1 aḏ g as mezwar n ljumƹa beƹd as n sebbeṯ, treḥ meryem lliy seg lmejdel yid meryem ttani bac aḥekkerneṯ leqber. 2 yaxy terjij tammurt nyeƹdel afelxaḍert yezwad lmleyka n rebbiy seg ujenna. yused, ikerkeb aḍγaγ aḏ ygeƹmez fellas. 3 yusi aydin n lmleyka yetwelƹej am lberq aḏ leḥweyjis d imellalen am ṯṯelj. 4 mniyn zrent indin lliy tƹussun af leqber udan af tammurt amellaḵ mmuṯen.

5 yaxy iṭemmen lmleyka aydin sen tseḏnan, yuwa: «witegeḏmec. neči sseneγ lliy kennimeṯ truzumeṯ af yesuwƹ lliy yetweṣleb. 6 netta wiyelli deh. yekker. semted ḥekermeṯ mkan lliy yusi diyes. 7 ureḥmeṯ fiseƹ mmelmeṯ y tlamḏes; yekker seg jar lliy mmuṯen. aḏ qa netta tafenyesbeq al ljeliyl. dinet tatezrem. qa neči uwiγaḵmeṯ.»

8 yaxy reḥneṯ aydin sen tseḏnan fiseƹ seg mkan n leqber aḏ nihintin ugeḏneṯ aḏ freḥneṯ ggeṯ. aḏ uzzelneṯ al tlamḏes bac abeccerneṯ. 9 qa yeḍheresneṯ yesuwƹ. yuwa: «fislamtiḵmeṯ.» yaxy reḥḥentas aḏ ṭṭefneṯ g idernis aḏ sjeḏentas. 10 yaxy yuweyesneṯ yesuwƹ: «witegeḏmec. ureḥmeṯ mmelmeṯ y yeṯma alleqqan g ljeliyl. aḏ dinet talezren.»

11 mniyn usineṯ tiseḏnan ggurneṯ g ubriḏ, reḥḥen lbeƹḍ n lliy tƹussun al tmura uwan y imeqqaren n lkuhhan af mag iṣar. 12 yaxy mleymen imeqqaren n lkuhhan aḏ iwessaren bac amcewren af ayuh lliy iṣar. aḏ ucen ggeṯ d iflusen y aydin n iƹessesen. 13 aḏ uwanasen: «mleṯ y midden: < tlamḏes usend sreqqent mniyn yeγlebaneγ iḍeṣ. > 14 aḏ kan yuṣel lexbar al lwali andefaƹ fellawem bac wifenyetṣar ḥaja.» 15 yaxy lqan iflusen. aḏ ggen mammeḵ uwanasen imeqqaren n lkuhhan aḏ iwessaren. aḏ ayuh n dwiy yeqqim jar wuḏeyen al as wuh.

16 amma aydin n tlamḏa lliy wsiyn ḥdac reḥḥen al ljeliyl, al jbel lliy isiḵnesentiḏ yesuwƹ. 17 mniyn zrent sjeḏnas. lekenti lbeƹḍesen cukken. 18 yaxy yeqreb yesuwƹ yufleyasen yuwa:

«yuciḏ rebbiy ssulṭaṯ af ujenna aḏ tammurt lkul. 19 ureḥeṯ mala seƹezmeṯ midden lliy g tammurt lkul aḏ zizdiytasen s ysem n baba rebbiy aḏ memmis aḏ rruwḥ lqudus. 20 aḏ seḥfeḍtasen bac aggen s lliy weṣṣiγawem. qa neči tadleγ iḏuwem diyma almiy atkemmel ddunyeṯ.»