1 wembeƹd 6 d ussanaṯ yewya yesuwƹ buṭrus aḏ yeƹquwb aḏ yuwḥenna uwas. yuli sisen weḥdesen al ljbel. 2 yeṯbeddel zzaṯesen. yeḏwel uḏmis yetreq am tufuyt aḏ lḥweyjis d imellelen am ddu.

3 yaxy ḍhernesend muwsa aḏ iliyya duggan yiḏes. 4 ƹelewleh yuwa buṭrus y yesuwƹ: «ayya siydneγ mennit d ṣbiḥ lukan aneqqim deh. kan texseḏ aggeγ dehnit 3 n lƹecceṯ: ijeṯ y cek, ijeṯ y muwsa, ijeṯ y iliyya.»

5 mniyn netta ydugga tuḏennin tesḥabt tetreq. yaxy slen mam yemmel seg amasis: «qa wuh d memmi lliy xsext, lliy freḥeγ siyes ggeṯ. sseγdeṯ dwiys.» 6 mniyn slennes udan af uḏmewnesen terjijin ggeṯ. 7 yaxy yeqrebbasen yesuwƹ yeṭṭef disen yuwayasen: «kkreṯ wittegeṯec.» 8 smuqlen al nnaj. zren yesuwƹ weḥdes.

9 mniyn nihnin zuggan seg jbel iweṣṣeyin yesuwƹ yuwa: «wimmeleṯc ḥaja af lliy tezrimt almiy akereγ neči lliy yeḏwel d bnaḏem seg jar lliy mmuṯen.»

10 yaxy sesetnent tlamḏes: «maγer zeγ mmalen lliy seḥfeḍen g cceriyƹeṯ, iliyya tadyas qebbel.»

11 yerrasen: «nembelḥeq. rahiy iliyya tadyas qebbel we ayejra kul ciy. 12 lekenti afenemleγ: rahiy iliyya yused beƹda amma wisteƹerfenc siyes. aḏ ggen diyes mayuƹmal. aḏ amyuh ḥetta neči lliy yeḏwel d bnaḏem tamdwureγ s ifesnesen zada.» 13 lweqt ḏḏin fhemmen lliy netta yufleyasen af yaḥya lmeƹmedan.

14 mniyn uṣellen al midden, yeyyur argaz al yesuwƹ yezwa af ifednis zzaṯis. 15 yuwa: «ayya siydneγ rḥem memmi. rahiy yuḍen s lmeṣṣebyen, aḏ netta yetƹana ggeṯ aḏ seƹat iṭṭuṭa g timsi, seƹat g aman. 16 aḏ uγiγtiḏ al tlamḏeḵ wiquddenc atseḥlan.»

17 yaxy yuwa yesuwƹ: «ayya ljiyl lliy witemenc aḏ lliy yeƹwej al lemmi taqimeγ iḏewem? al lemmi tafenḥemleγ? aγtettiḏ al dehnit.» 18 yezher yesuwƹ af cciyḍan. yeffeγ seg afrux. yeḥla seg lweqt ḏḏin.

19 wembeƹd usend tlamḏa al yesuwƹ weḥdesen sesetnent: «maγer winqudc neccin anzeƹzeq cciyḍan.»

20 yerrasen:

«s lqelleṯ n liymanuwem. lḥeq afenemleγ: lukan γarwem liyman am tḥebuṯ n lxerweƹ rahiy amlem y ayuh n jbel: < ḥewel s yeh al γaḍih. > ayḥuwel, we aquddem kul ciy. 21 amma ayuh n nnuƹ n cyaḍen wiyetemzeƹzeq kan s tẓalliṯ aḏ uẓum.»

22 mniyn wsiyn mleymen g ljeliyl, yuwa yesuwƹ y tlamḏes: «neči lliy yeḏwel d bnaḏem talṭfen midden. 23 we alenγen aḏ g as ṯaleṯ talisekker rebbiy.» yaxy ḥzennen ggeṯ.

24 mniyn uṣellen al kefrnaḥuwm, usend lliy tlayemen g ḍḍeribeṯ n lheykel. uwanas y buṭrus: «yaxy lmuƹlmewem wituc sen drehem?» yerrasen: «ituc.»

25 aḏ s manis yuḏef buṭrus al lḥuc, ysesetni yesuwƹ: «man mleḏ af lmuluk, s mammun tlayemen g ḍḍeribeṯ? yenda tleyemen diyes, seg ibeldiyen naγ seg iγriben?»

26 yerras buṭrus: «seg iγriben.» yaxy yuwa yesuwƹ: «mala ibeldiyen γarsen lḥeq widefƹenc. 27 lekenti bac winseγliḍc ayuh n midden ureḥ al iylel. tluḥeḏ teṣennertiḵ. teṭfeḏ trebit. trebit temezwert lliy tateffeγ. miras imis. taḏefeḏ diyes ṣurdi lqimtis 4 drahem. awyiy teḏefƹeḏ ḍḍeribeṯ fella aḏ fellaḵ.»