11 Baho, cheye chovimanya viifaya kumfugamila Mndewa, ivo choiyoha kuwakema wanhu. Mulungu mwenyego kochimanya vinogile, na niye notumanila kua na mweye ivija mochimanya goya. 12 Si kua chogeza kaidi kuwatogoleni mweye ila cholonda kumwing’hani chija kichitenda chiigodele mweye, ili mdahe kuwalongela waja woigodela ng’huli zao vizili kubita vija viweli mmoyo. 13 Yahawa chooneka china chichala, iyo kwa mbuli ya Mulungu, na yahawa china umanyi wetu wenele, iyo ni kwambuli yenu. 14 Kwavija wende wa Kilisito wochilongoza, cheye chivimanyile kua munhu imwe tu kadanganika kwambuli ya wose, na iyo yolagusa kua wose wailumba muifa yake. 15 Kadanganika kwambuli ya wanhu wose, ili waja weli na ugima sekewakale kwa mbuli yao wenyego, mbali wakale kwambuli yake yadanganike, na kazilibuligwa kwambuli yao.

16 Kwaivo kulawa sambi, cheye hachimgeza munhu yoyose chiunhu. Hata yahawa chipindi chimwe chimgeza Kilisito chiunhu, mbali sambi hachitenda ivo kaidi. 17 Munhu yoyose yahailumba na Kilisito kokua chilumbe cha sambi, gaumwaka gabita, sambi kokua munhu wa sambi. 18 Zose ni sang’hano za Mulungu yochilumba cheye nayo kwa nzila ya Kilisito. Kaching’ha sang’hano da kuwalumba wanhu nayo. 19 Iyo kulonga Mulungu kakala yowalumba wanhu wa isi zose kwa nzila ya Kilisito, bila kugesa malozo ga wanhu wao. Iyo kaching’ha usenga wa kuwatenda wanhu wailumbe nayo.

20 Baho, cheye chawasenga wa mbuli za Kilisito, na Mulungu mwenyego kochitumila cheye chiwapule mwenye. Chino icho chiyalonda Kilisito chimpuleni mweye mchitende. 21 Kilisito hakalile na malozo, mbali Mulungu kamtenda yavale malozo kwambuli yetu, ili cheye kwa kuilumba nayo, chipate kuvala kutogoligwa na Mulungu.