1 aḏ yyuren al yesuwƹ lbeƹḍ n lliy seḥfeḍen g cceriyƹeṯ aḏ iferysiyyen seg uwrceliym, sesetnent: 2 «maγer witeggenc tlamḏeḵ mammeḵ nufa iwessarenneγ tteggen? wisseriḏenc ifesnesen qebbel uču.» 3 yaxy yerrasen:

«maγer witetegemc kennim s dwiy n rebbiy bac asteḥefdem af matta telmeḏem? 4 rahiy rebbiy iweṣṣa, yuwa: < agg teṣbiḥt y babiḵ aḏ yedjiḵ. kul yjen ayeḏƹu babis naγ y yedjis ayemmunγ. > 5 lekenti kennim temmalem: < mam yuwa y babis naγ yedjis: «lliy usiγ tafentiḏuceγ usixt y lheykel.» 6 amyuh yetquddu maƹedc ayuc babis aḏ yedjis. > kennim s ayuh tetteksem mag yuwa rebbiy bac asteḥefdem af matta telmeḏem teteggemt. 7 ayya lliy texsem asiḵnem y midden matta teteggem. γares lḥeq icƹeya lliy yuwa fellewem:

8 <ayuh n cceƹb yettesed iḏiy s imis,

amma ulis yebƹeḏ fella ggeṯ

9 afelxaḍert wiseḥfiḍen kan af luwṣayaṯ n midden.

rahiy tẓalliṯesen y neči s lbaṭl. > »

10 wembeƹd yesγuy y midden yuwayasen: «sseγdeṯ, tefehmem: 11 rahiy muc lliy iteḏef al imi yesenzes bnaḏem. amma lliy iteffeγ seg imi yenezzesi.» 12 yaxy usennesd tlamḏes uwanas: «tesenneḏ lliy ayuh n dwiy γecceccen siyes iferysiyyen.» 13 yerrasen: «kul cejreṯ witetyezzuc baba lliy g ujenna tatmukes. 14 djetten weḥdesen. rahiy nihnin wizzerenc aḏ ttersen g lliy wizzerenc. aḏ kan yjen wizerc itares g ttani wizerc tawdan jmiyƹ g burriƹ.» 15 yuwayas buṭrus: «siḵnaneγ mammeḵ ayuh n tenfust.» 16 yaxy yerras:

«yenda ḥetta kennim witfehmemc zada? 17 yenda witsinemc lliy uču lliy itaḏef al imi yetreḥ al jjar wembeƹd al lmeyyali? 18 amma lliy itefγed seg imi itased seg ul aḏ d netta lliy yesenzes bnaḏem. 19 rahiy seg ul ttesented lexdayer lliy wiḥlineṯ am temenγiwt aḏ zina aḏ lefsaḏ aḏ sserqeṯ aḏ chedeṯ n zzur aḏ dwiy g midden. 20 ayuh d iḥajeyen lliy tnezzesen bnaḏem. amma uču man γiyr asireḏ n ifesn wiyetnezzesc bnaḏem.»

21 wembeƹd yeffeγ yesuwƹ seg aydin n mkan ireḥ al lḍraf n ṣuwr aḏ ṣeyda lliy middenisen muc d uḏeyin. 22 yaxy temeṭṭuṯ tekenƹanit s yin tusesd tetṣeyyeḥ: «rreḥmiḏ ayya siydneγ ay memmis n dawud. yelli tetƹana ggeṯ. yeskenniṯ cciyḍan.» 23 lekenti wisyerri ḥetta tuflayt. yaxy usend tlamḏes mmelnas tƹewaḏen: «ggas mag texs. rahiy nettaṯ tetṣeyyeḥ deferrenneγ.»

24 yaxy yerrasen: «rahiy yenkiyiḏ rebbiy kan al midden lliy weddren am tulli seg aṯ israyil.»

25 lekenti temeṭṭuṯ teqrebesd tesjeḏ tuweyas: «ƹewniḏ ayya siydneγ.»

26 yaxy yerras: «muc d ṣwab mam aywiy aγrum n imeckennis we atidileweḥ y ijriwen n iṭṭan.»

27 tuwa: «γareḵ lḥeq ayya siydneγ lekenti ijriwen n iṭṭan tteten seg ifetfuten n aγrum lliy tṭuṭan seg uču n iḏbabenesen.»

28 yaxy yerras yesuwƹ: «ayya temeṭṭuṯ liymanim d meqqar. tamyuc rebbiy lliy teḍlebbeḏ.» yaxy teḥla yellis ƹlewleh.

29 wembeƹd ireḥ yesuwƹ s yin al iylel n ljeliyl. yuli al jbel ygeƹmez dinet. 30 uγennesd midden ggeṯ d lƹeybin aḏ lliy meclulin aḏ ileƹmayen aḏ ibekkucen aḏ imuḍan ttenyaṯ. ggenten zzaṯis, yseḥlayin. 31 yaxy fehhen midden mniyn zren ibekkucen duggan aḏ imeclulen ḥlan aḏ lƹeybin gguren yeqƹeḏ aḏ lliy wizzerenc zerren. aḏ mejden rebbiy n israyil.

32 yesγuy yesuwƹ af tlamḏes yuwa: «rahiy sexxefniḏ ayuh n midden. γarsen ṭuruh 3 d ussanaṯ iḏiy aḏ willic man ačan. ykemmel uču lliy uγentiḏ yiḏesen. neči wilγisexc aruḥen lluzen, balek witquddunc aḏeṣlen.»

33 yaxy tlamḏes uwan: «s manis tadnaγ g ayuh n lxla tiqurseṯin keffeneṯ y ayuh n midden lkul.»

34 ysesetnin: «mennit γarwem d tiqurseṯin?» uwanas: «7 aḏ trubay timeckunin.»

35 yaxy yuwa y midden anden y uču af tammurt. 36 wembeƹd iqam aydin n tiqurseṯin aḏ aydin n trubay. yeḥmeḏ rebbiy, yerza aγrum, yuci y tlamḏes, ferqent af midden.

37 čen midden almiy cebƹen. wembeƹd qamen tlamḏes 7 n isnin ƹebbenneṯ seg tiqurseṯin lliy fdelented.

38 aḏ wsiyn lliy čen 4000 d irgazen man γiyr tiseḏnan aḏ imeckenen.

39 wembeƹd ydjin aruḥen. yuli al leflukeṯ. ireḥ al tmura n mejdan.