Gênesis 31

ଜାକୁବ ଲାବନ ତା଼ଣାଟି ହଣ୍‌ନାୟି

1 ଜାକୁବ ମା଼ ଆ଼ବାତି ବାରେ ଦ଼ନ ଅ଼ହାମାନେସି ଅ଼ଡ଼େ ମା଼ ଆ଼ବା ଦ଼ନଟି ତାନିୱାୟି ଈ ବାରେ ବାତ୍‌କୁ ଆ଼ହାମାନେ, ଲାବନ ମୀର୍‌କାତି ଈ କାତା ଜାକୁବ ୱେଚେସି। 2 ଇଞ୍ଜାଁ ଲାବନ ଏ଼ୱାଣି ତଲେ ତଲିତି ଲେହେଁ ଆ଼ଏ, ଜାକୁବ ଏ଼ୱାଣି ମୂମ୍ବୁ ମେସାହାଁ ତେଲ୍‌ହିତେସି। 3 ଏଚେଟିଏ ପ୍ରବୁ ଜାକୁବଇଁ ଏଲେଇଚେସି, "ନୀନୁ ନୀ ତାଞ୍ଜି ଦେ଼ସାତି ନୀ ଲ଼କୁ ତା଼ଣା ୱେଣ୍ତା ହାଲାମୁ, ନା଼ନୁ ନୀ ତଲେ ଡ଼ୟିଇଁ।"

4 ଏଚେଟିଏ ଜାକୁବ ଜା଼ଡ଼ାତି କ଼ଡି ଗରି ମେୟିଁନି ତା଼ଣା ରାହେଲ ଅ଼ଡ଼େ ଲେୟାନି ହା଼ଟି କିହାଁ ଏଲେଇଚେସି। 5 "ନା଼ନୁ ମେସିମାଇଁ ମୀ ଆ଼ବା ତଲିତିଲେହେଁ ନା଼ ୱାକି ଆ଼ଏ; ସାମା ନା଼ ତାଞ୍ଜିତି ମାହାପୂରୁ ନା଼ ତଲେ ମାନେସି। 6 ନା଼ନୁ ନା଼ ବାରେ ବା଼ଡ଼୍‌ୟୁ ତଲେ ମୀ ଆ଼ବାତି ହ଼ଲିୟା କାମା କିହାମାଇଁ, ଈ କାତା ମୀରୁ ପୁଞ୍ଜାମାଞ୍ଜେରି। 7 ଆ଼ତିଜିକେଏ ମୀ ଆ଼ବା ନାଙ୍ଗେ ନା଼ଡ଼ିକିହାଁ ଦସଦେବା ନା଼ କୂଲି ବାଦ୍‌ଲି କିହାମାନେସି; ଆ଼ତି ଜିକେଏ ମାହାପୂରୁ ଏ଼ୱାଣାଇଁ ନାଙ୍ଗେ ନା଼ସା କିହାଲି ହୀହାମାଞ୍ଜଅସି। 8 ଇଚିହିଁ କା଼ବ୍ରା ସିତ୍ରା ଜ଼ନ୍ତ ନୀ କୂଲି ଆ଼ନୁ, ଏ଼ୱାସି ତା଼ନୁଏ ଏଚେ଼ତା ଏଲେଇଞ୍ଜାତେସି, ଏଚିବେ଼ଲା ବାରେ ଜ଼ନ୍ତ କା଼ବ୍ରା ସିତ୍ରା ଡା଼ଲ୍‌କା ଜାର୍ନି କିତୁ; ଅ଼ଡ଼େ ଈର୍‌ୱାଗାଟି ଜ଼ନ୍ତ ନୀ କୂଲି ସମାନା ଆ଼ନୁ, ଏ଼ୱାସି ଈ କାତା ଏଚେ଼ତା ଏଲେଇଞ୍ଜାତେସି, ଏଚିବେ଼ଲା ବାରେ ଜ଼ନ୍ତ ଈର୍‌ୱାଗାଟି ଡା଼ଲ୍‌କା ଜାର୍ନି କିତୁ। 9 ଇଲେକିହିଁ ମାହାପୂରୁ ମୀ ଆ଼ବାତି ଜ଼ନ୍ତ ଅ଼ହାଁ ନାଙ୍ଗେ ହିୟାତେସି।"

10 "ଇଚିହିଁ ଜ଼ନ୍ତ ଗାର୍‌ବାଣା ଆ଼ନାଟି ନା଼ନୁ ହାପାନାତା ମେସ୍ତେଏଁ, ମେହ୍‌ମୁ ଜ଼ନ୍ତଇଁ ଆଣ୍ତିମାନି ବାରେ ପ଼ତୁୟାଁ ଈର୍‌ୱାୟାଁ, କା଼ବ୍ରା ସିତ୍ରା ଅ଼ଡ଼େ ଟିକା ଗାଟାଇ। 11 ଏଚିବେ଼ଲା ମାହାପୂରୁତି ଦୂତୁ ନାଙ୍ଗେ ହାପାନାତା ‘ଜାକୁବ’ ଇଞ୍ଜିଁ ହା଼ଟାଲିଏ, ନା଼ନୁ ଏଲେଇଚେଏଁ ‘ମେହ୍‌ମୁ ନା଼ନୁ ଇମ୍ବାଆଁ ମାଇଁ।’ 12 ଏଚେଟିଏ ଏ଼ୱାସି ଏଲେଇଞ୍ଜାତେସି, ‘ନୀଏଁ ସିନିକିମୁ ତାଲିୟାଁ ତଲେ ଆଣ୍ତିମାନି ବାରେ ପ଼ତୁୟାଁ ଈର୍‌ୱାୟାଁ, କା଼ବ୍ରା ସିତ୍ରା ଅ଼ଡ଼େ ଟିକା ଗାଟାଇ; ଇଚିହିଁ ନିଙ୍ଗେ ତାକି ଲାବନ ଏ଼ନିକିଁ ଲେ଼ମ୍ବିମାଞ୍ଜାନେସି ଏ଼ଦାଆଁ ନା଼ନୁ ମେସ୍ତେଏଁ। 13 ନୀନୁ ଏମ୍ବିୟା ର଼ ୱାଲି ମୁଣ୍ତାତା ନିୟୁଁ ୱା଼କ୍‌ହାମାଞ୍ଜି ଅ଼ଡ଼େ ନା଼ ତା଼ଣା ଆ଼ଞ୍ଜାହାଁ ଏଲେଇଞ୍ଜାମାଞ୍ଜି, ଏ଼ ବେତେଲ୍‌ତି ମାହାପୂରୁ ନା଼ନୁ; ନୀଏଁ ନିଙ୍ଗାହାଁ ଈ ଦେ଼ସା ପିସାହାଁ ମୀ ଲ଼କୁ ଦେ଼ସାତା ୱେଣ୍ତା ହାଲାମୁ।’"

14 ଏଚେଟିଏ ରାହେଲ ଅ଼ଡ଼େ ଲେୟା ଜାକୁବଇଁ ଏଲେଇଚୁ, "ତାଞ୍ଜି ଇଜ ମା଼ଦି ଏ଼ନି ବା଼ଗା କି ଅଦିକାରା ମାନେ ? 15 ମା଼ମ୍ବୁ କି ଏ଼ୱାଣି ନ଼କିତା ଏଟ୍‌କା ଦେ଼ସାତି ଲ଼କୁଲେହେଁ ଆ଼ଏ ? ଏ଼ୱାସି ମାଙ୍ଗେ ପାର୍‌ଚାହାଁ, ମାଙ୍ଗେ ତାକି ହୀତି ଲେକାତାଣି ବାରେ ରା଼ପ୍‌ହା ମାନେସି। 16 ଈଦାଆଁତାକି ମାହାପୂରୁ ମା଼ ଆ଼ବା ତା଼ଣାଟି ଏମିନି ବାରେ ଦ଼ନ ଅ଼ହାମାନେସି ଏ଼ ବାରେ ମା଼ଦି ଅ଼ଡ଼େ ମା଼ କକାରି ପ଼ଦାୟାଁୱାୟି। ଏ଼ଦାଆଁତାକି ମାହାପୂରୁ ନିଙ୍ଗେ ଏ଼ନାଆଁ ୱେସାମାଞ୍ଜାନେସି ଏ଼ଦାଆଁ କିମୁ।"

17 ଏଚେଟିଏ ଜାକୁବ ନିଙ୍ଗାହାଁ ତାନି ମୀର୍‌କା ମା଼ସ୍‌କା ଅ଼ଡ଼େ ଡକ୍ରିସିକାଣି ଊଟୁୟାଁ ଲାକ କୁଗି କିତେସି; 18 ଅ଼ଡ଼େ, ତାମି ମେ଼ଡ଼ିକିତି ବାତ୍‌କୁ ବାରେ ଦ଼ନ, ଇଚିହିଁ, ପଦନ୍‌ ଅରାମତା ଏମିନି ଜ଼ନ୍ତ ଅ଼ଡ଼େ ଏମିନି ଦ଼ନ ମେ଼ଡ଼ି କିହାମାଚେସି, ଏ଼ଦାଆଁ ଆସାହାଁ କିଣାନ ଦେ଼ସାତା ତାନି ଆ଼ବା ଇସାହାକ ତା଼ଣା ହାଚେସି। 19 ଏଚିବେ଼ଲା ଲାବନ ମେ଼ଣ୍ତା ବା଼ଣାୟାଁ ହିଣ୍‌ହାଲି ହାଜାମାଚେସି; ଇଞ୍ଜାଁ ରାହେଲ ତାନି ଆ଼ବାତି ପେ଼ଣ୍‌କା ବମାୟାଁ ସ଼ରୁ କିତେ। 20 ଜାକୁବ ତା଼ନୁ ହାନି କାବ୍ରୁ ୱେହ୍‌ଆନା ଅରାମିୟ ଲାବନଇଁ ନା଼ଡ଼ି କିତେସି। 21 ଇଲେକିହିଁ ଏ଼ୱାସି ତାନି ବାରେ ଦ଼ନ ଆସାହାଁ ହାଚେସି, ଇଞ୍ଜାଁ, ପରାତ୍‌ କାଡା ଗା଼ଣ୍‌ଚାହାଁ ଗିଲିୟଦ ହ଼ରୁ ୱାକି ସିନିକିହାଁ ତା଼କିତେସି।

ଲାବନ ଜାକୁବତି ଜେ଼ଚ ହାନାୟି

22 ଏଚେଟିଏ ତୀନିଦିନା ଡା଼ୟୁ ଲାବନଇଁ ଜାକୁବ ହାଚି କାତା ୱେସ୍‌ପିଆ଼ତେ। 23 ଏଚେ଼ଟିଏ ଏ଼ୱାସି ତାନି କୁଟମି ଅ଼ଡ଼େ ତ଼ଡ଼ୁ ଲ଼କୁଣି ଆସାହାଁ ତାନି ଜେ଼ଚ ଜେ଼ଚ ସା଼ତା ଦିନାତି ଜିରୁ ହାଜାହାଁ ଗିଲିୟଦ ହ଼ରୁ ଟଟ ତାନି ତା଼ଣା ଏତେସି। 24 ସାମା ମାହାପୂରୁ ଲା଼ଆଁୟାଁ ବେ଼ଲାତା ହାପାନାତା ଅରାମିୟ ଲାବନଇଁ ଏଲେଇଚେସି, "ଜାଗ୍ରାତା, ଜାକୁବଇଁ ନେହାଣି ଲାଗେଏତାଣି ଏ଼ନାଆଁ ଜ଼ଲାଆନି।" 25 ଏଚେଟିଏ ଲାବନ ଜାକୁବ ତା଼ଣା ଏନି ବେ଼ଲାତା ଜାକୁବ ହ଼ରୁ ଲାକ ତୂମୁ କେ଼ପାମାଚେସି; ଏଚେ଼ଟିଏ ଲାବନ ଜିକେଏ କୁଟମି ଲ଼କୁ ତଲେ ଗିଲିୟଦ ହ଼ରୁତା ତୂମୁ କେ଼ପିତେସି।

26 ଇଞ୍ଜାଁ ଲାବନ ଜାକୁବଇଁ ଏଲେଇଚେସି, "ନୀନୁ ଏ଼ନାଆଁତାକି ଇଲେତି କାମା କିତି ? ନାଙ୍ଗେ ନା଼ଡ଼ିକିୟାତି ଅ଼ଡ଼େ ନା଼ ମା଼ସ୍‌କାଣି କାଣ୍ତାତି ବା଼ଡ଼୍‌ୟୁ ତଲେ ଦସ୍‌ପା ଅ଼ନି ଲେହେଁ ତାଚିହିଁ ୱା଼ତି। 27 ନୀନୁ ଏ଼ନାଆଁତାକି ନାଙ୍ଗେ ନା଼ଡ଼ିକିହାଁ ଡ଼ୁଗାହାଁ ହ଼ଟାତି ? ଏ଼ନାଆଁତାକି ନାଙ୍ଗେ କାବ୍ରୁ ହିୟାଆତି ? କାବ୍ରୁ ହୀହାମାଞ୍ଜାତିହିଁ, ନା଼ନୁ ନିଙ୍ଗେ ରା଼ହାଁ ତଲେ ପା଼ଚୁ, ଅ଼ଡ଼େ, ତୀତ୍ରି ମ଼ହ୍‌ରି, ବାଜାଗାଜା ତଲେ ହେଲ ହିୟାତେଏଁମା। 28 ନୀନୁ ନା଼ ତାଙ୍ଗା ମୀର୍‌କା ତାଙ୍ଗା ମା଼ସ୍‌କାଣି ଅ଼ଡ଼େ ମା଼ସ୍‌କାଣି ନଣ୍ତାଲି ଜିକେଏ ପାରୁ ହିୟାଆତି, ଈଦି ହା଼ରେକା ବୁଦି ହିଲାଆ କାମା। 29 ନିଙ୍ଗେ ନା଼ସା କିହାଲି ନାଙ୍ଗେ ବା଼ଡ଼୍‌ୟୁ ମାଚେ ସାତା, ସାମା ନୀ ତାଞ୍ଜିତି ମାହାପୂରୁ ରେଃଏନି ଲା଼ଆଁୟାଁ ଏଲେଇଞ୍ଜାତେସି, ‘ଜାଗ୍ରାତା, ଜାକୁବଇଁ ନେହାଣି ଲାଗେଏତାଣି ଜ଼ଲାଆନି।’ 30 ଅ଼ଡ଼େ ନୀନୁ ତାଞ୍ଜି ଇଜ ଅଣ୍‌ପିତାକି ହାଜାଲି ମ଼ନ କିତି, ଆତିହିଁ ଏ଼ନାଆଁତାକି ନା଼ ପେ଼ଣ୍‌କା ବମାୟାଁ ସ଼ରୁ କିତି ?"

31 ଏଚେଟିଏ ଜାକୁବ ଲାବନଇଁ ଏଲେଇଚେସି, "ନାଙ୍ଗେ ଆଜି ହ଼ତାତେ, ଇଚିହିଁ ନା଼ନୁ ଅଣ୍‌ପିତେଏଁ ନୀନୁ ନୀ ମା଼ସ୍‌କାଣି ନା଼ କେୟୁଟି ବା଼ଡ଼୍‌ୟୁ ତଲେ ମୀଞ୍ଜା ଅୟାଦି। 32 ସାମା ନୀନୁ ଆମ୍ବାଆରି ତା଼ଣା ନୀ ପେ଼ଣ୍‌କା ବମାୟାଁ ବେଟାଆ଼ଦି, ଏ଼ୱାସି ନୀଡଅସି; ନା଼ ତା଼ଣା ନୀଦି ଏ଼ନାୟି ମାନେ, ଏ଼ଦାଣି ମା଼ କୁଟମି ନ଼କିତା ବାଚି କିହାଁ ଅ଼ମୁ।" ଇଚିହିଁ, ରାହେଲ ଲାବନତି ପେ଼ଣ୍‌କା ବମାୟାଁ ସ଼ରୁ କିହାମାନି କାତା ଜାକୁବ ପୁଞ୍ଜା ହିଲାଆତେସି।

33 ଏଚେଟିଏ ଲାବନ ଜାକୁବତି ତୂମୁ ଇଲୁତା ହାଜାହାଁ ପାରିତେସି; ଏଚେ଼ଟିଏ ଏ଼ୱାସି ଲେୟା ତୂମୁତା ହାଚେସି, ଅ଼ଡ଼େ ରୀ ହ଼ଲେଣିସିକା ତା଼ଣା ହାଜାହାଁ ପାରିତେସି; ସାମା ଏ଼ୱାସି ତାନି ପେ଼ଣ୍‌କା ବମାୟାଁ ବେଟାଆ଼ଆତେସି। ଏ଼ଦାଆଁତାକି ଏ଼ୱାସି ଲେୟାନି ତୂମୁତି ପିସାହାଁ ରାହେଲ ତୂମୁତା ହାଚେସି। 34 ସାମା ରାହେଲ ଏ଼ ପେ଼ଣ୍‌କା ବମାୟାଁ ଅ଼ହାଁ ଊଟୁ ଗ଼ଣି ମ଼ଣାତା ଇଟାହାଁ ତାନି ଲାକ କୁଗାମାଚେ। ଏଚେଟିଏ ଲାବନ ଏ଼ ତୂମୁ ଇଲୁତି ବାରେୱାକି ପାରିତିହିଁ ଜିକେଏ ଏ଼ୱାଆଁ ବେଟାଆ଼ଆତେସି। 35 ଏଚିବେ଼ଲା ରାହେଲ ତାମି ଆ଼ବାଇଁ ଏଲେଇଚେ, "ନା଼ନୁ ନୀ ନ଼କିତା ନିଙ୍ଗାଲି ଆ଼ଡାଆତେଏଁ ଇଞ୍ଜିଁ ନା଼ ପ୍ରବୁ କାର୍‌ବି ଆୟାଆନି, ଇଚିହିଁ ନା଼ନୁ ଲାଗେଏ*31:35 ଇୟାସିକା ଲେ଼ଞ୍ଜୁତି ତା଼ର୍ୟୁଁ ଊତ୍‌ନାୟି ଆ଼ହାମାଇଁ।" ଇଲେକିହିଁ ପାରିତି ଜିକେଏ ପେ଼ଣ୍‌କା ବମାୟାଁ ବେଟାଆ଼ଆତେସି।

36 ଏ଼ଦାଆଁତାକି ଜାକୁବ କାର୍‌ବି ଆ଼ହାଁ ଲାବନଇଁ ଲା଼ଗିତେସି; ଅ଼ଡ଼େ, ଜାକୁବ ଲାବନଇଁ ଏଲେଇଚେସି, "ନା଼ଦି ଏ଼ନି ଦ଼ହ କି ଏ଼ନି ପା଼ପୁ ଆ଼ତେ ଲାକା ନୀନୁ କାର୍‌ବି ଆ଼ହାଁ ନା଼ ଜେ଼ଚ ଜେ଼ଚ ହଟାତି ? 37 ନୀନୁ ନା଼ ବାରେ ବୀତି ପାରିତି, ଅ଼ଡ଼େ ନୀ ଇଲୁତାଣି ଏ଼ନାଆଁ ବେଟାଆ଼ତି କି ? ଏ଼ଦାଆଁ ନା଼ ଅ଼ଡ଼େ ନୀ ଈ କୁଟମି ନ଼କିତା ଇଟାମୁ, ଈୱାରି ରିଆତାୟି ମାଙ୍ଗେ ବିଚାରା କିୟାପେରି। 38 ଈ କଡ଼େ ବାର୍ସା ଆ଼ତେ ନା଼ନୁ ନୀ ତଲେ ଡ଼ୟାମାଇଁ; ନୀ ମେ଼ଣ୍ତାୟାଁ ଅ଼ଡ଼େ ଗରିୟାଁ ଗାପାହା ହିଲାଉ କି ଏ଼ପା ଆ଼ହାଲି ଊଣା ଆ଼ହାହିଲାଉ, ଅ଼ଡ଼େ ନା଼ନୁ ନୀ ମାନ୍ଦାଟି ମେ଼ଣ୍ତାୟାଁ ତିଞ୍ଜାହିଲଅଁ। 39 ଜା଼ଡ଼ା ଜ଼ନ୍ତ ଏମିନାଣି କାଣ୍ତିୟା କିତେ, ଏ଼ଦାନି ଜିକେଏ ନୀ ତା଼ଣା ତାତେଏଁ, ଏମ୍ବାତି କସ୍ତ ନା଼ନୁ ଆ଼ତେଏଁ; ମାଦେନା ସ଼ରୁ ଆ଼ପେ କି ଲା଼ଆଁୟାଁ ସ଼ରୁ ଆ଼ପେ, ଏ଼ଦାଣି ନା଼ ତା଼ଣାଟି ଅ଼ତି। 40 ମାଦେନା କାରା ଲା଼ଆଁୟାଁ ପେନି ନା଼ନୁ ବା଼ଦା ଆ଼ତେଏଁ; ନା଼ କାନୁଟି ଇଦା ହାଚେ, ଇଲେକିଁ ନା଼ନୁ ମାଚେଏଁ; 41 ନା଼ନୁ କଡ଼େ ବାର୍ସା ପାତେକା ନୀ ଇଜ ଡ଼ୟିତେଏଁ; ନୀ ରୀ ମା଼ସ୍‌କା ତାକି ସଦ ବାର୍ସା ଅ଼ଡ଼େ ଜ଼ନ୍ତୟାଁ ତାକି ସ଼ବାର୍ସା ହ଼ଲିୟା କାମା କିତେଏଁ; ଏମ୍ବାଆଁ ଜିକେଏ ନୀନୁ ଦସ ଦେବା ନା଼ କୂଲି ବାଦ୍‌ଲି କିହାମାଞ୍ଜି। 42 ନା଼ ତାଞ୍ଜିତି ମାହାପୂରୁ, ଅବ୍ରାହାମ ଅ଼ଡ଼େ ଇସାହାକତି ମାହାପୂରୁ, ନା଼ ତଲେ ହିଲାଆତିହିଁ, ନୀଏଁ ନୀନୁ ନାଙ୍ଗେ ୱାର୍‌ଇ କେୟୁତଲେ ପାଣ୍ତାତିମା। ମାହାପୂରୁ ନା଼ ଦୁକୁ ଅ଼ଡ଼େ ନା଼ନୁ କିହାମାନି କାମା ମେସାମାଞ୍ଜାନେସି, ଏ଼ଦାଆଁତାକି ହାଚି ଲା଼ଆଁୟାଁ ନିଙ୍ଗେ ଦାକା ହୀହାମାଞ୍ଜାନେସି।"

ଜାକୁବ ତଲେ ଲାବନତି ରା଼ଜିମା଼ନା

43 ଏଚେଟିଏ ଲାବନ ଜାକୁବଇଁ ଏଲେଇଚେସି, "ଈ ଡ଼ାଆସିକା ନା଼ ମା଼ସ୍‌କା; ତାମି କକାରି ପ଼ଦାଁ ନା଼ କକାରି ପ଼ଦାୟାଁ, ଅ଼ଡ଼େ ଈ କ଼ଡି ଗରି ନା଼ କ଼ଡି ଗରି, ନୀନୁ ଇମ୍ବାଆଁ ଏ଼ନା ଏ଼ନାଆଁ ମେସିମାଞ୍ଜି ଈ ବାରେ ନା଼ୱି। ଏ଼ଦାଆଁତାକି ଈ ନା଼ ମା଼ସ୍‌କାଣି ଅ଼ଡ଼େ ଈୱାସିକା ମୀର୍‌କା ମା଼ସ୍‌କାଣି ନା଼ନୁ ଏ଼ନାଆଁ କିଇଁ ? 44 ୱା଼ମୁ ମା଼ର ରିଆତାୟି ରା଼ଜିମା଼ନା କିନ, ଏ଼ଦି ମା଼ ସା଼କି ଆ଼ନେ।"

45 ଏଚିବେ଼ଲା ଜାକୁବ ର଼ ୱାଲି ଅ଼ହାଁ ମୁଣ୍ତା ଲେହେଁ ନିପ୍‌ହେସି। 46 ଇଞ୍ଜାଁ ଜାକୁବ ତାନି କୁଟମି ଲ଼କୁଣି ଏଲେଇଚେସି, ମୀରୁ ୱାଲ୍‌କା କୂଡ଼ିକିଦୁ; ଏଚେ଼ଟିଏ ଏ଼ୱାରି ୱାଲ୍‌କା ତାଚାହାଁ ର଼ କଟୁ କୂଡ଼ି କିହାଲିଏ, ବାରେ ଏ଼ ୱାଲ୍‌କା କଟୁ ଲାକ ରା଼ନ୍ଦା ତିଚେରି। 47 ଏଚେଟିଏ ଲାବନ ତାନି ଦ଼ରୁ ଜିଗର-ସାହଦୁତା*31:47 ଜିଗର-ସାହଦୁତା, ଆରାମିକ୍‌ ହା଼ଡା/ କଟୁ ସା଼କି ଇଟିତେସି, ଜାକୁବ ତାନି ଦ଼ରୁ ଗଲୟଦ୍‌*31:47 ଗଲୟଦ୍‌, ଏବ୍ରି ହା଼ଡା/ କଟୁ ସା଼କି ଇଚିହିଁ ସା଼କି ୱାଲ୍‌କା ଇଟିତେସି। 48 ଏଚିବେ଼ଲା ଲାବନ ଏଲେଇଚେସି, "ଈ କଟୁ ୱାଲ୍‌କା ମିଙ୍ଗେ ଅ଼ଡ଼େ ମାଙ୍ଗେ ତାକି ସା଼କି ଆ଼ହାଁ ଡ଼ୟିତୁ;" ଏ଼ଦାଆଁତାକି ଏ଼ଦାଣି ଦ଼ରୁ ଗଲୟଦ୍‌ ଅ଼ଡ଼େ ମିସ୍‌ପା*31:48 ଗଲୟଦ୍‌ ଅ଼ଡ଼େ ମିସ୍‌ପା/ କା଼ଃନି ଟା଼ୟୁ ଇଟିତେରି। 49 ଇଚିହିଁ ଲାବନ ଏଲେଇଚେସି, "ମା଼ର ଏଟ୍‌କା ଏଟ୍‌କା ଆ଼ତିହିଁ, ପ୍ରବୁ ନାଙ୍ଗେ ଅ଼ଡ଼େ ନିଙ୍ଗେ କା଼ପୁ କା଼ଚାହାଁ ଡ଼ୟାନେସି। 50 ନୀନୁ ନା଼ ମା଼ସ୍‌କାଣି ଦୁକୁ ହୀଦି, ଆ଼ଆତିଁ ନା଼ ମା଼ସ୍‌କା ମାଞ୍ଜା ମାଞ୍ଜାହାଁ ଅ଼ର ଇୟାସିକାଣି ବୀହା ଆ଼ଦି, ଏଚିବେ଼ଲାତା ଏମିନି ମାଣ୍‌ସି ମା଼ ନ଼କିତା ଡ଼ୟଅସି, ସାମା ମାହାପୂରୁ ନୀ ଅ଼ଡ଼େ ନା଼ ବିତ୍ରା ସା଼କି ଆ଼ନେସି।" 51 ଲାବନ ଜାକୁବଇଁ ଅ଼ଡ଼େ ଏଲେଇଚେସି, "ଈ ୱାଲ୍‌କା କଟୁ ମେହ୍‌ମୁ, ମା଼ ରିଆତାୟି ମାଦି ନା଼ କିତି ମୁଣ୍ତା ମେହ୍‌ମୁ। 52 ନା଼ନୁ ନୀ ଲାଗେଏ କିହାଲି ତାକି ଈ ୱାଲ୍‌କା କଟୁ ଗା଼ଣ୍‌ଚାହାଁ ନୀ ତା଼ଣା ହାଲଅଁ, ଅ଼ଡ଼େ ନୀନୁ ଜିକେଏ ଈ ୱାଲ୍‌କା କଟୁ ଅ଼ଡ଼େ ଈ ମୁଣ୍ତା ଗା଼ଣ୍‌ଚାହାଁ ନା଼ ତା଼ଣା ୱା଼ହାଲି ଆ଼ଡଅତି; ଇମ୍ବାତି ସା଼କି ଈ ୱାଲ୍‌କା କଟୁ ଅ଼ଡ଼େ ଇମ୍ବାତି ସା଼କି ଈ ମୁଣ୍ତା। 53 ଈ କାତା ତାକି ଅବ୍ରାହାମତି ମାହାପୂରୁ, ନାହ଼ରତି ମାହାପୂରୁ ଅ଼ଡ଼େ ଏ଼ୱାରି ଆକୁୟାଁତି ମାହାପୂରୁ ନାଙ୍ଗେ ଅ଼ଡ଼େ ନିଙ୍ଗେ ବିଚାରା କିୟାନେସି," ଏଚିବେ଼ଲା ଜାକୁବ ତାମି ଆ଼ବା ଇସାହାକ ଆମ୍ବାଆରାଇଁ ଆଜିମାଚେସି ଏ଼ୱାଣି ପାର୍‌ମାଣା କିତେସି। 54 ଏଚେଟିଏ ଜାକୁବ ଏ଼ ହ଼ରୁତା ପୂଜା ହେର୍‌ପାହାଁ, ତିଞ୍ଜାଲି ତାକି ତାନି ଲ଼କୁଣି ହା଼ଟିତେସି। ଏଚେଟିଏ ଏ଼ୱାରି ତିଞ୍ଜାହାଁ ହ଼ରୁତା ଲା଼ଆଁୟାଁ ଡ଼ୟିତେରି। ଏଚେଟିଏ ଲାବନ ଲା଼ଇ ନିଙ୍ଗାହାଁ ତାନି ତାଙ୍ଗା ମୀର୍‌କା ମା଼ସ୍‌କାଣି ଅ଼ଡ଼େ ତାନି ମା଼ସ୍‌କାଣି ନଣ୍ତିତେସି ଅ଼ଡ଼େ ହେଲ ହୀତେସି; ଇଲେକିହିଁ ଲାବନ ଜାହାରା ଟା଼ୟୁତା ୱେଣ୍ତା ହାଚେସି।