Paulo uko Kolinto
1 Vigamalile gago, Paulo kalawa kae ya Asene kaita Kolinto. 2 Uko Kolinto kamvika Myahudi imwe yokemigwa Akila, mleligwa wa Ponto. Akila hamwe na mwehe wake yokemigwa Pilisikila, wabwela kulawa Italia mmazua gao kwa vija Kaisali Klaudio kakala yalagize Wayahudi wose wasegele kae ya Loma. Paulo kaita kuwatembelela, 3 na kwa vija wao wakala wanhu wa kusona mahema kama iyo Paulo, baho Paulo kakala nao na kusona mahema hamwe nao. 4 Chila Zua da kuhumula Paulo kakala yolongelela nao Wayahudi na Wayunani Muing’anda ya kuiting’hanila Wayahudi ili wamtogole Yesu.
5 Sila na Timoteo viwavikile Makedonia, Paulo kailava chipindi chake chose kwa mbuli ya kuwaligulila Wayahudi na kuwalagusila kua Yesu iyo Kilisito. 6 Mbali viwalemile na kumliga, kakung’husa timbwisi da vivalo vake kulagusa kua, "Mwahaga, iyo mbuli yenu wenyego, niye silaumigwa kwambuli iyo. Na kulawa vino sambi na kugendelela nowawinza wanhu waja haweli Wayahudi." 7 Ivo, kalawa baho kaita na kakala muing’anda ya munhu imwe yokemigwa Tito Yusto yomfugamila Mulungu. Ng’anda yake ikalabehi na ng’anda ya kuiting’hanila Wayahudi. 8 Kilisipo, mkulu wa iyo ng’anda ya kuiting’hanila Wayahudi, kamtogola Mndewa iyo hamwe na mbwiga zake wose, wanhu wengi Wakolinto wautegeleza usenga huo, watogola na kubatizigwa.
9 Zua dimwe ichilo, Mndewa kamlongela Paulo mgamaloleso, "Sekeudumbe, gendelela kuligula tu na sekeuleke, 10 manake niye na hamwe na gweye. Habule munhu yonda yageze kukutoa maana hano muikae hana wanhu wengi weli ubanzi wangu." 11 Baho, Paulo kakala uko kuno yofunda usenga wa Mulungu kwa chipindi cha mlao umwe na nusu.