yesuwƹ yemmal y midden arren lbalisen seg indin lliy seḥfeḍen g cceriyƹeṯ aḏ iferryisiyen
1 yuflay yesuwƹ y midden aḏ tlamḏes. 2 yuwa:
«lliy seḥfeḍen g cceriyƹeṯ aḏ iferysiyyen γarsen lḥeq aften g umkan n muwsa. aγeṯ dwiysen, teggem matta mmelenwem. 3 amma witteggec lliy tteggent afelxaḍert nihnin witeggenc s dwiysen.
4 aḏ nihnin tteqnen ikemmusen ḏqellen aḏ tteggenten af tiγerdin n midden amma nihnin wilγisenc aṭfen disen ḥetta s iḍuḍenesen. 5 aḏ kul ḥaja tteggenteṯ, tteggenteṯ bac atenezren midden. rahiy nihnin sseƹreḍen tiƹeṣebin lliy teggentent y tẓalliṯ aḏ g temma n leḥweyjesen. 6 aḏ xsen imkanen imezweren g imesiwen, aḏ uḏem n lmejmeƹ almiy mleymen midden. 7 aḏ xsen mam aysellem fellesen g ibriyḏen, we asensγuyen midden ayya lmuƹellem.