1 tajji bekri mleymen tijekkelt iḍen imeqqaren n lkuhhan aḏ iwessaren n midden. aḏ mfehmen bac anγen yesuwƹ. 2 wembeƹd qqenent. aḏ awyent ucent y biylaṭus lwali lliy teggiy ruwma.
3 mniyn yezra yehuwḏa lliy yezenzesentiḏ mammeḵ ḥkemmen fellas, yendem aḏ yerra aydin n 30 n imeḥbuben n lfejreṯ y imeqqaren n lkuhhan aḏ iwessaren. 4 aḏ yuwa: «aγleḍeγ zenezγawem iḏemmen n yjen xaṭih.» yaxy rennas: «neccin ayuh wiγenyethemc. ayuh d lmuckeltiḵ cek.» 5 yaxy yluweḥ aydin n imeḥbuben n lfejreṯ g lheykel. ireḥ yexneq imanis. 6 qamen imeqqaren n lkuhhan aydin n imeḥbuben n lfejreṯ. uwan: «ayuh n iflusen d ssum n iḏemmen. ḥram ateneg g ṣṣenduq n lheykel.» 7 aḏ beƹd mag cawren beƹḍhum, sγen mezdeγ n lliy ixeddem g lfuxar bac aydel d ljebbeneṯ y iγriben. 8 aḏ afelxaḍert n ayuh wecci mezdeγ diyn al ṭuruh mmelnas mezdeγ n iḏemmen. 9 amyuh yentem lliy yuwa nnabiy irmiya seg lemmi:
«awyen aydin n 30 n imeḥbuben n lfejreṯ
lliy ucent aṯ israyil d ssumis
10 sγen sisen mezdeγ n lliy ixeddem g lfuxar
mammeḵ yuwayiḏ rebbiy.»
11 aḏ yebbed yesuwƹ zzaṯ lwali biylaṭus. ysesetni lwali: «yenda cek d lmelek n wuḏeyen.» yerras: «cekkin tewiḏ ayuh amma much mammeḵ teḥsebeḏ.» 12 aḏ wsiyn imeqqaren n lkuhhan aḏ iwessaren n midden tehmen diyes aḏ netta isusem witerric fellasen. 13 yaxy yuwayas biylaṭus: «yenda witsellec mag mmelen diyeḵ.» 14 lekenti yesuwƹ wisyerri ḥetta d tuflayt. yaxy ifeh lwali nyeƹdel.
15 aḏ yusi lwali yelmeḏ yetsiyeb kul tfeṣka yjen seg imeḥbas lliy texterent midden. 16 aḏ yusi lweqt ḏḏin diyes yjen yeḥbes ismis barebbes senent lkulhum. 17 mniyn mleymen yuwayasen biylaṭus: «mam texsem afensiybeγ; barebbes naγ yesuwƹ lliy mmalnas lmesiyḥ.» 18 aḏ netta yessen lliy nihnin uγenestiḏ afelxaḍert ḥseḏent.
19 mniyn yusi ygeƹmez af lkursi n ḥukem tenkiyas lehlis temmal: «arr lbaliḵ ggeḏ ḥaja y weddin lliy xaṭih. ugeḏḏeγ as wuh ggeṯ afelxaḍert xertleγ siyes.»
20 lekenti imeqqaren n lkuhhan aḏ iwessaren uwan y midden asemlen aysiyeb barebbes we ayenγ yesuwƹ. 21 iƹeweḏ ysesetnin biylaṭus: «mentan sisen texsem afensiybeγ.»
yaxy rennas: «barebbes.»
22 yerniy ysesetnin: «mala man aggeγ y yesuwƹ lliy mmalnas lmesiyḥ.»
rennas lkulhum: «ṣelbi.»
23 yaxy ysesten: «matta yeggi wiyeḥli.»
rnin ṣeyḥen: «ṣelbi.»
24 mniyn yufa lliy widdic lfeydeṯ aḏ ḥaḍerbac midden tadekren g uḏmis. yuγed aman aḏ isireḏ ifesnis zzaṯsen lkul. aḏ yuwa: «iḏemmen n ayuh n argaz muc g teḵrumtiw. ggeṯ lliy texsem.»
25 rennas midden lkul: «iḏemnis g itḵerminneγ neccin aḏ tḵermin n ṭarweneγ.» 26 yaxy yseybasen barebbes. amma yesuwƹ iwettiy s ṣṣut wembeƹd yucesentiḏ bac atṣelben.
27 yaxy kerkren iƹessekriyyen n lwali yesuwƹ al tzaqqa n lḥkumeṯ aḏ mleymen fellas iƹessekriyyen n lfirqeṯ lkulhum. 28 yaxy kkesnas lḥweyjis aḏ ireḍnas rdi d zuggaγ. 29 aḏ ḏran ṭṭuq seg ysennanen ggent af ixfis aḏ ggenas teqeṣbeyt g fusis n limin aḏ rkeƹen zzaṯis teṯhezzan fellas ammalen: «sselam ayya lmelek n wuḏeyen.» 30 aḏ skufsen fellas. aḏ kkesnas teqeṣbayt wettent siyes af ixfis. 31 aḏ beƹd mag ƹeddan fellas lgustu, kkesnas rdi. ireḍnas leḥweyjis aḏ awyent bac atṣeliben.
32 mniyn nihnin tkerkren diyes, ufen argaz seg lqirineya ismis simƹan zheren fellas bac ayqam ṣṣelib.
33 weqt lliy uṣellen al umkan ismis ljuljuṯa, lmeƹnas mkan n ixsan n iγef. 34 ucen y yesuwƹ crab yizay bac aysu. iḏewqi lekinti wiyeqqil atisu.
35 yaxy ṣlebbent aḏ ggen lqurƹeṯ af lḥweyjis. 36 aḏ geƹemzen dinet tƹussun fellas. 37 aḏ ggen nnaj ixfis af ṣleb lblakeṯ. turi fellas lƹemeltis: «ayuh d yesuwƹ lmelek n wuḏeyen.» 38 aḏ ṣlebben yiḏes sen n iquṭƹiyen. yjen af limin yjen af lisar.
39 aḏ wsiyn lliy tƹeddan deƹƹun diyes aḏ ṣunuḍen g ixfewnesen. 40 aḏ mmalen: «ayya lliy tayehdem lheykel we atyebna g 3 d ussanaṯ semneƹ imaniḵ, kan cek d memmis n rebbiy. zwa s nnaj ṣṣelib.»
41 aḏ ṯmesxren fellas zada imeqqaren n lkuhhan aḏ lliy seḥfeḍen g cceriyƹeṯ aḏ iwessaren. uwan: 42 «ysemneƹ ttenyaṯ amma wiyetqudduc aysemneƹ imanis. yaxy netta d lmelek n israyil? mmaltas ayezwa ṭuruh s nnaj ṣṣelib bac anamen siyes. 43 yeṯwekkel af rebbiy aḏ yuwa: < neči d memmis n rebbiy. > adj atisemneƹ mala kan yexsi.» 44 aḏ wsiyn iquṭƹiyen lliy tweṣelben yiḏes mmalnas am ayuh n dwiy.
45 aḏ seg zguwas al madi sleṯa tezwad tellest af tammurt lkulha. 46 yid leqrabeṯ n maḍi 3 izewek yesuwƹ zewek d meqqar: «liy, liy lima cebeqteni.» yeƹni: «ay rebbiy ay rebbiy maγer tedjiḏ siyi?»
47 mniyn slennas lbeƹḍ n lliy bbedden diyn uwan: «yesγuyu af liyya.» 48 yaxy yuzzel yjen sisen iqam tenecceft yseγemsiṯ g lxel. yeggiṯ af teqeṣbayt yezlasted bac aysu.
49 lekenti ttenyaṯ uwanas: «dji weḥdes. adj anḥekker zeƹma tadyas liyya bac atisemneƹ.» 50 yaxy izewek yesuwƹ tijekkelt iḍen zewek d meqqar aḏ yseffeγ rruwḥ.
51 lweqt dyin yekkeṣ star n lheykel af sen s nnaj al dday. aḏ terjij tammurt, aḏ miren iḍγaγen. 52 leqbur miren aḏ ggeṯ d lmumnin lliy wsiyn ṭṭesen kkeren sisen. 53 mniyn ffaγend seg leqbur, uḏeffen al tmura temeqdust beƹd mag yekker yesuwƹ. aḏ ggeṯ d midden zrenten.
54 amma lqayed n 100 aḏ iƹssekrinis lliy wsiyn tƹussun af yesuwƹ ugeḏḏen ggeṯ mniyn zren tammurt teterjij aḏ mag iṣar. yaxy uwan: «wuh nembelḥeq d memmis n rebbiy.»
55 aḏ ggeṯ d tiseḏnan lliy usineṯ ḏebeƹneṯ g yesuwƹ seg ljeliyl bac atexdemneṯ. tḥekerneṯ af yebƹeḏ matta yetṣar. 56 aḏ jaresneṯ meryem lliy seg lmejdel aḏ meryem yedj n yeƹquwb aḏ yuwsef aḏ yedj n ṭarwa n zebediy.
57 temeddiṯ, yused argaz d murkenti seg lḥumeṯ n rrama ismis yuwsef yusi seg tlamḏa n yesuwƹ. 58 ireḥ al biylaṭus yeḍleb lfriseṯ n yesuwƹ. yaxy yuwayasen biylaṭus: «uctestiḏ.» 59 yaxy yewya yuwsef lfriseṯ ikkefniṯ s lkettan ṣbiḥ. 60 aḏ yeggi g lqebris jdiḏ lliy yeγezzi g iḍγaγen. aḏ ikerkeb aḍγaγ d meqqar yeqqes siyes imi n leqber ireḥ af imanis.
61 aḏ usineṯ dinet meryem lliy seg mejdel aḏ meryem ttani geƹmezneṯ g leqbeleṯ n leqber.
62 al ača as n sebbeṯ, reḥḥen imeqqaren n lkuhhan aḏ iferysiyyen jmiyƹ al biylaṭus. 63 uwanas: «ayya lmelek nesmitad lliy wuddin lliy yetḍeyyeƹ g midden yuwa mniyn yusi yedder: < neči beƹd 3 d ussanaṯ takreγ. > 64 mlasen aƹussen af leqber nyeƹdel al as wi 3 bac wittisenc tlamḏes atserqen we amlen y midden: < yekker seg jar lliy mmuṯen. > we aydel ḍeyyeƹ lexrani iṭer n umezwar.»
65 yaxy yerrasen biylaṭus: «γarwem iƹessasen. berreṯ tƹussem mammeḵ texsem.» 66 reḥḥen qeṣen leqber nyeƹdel. aḏ melsen aḍγaγ aḏ ggen iƹessasen.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)