Gênesis 4

କୟିନ ଅ଼ଡ଼େ ହେବଲ

1 ଏଚେଟିଏ ଆଦମ ତାନି ଡକ୍ରି ହବା ତଲେ ଡୂରାଲିଏ, ଏ଼ଦି ପୂରାମା଼ସା ଆ଼ହାଁ କୟିନ*4:1 ଇଚିହିଁ ଲା଼ବା ଦ଼ରୁ ଗାଟାଣାଇଁ ଜାର୍ନି କିହାଁ ଏଲେଇଚେ, "ପ୍ରବୁତି ସା଼ୟେମି ତଲେ ନା଼ନୁ ର଼ ମୀର୍‌ଏଣାଇଁ ବେଟାଆ଼ହାମାଇଁ।" 2 ଏଚେଟିଏ ଏ଼ଦି ହେବଲ*4:2 ଇଚିହିଁ ଗା଼ଡ଼େକାତାୟି ଦ଼ରୁ ଗାଟି ତାନି ତାୟିଇଁ ଜାର୍ନି କିତେ। ଏମ୍ବାଟିଏ ହେବଲ ମେ଼ଣ୍ତା ଗ଼ଡ଼ୁ ଆ଼ତେସି ଅ଼ଡ଼େ କୟିନ ତା଼ସା କିନାସି ଆ଼ତେସି। 3 ଏଚର ଦିନା ଡା଼ୟୁ କୟିନ ପ୍ରବୁକି ବୂମିତା କାମ୍ବିତି ପା଼ଡ଼େୟି ତାଚାହାଁ ପୂଜା ହେର୍‌ପିତେସି। 4 ଅ଼ଡ଼େ ହେବଲ ଜିକେଏ ତାନି ମାନ୍ଦାଟି ମୂଲୁ ବେତାତି ଏଚେକା ଜ଼ନ୍ତ ଅ଼ଡ଼େ ଏମ୍ବାତି କଡ଼୍‌ୱା ପୂଜା ହେର୍‌ପିତେସି। ପ୍ରବୁ ହେବଲଇଁ ଅ଼ଡ଼େ ତାନି ପୂଜାତି ଅ଼ପିତେସି। 5 ସାମା କୟିନ ଅ଼ଡ଼େ ତାନି ପୂଜାତି ଏ଼ୱାସି ଅ଼ପାଆତେସି। ଏ଼ଦାଆଁତାକି କୟିନ ହା଼ରେକା କାର୍‌ବି ଆ଼ହାଁ ଦୁକୁ ଆ଼ତେସି। 6 ଏଚେଟିଏ ପ୍ରବୁ କୟିନଇଁ ଏଲେଇଚେସି, "ନୀନୁ ଏ଼ନାଆଁତାକି କାର୍‌ବି ଆ଼ହିମାଞ୍ଜି ? ଅ଼ଡ଼େ ଏ଼ନାଆଁତାକି ଦୁକୁ ଆ଼ହିମାଞ୍ଜି। 7 ନେହିଁ କାମା କିତିହିଁ, ନୀ ମୂମ୍ବୁ ପାର୍‌ସାଡ଼ା*4:7 ଲାକ ଆ଼ଏ ? ନେହିଁ କାମା କିଆତିହିଁ, ପା଼ପୁ ଦୁୱେରିତା କା଼ଚା ଡ଼ୟିନେ; ଏ଼ଦି ନୀ ତାକି ଜୂପ୍‌କା ଡ଼ୟିନେ, ସାମା ନୀନୁ ଏମ୍ବାଟି ଜୀଣା ଆ଼ନାୟି ମାନେ।"

8 ଏଚେଟିଏ କୟିନ ତାନି ତାୟି ହେବଲ ତଲେ କାତା ଆ଼ତେସି, ଅ଼ଡ଼େ ଏ଼ୱାରି ତା଼ସା ବୂମିତା ମାଚାଟି, କୟିନ ତାନି ତାୟି ହେବଲଇଁ ପା଼ୟିତେସି।

9 ଏଚେଟିଏ ପ୍ରବୁ କୟିନଇଁ ୱେଚେସି, "ନୀ ତାୟି ହେବଲ ଆମ୍ବିୟା ମାନେସି ?" ଏ଼ୱାସି ଏଲେଇଚେସି, "ନା଼ନୁ ପୁଞ୍ଜାହିଲଅଁ; ନା଼ନୁ ଏ଼ନାଆଁ ନା଼ ତାୟିଇଁ କା଼ପୁ କା଼ଃନାତେଏଁ ?"

10 ମାହାପୂରୁ ଏଲେଇଚେସି, "ନୀନୁ ଏ଼ନାଆଁତାକି ଇଲେତି କାମା କିତି ? ନୀ ତାୟିତି ନେତେରି ବୂମିଟି ନାଙ୍ଗେ ହା଼ଟି ମାଞ୍ଜାନେ। 11 ଏ଼ଦାଆଁତାକି ଆମିନି ବୂମି ନୀ କେୟୁଟି ନୀ ତାୟିତି ନେତେରି ଜୁଚାଲି ଆଙ୍ଗାଲା ଆ଼ଚାମାନେ, ଏ଼ ବୂମିତା ନୀଏଁ ନୀନୁ ବା଼କା ବେଟାଆ଼ତି। 12 ଏ଼ ବୂମିତା ତା଼ସା କାମା କିତିହିଁ ଜିକେଏ ଏ଼ଦି ତାନି ବା଼ଡ଼୍‌ୟୁ ତଲେ ନୀ ସେ଼ବା କିୟେଏ; ନୀନୁ ଦାର୍‌ତିତା ହଟିହିଁ ଦେ଼ସା ରେ଼ନାତି ଆ଼ଦି।"

13 କୟିନ ପ୍ରବୁଇଁ ଏଲେଇଚେସି, "ନା଼ ତାକି ଈ ଡଣ୍ତ ଅ଼ର୍‌ହାଲି ଆ଼ଡାଆ ଗାଟାୟି। 14 ମେହ୍‌ମୁ ନୀନୁ ନୀଞ୍ଜୁ ନାଙ୍ଗେ ଈ ଟା଼ୟୁଟି ପେ଼ର୍‌ହାତି, ନା଼ନୁ ନୀ ତା଼ଣାଟି ହେକ ଆ଼ଇଁ; ଇଲେକିଁ ନା଼ନୁ ଦାର୍‌ତିତା ହଣ୍‌ନାତେଏଁ ଅ଼ଡ଼େ ଦେ଼ସା ରେ଼ନାତେଏଁ ଆ଼ତିସାରେ, ଆମ୍ବାଆସି ନାଙ୍ଗେ ବେଟାଆ଼ହାଁ ପା଼ୟାନେସି।"

15 ଅ଼ଡ଼େ ପ୍ରବୁ ଏ଼ୱାଣାଇଁ ଏଲେଇଚେସି, "ଏ଼ଦାଆଁତାକି ଆମ୍ବାଆସି କୟିନଇଁ ପା଼ୟିନେସି, ଏ଼ୱାଣି ସା଼ତା ବା଼ଗା ଡଣ୍ତ ବେଟାଆ଼ନେସି" ଇଞ୍ଜାଁ କୟିନଇଁ ଏ଼ନିକିଁ ଆମ୍ବାଆସି ମେସାହାଁ ପା଼ୟଅସି, ଏ଼ଦାଆଁତାକି ପ୍ରବୁ କୟିନକି ର଼ ସିନା ହୀତେସି। 16 ଏଚେଟିଏ କୟିନ ପ୍ରବୁ ତା଼ଣାଟି ହାଜାହାଁ ଏଦନତି ୱେ଼ଡ଼ା ହ଼ପୁୱାକିତି ନଦ ଇନି ଟା଼ୟୁତା ବାସା କିତେସି।

କୟିନତି କୂଡ଼ା

17 କୟିନ ତାନି ଡକ୍ରି ତଲେ ଡୂରାଲିଏ, ଏ଼ଦି ପୂରାମା଼ସା ଆ଼ହାଁ ହନକଇଁ ଜାର୍ନି କିତେ; ଇଞ୍ଜାଁ ଏ଼ୱାସି ର଼ ଗା଼ଡ଼ା କିହାଁ ତାନି ମୀର୍‌ଏଣା ଦ଼ରୁ ତଲେ ହନକ ଇଞ୍ଜିହିଁ ଇଟିତେସି। 18 ଏ଼ ହନକ ମୀର୍‌ଏସି ଇରଦ ଇଞ୍ଜାଁ ଇରଦ ମୀର୍‌ଏସି ମହୁୟାୟେଲ, ମହୁୟାୟେଲତି ମୀର୍‌ଏସି ମତୁସାୟେଲ ଇଞ୍ଜାଁ ମତୁସାୟେଲତି ମୀର୍‌ଏସି ଲେମକ। 19 ଈ ଲେମକ ରୀ ଡକ୍ରିସିକାଣି ବୀହା ଆ଼ତେସି, ରଣ୍ତାଣି ଦ଼ରୁ ଆଦା ଅ଼ଡ଼େ ରଣ୍ତାଣି ଦ଼ରୁ ସିଲା ମାଚେ। 20 ଆଦାନି ତା଼ଣାଟି ଜାବଲ ଜାର୍ନା ଆ଼ତେସି, ଏ଼ୱାସି ତୂମୁୟାଁଣା ବାସା କିନାସି ଅ଼ଡ଼େ ମେ଼ଣ୍ତା ଗ଼ଡ଼୍‌କାତି ଆକୁ ମାଚେସି। 21 ଏ଼ୱାଣି ତାୟିତି ଦ଼ରୁ ଜୁବଲ, ଏ଼ୱାସି ଡୁଣ୍ତୁଣି ଅ଼ଡ଼େ ପୀରୁଡ଼ି ଊକିନାରା ଆକୁ। 22 ସିଲାନି ତା଼ଣାଟି ତୁବଲ୍‌-କୟିନ ଜାର୍ନା ଆ଼ତେସି, ଏ଼ୱାସି ପିତାଡ଼ା ଅ଼ଡ଼େ ଲ଼ହତି ୱାଲାସାନ୍ଦା ଜୁତି କେ଼ପିନାସି ମାଚେସି; ତୁବଲ୍‌-କୟିନତି ନୟମା ଇନି ର଼ ତାଙ୍ଗି ମାଚେ।

23 ଏଚେଟିଏ ଲେମକ ତାନି ଡକ୍ରିସିକାଣି ଏଲେଇଚେସି,

"ଆଲ, ଆଦା ଅ଼ଡ଼େ ସିଲା ନା଼ କାତା ୱେଞ୍ଜୁ; ଆଲ ଲେମକତି ଡକ୍ରିସିକା ମୀରୁ ନା଼ ହା଼ଡା ୱେଞ୍ଜାଦୁ;

ନା଼ନୁ, ନାଙ୍ଗେ ୱେ଼ତାତି ବାଦୁଲି ର଼ ଦାଂଗ୍‌ଣେଣାଇଁ ପା଼ୟାମାଇଁ।

24 କୟିନଇଁ ପା଼ୟିନି ବାଦୁଲି ସା଼ତା ବା଼ଗା ଆ଼ତିସାରେ,

ଲେମକକି ତୀନି କ଼ଡ଼ି ସତର ବା଼ଗା ଆ଼ନେ।"

ସେତ ଅ଼ଡ଼େ ଇନସ

25 ଏଚେଟିଏ ଆଦମ ଅ଼ଡ଼େ ୱେଣ୍ତେ ତାନି ଡକ୍ରିନି ତଲେ ଡୂରାଲିଏ, ଏ଼ଦି ର଼ କକାଣାଇଁ ଜାର୍ନି କିହାଁ ଏ଼ୱାଣି ଦ଼ରୁ ସେତ*4:25 ବାଦୁଲି ଇଟିତେ; ଇଚିହିଁ ଏ଼ଦି ଏଲେଇଚେ, "ମାହାପୂରୁ ହେବଲତି ବାଦୁଲି ନାଙ୍ଗେ ଅ଼ଡ଼େ ର଼ ମୀର୍‌ଏଣାଇଁ ହୀହାମାଞ୍ଜାନେସି, ଇଚିହିଁ କୟିନ ଏ଼ୱାଣାଇଁ ପା଼ୟାମାଚେସି।" 26 ଏଚେଟିଏ ସେତକି ଜିକେଏ ର଼ ମୀର୍‌ଏସି ଜାର୍ନା ଆ଼ତେସି, ଅ଼ଡ଼େ ଏ଼ୱାସି ଏ଼ୱାଣାଇଁ ଇନସ ଇଟିତେସି। ଏଚିବେ଼ଲାତା ମାଣ୍‌ସିୟାଁ ପ୍ରବୁ ଦ଼ରୁ ତଲେ ପ୍ରା଼ତାନା କିହାଲି ମା଼ଟ୍‌ହେରି।