten: qa messi yḥder ifwunesen aḏ igendaz lliy quwen aγresexten aḏ kul ciy yejra. ḥderted g umkanuwem. >

5 lekenti lliy yseḥedrin widdusinc. yjen ireḥ al umezdeγis. yjen ireḥ al teḥnuṯis. 6 amma ttenyaṯ ṭṭefen ixdimen n lmelek subenten aḏ nγenten.

7 yaxy iγeccec lmelek. yenkiy ljiycis yenγa indin lliy nγen ixdimnis aḏ yeḥreqesen tmuresen. 8 wembeƹd yuwa y ixdimnis: < messi n tmeγra yeḥdered amma lliy tseḥedremten wistehlenc. 9 ureḥeṯ al lmjameƹ n ibriyḏen, aḏ kul yjen atefem sγuytas al umessi n tmeγra. > 10 yaxy ffeγen ixdimen al ibriyḏen. kercen g lliy ufenten lkul, ṣbiḥen aḏ lliy wiḥlin almiy tƹebba tezeqqa n tmeγra s midden.

11 mniyn yuḏef lmelek bac ayreḥeb s midden, yezra yjen wiyiriḍc lḥweyej n tmeγra. 12 yaxy yuwayas: < ayya argaz mammeḵ tuḏeffeḏ al deh aḏ cek witiriḍec lḥweyej n tmeγra?> lekenti ttani isusem. 13 yaxy yuwa lmelek y ixdemnis: < qntes ifesnis aḏ idernis tluḥemt g tellest al barra mani diyes yyeḍ aḏ aγezzi n cwerb s uγenna. > 14 rahiy lliy yesγuyasen rebbiy ggeṯ, amma lliy iwezeyin d fercu.»

15 yaxy iferysiyyen mfehmen bac aseḥṣlen yesuwƹ s dwiys. 16 aḏ nkiynes lbeƹḍ n tlamḏesen nihnin aḏ midden seg lḥizb n hiyruwdus, bac atsesetenen: «ayya lmuƹellem nessen lliy cek witeskerkisec aḏ teseḥfaḍeḏ y midden abriyḏ n rebbiy yeqƹeḏ. aḏ witettegiḏec s ḥetta d yjen aḏ witetteggec leḥsab y lquweṯ n lbeƹḍ n midden. 17 mlaneγ zeγ matta lquliḵ; ḥlal uca n ḍḍeribeṯ y lmelek n iruwmeyen naγ ḥram.»

18 yaxy yefhem yesuwƹ matta smuḏen, yuwa: «ayya lliy texsem asiḵnem imanuwem, maγer taxsem altseḥeslem? 19 siḵentid flus seg iflusen lliy tettucem sisen ḍḍeribeṯ.» yaxy zelnas dinar. 20 ysesetnin: «d mam wuh g tteṣwireṯ, aḏ n mam ayuh n nqiceṯ.»

21 uwanas: «n lmelek iruwmeyen.» yuwayasen: «mala uceṯ lliy n lmelek iruwmeyen y lmelek n iruwmeyen, aḏ lliy n rebbiy y rebbiy.» 22 mniyn slen aydin n dwiy fehhen. reḥḥen djent dinet.

23 as diyn usennesd lbeƹḍ n iṣedduwqiyiyen lliy witemnenc stneḵri n lliy mmuṯen, sesetnent:

24 «ayya lmuƹellem, yuwa muwsa: «almiy yemmuṯ yjen aḏ widdixellefc imeckenen, yexs ayenjef uwas tedjeltis we ayqeyeḍ imeckenen s ysem n uwas.»

25 yusi γarneγ 7 d aweṯen. yenjef mezweresen yemmuṯ aḏ netta wiγrec imeckenen yedja lehlis y uwas. 26 aḏ am idin yeṯmas: wissen aḏ wi 3 al wis 7 . 27 aḏ beƹdesen lkul temmuṯ zada aydin temeṭṭuṯ. 28 mala as n tneḵri, y mam taddel ayuh n temeṭṭuṯ afelxaḍert tusi d lehliṯesen lkul.» 29 yuweyesen yesuwƹ:

«kennim twedrem afelxaḍert witfehmemc lktab aḏ quddu n rebbiy. 30 rahiy midden as n tneḵri winejfenc aḏ wisenjefenc. amma nihnin tadlen am lmleyka n rebbiy g ujenna. 31 amma af tneḵri n lliy mmuṯen, yaxy witeslimc matta yuwa rebbiy g lkitab: 32 <neči d rebbiy n ibrahiym aḏ d rebbiy n isḥaq aḏ d rebbiy n yeƹquwb?> rahiy rebbiy muc d rebbiy n lliy mmuṯen amma d rebbiy n lliy dderen s liymanisen.» 33 mniyn slen midden ayuh n dwiy fehhen seg seḥefdis.

34 mniyn slen iferysiyyen lliy yesuwƹ yeqqes imewen n iṣedduwqiyiyen mleymen jmiyƹ. 35 aḏ ysesetni yjen sisen, aḏ netta yessen cceriyƹeṯ bac atiseḥṣel: 36 «d matta zeγ luwṣayaṯ temeqqart lliy g cceriyƹeṯ ayya lmuƹellem.» 37 yerras yesuwƹ:

«xs rebbiyḵ s lliy diyeḵ lkul s uliḵ aḏ ruwḥiḵ aḏ lfiqriḵ. 38 ayuh d luwṣayaṯ temeqqart temezwert. 39 aḏ tisneṯ am nettaṯ. xs midden am imaniḵ. 40 cceriyƹeṯ n muwsa aḏ lektub n lenbiya seg ayuh n sent luwṣayaṯ.»

41 mniyn wsiyn iferysiyyen mleymen ysesetnin yesuwƹ: 42 «matta lqulewem g lmesiyḥ, al mammun yḏuggel?» uwanas: «netta seg ṭarwa n dawud.» 43 yaxy ysesetnin: «mala mammeḵ zeγ ysemat dawud d rebbiys mniyn yuwa s rruwḥ?

44 <yuwa rebbiy y siydiw:

«geƹmez af liminiw

bac aggeγ leƹadaḵ

adug iderniḵ?»>

45 kan dawud yetsemmayi d siydiw lmesiyḥ mammeḵ zeγ taydel d yjen seg ṭarwas?» 46 yaxy wiqud ḥetta d yjen asyer ḥetta tuflayt ijeṯ, aḏ seg as diyn wiqud ḥetta d yjen atisesten af ḥaja.