1 ଏଚେଟିଏ ମାହାପୂରୁ ନ଼ହଁ ଅ଼ଡ଼େ ତାନି ମୀର୍‌କାଣି ବ଼ର ହୀହାଁ ଏଲେଇଚେସି, "ମୀରୁ ହା଼ରେକା କୂଲୁ ଅ଼ଡ଼େ ବେ଼ଲି ଏ଼ପା ଆ଼ହାଁ ଦାର୍‌ତିତି ନେଞ୍ଜିକିଦୁ। 2 ଦାର୍‌ତିତି ବାରେ ଜ଼ନ୍ତ, ପଟା କା଼ଟି, ଅ଼ଡ଼େ ସାମ୍‌ଦୁରିତି ମୀଣ୍‌କା ମୀ ଆଜିତଲେ ଡ଼ୟିନୁ; ଏ଼ୱି ବାରେ ମୀ କେୟୁତା ହେର୍‌ପି ଆ଼ହାମାନୁ। 3 ବାରେ ବାଣ୍ତିତଲେ ତା଼କିନି ଜ଼ନ୍ତଜିୱେଡ଼ି ମୀ କା଼ଦି ଆ଼ନୁ, କ଼ଡ଼୍‌ଗି କୁଚା ଲେହେଁ ନା଼ନୁ ମିଙ୍ଗେ ଈ ବାରେ ହିୟାତେଏଁ। 4 ସାମା ମୀରୁ ଜୀୱୁ ତଲେ, ଇଚିହିଁ, ନେତେରିଗାଟି ଊଙ୍ଗା ତିନାଆଦୁ। 5 ଇଞ୍ଜାଁ ନା଼ନୁ ମୀ ଜୀୱୁ ଗାଟାଣି ପା଼ୟିତି ନେତେରି ବାଦୁଲି ଅ଼ଇଁ; ବାରେ ଜ଼ନ୍ତଜିୱେଡ଼ି ତା଼ଣାଟି ଆ଼ପେ କି ମାଣ୍‌ସିୟାଁ ତା଼ଣାଟି ଆ଼ପେ, ତାନି ବାଦୁଲି ଅ଼ଇଁ; ନା଼ନୁ ବାରେ ମାଣ୍‌ସି ତାୟି ତା଼ଣାଟି ମାଣ୍‌ସି ଜୀୱୁତି ବାଦୁଲି ଅ଼ଇଁ। 6 ଆମ୍ବାଆସି ମାଣ୍‌ସିଇଁ ପା଼ୟିନେସି, ମାଣ୍‌ସି ତା଼ଣାଟି ଏ଼ୱାସି ପା଼ୟ୍‌ୱି ଆ଼ନେସି; ଇଚିହିଁ ମାହାପୂରୁ ତାନି ୱା଼ଣା ତଲେ ମାଣ୍‌ସିଇଁ ରାଚିକିହା ମାନେସି। 7 ମୀରୁ ହା଼ରେକା କୂଲୁ ଅ଼ଡ଼େ ବେ଼ଲି ଏ଼ପା ଆ଼ହାଁ, ଦାର୍‌ତିତି ନେଞ୍ଜିକିହାଁ ପାଡିକିଦୁ।"

8 ଏଚେଟିଏ ମାହାପୂରୁ ନ଼ହଁ ଅ଼ଡ଼େ ତାନି ମୀର୍‌କାଣି ଏଲେଇଚେସି, 9 "ମେହ୍‌ଦୁ ମୀ ତଲେ ଅ଼ଡ଼େ ମୀ ୱା଼ହିମାନି କୂଡ଼ା ତଲେ, 10 ଅ଼ଡ଼େ ମୀ ତଲେ ମାନି ବାରେ ଜ଼ନ୍ତଜିୱେଡ଼ି ତଲେ, ଇଚିହିଁ, ଜା଼ଜାଟି ହ଼ଚା ୱା଼ତି ନା଼ୟୁଁତି ଜ଼ନ୍ତଜିୱେଡ଼ି ଅ଼ଡ଼େ ଜା଼ଡ଼ାତି ଜ଼ନ୍ତଜିୱେଡ଼ି ଅ଼ଡ଼େ ପଟା କା଼ଟି ଦାର୍‌ତିତି ବାରେ ଜୀୱୁଗାଟାଆଁ ତଲେ ନା଼ନୁ ନା଼ ରା଼ଜିମା଼ନା କିହାମାଇଁ। 11 ନା଼ନୁ ମୀ ତଲେ ଈ ରା଼ଜିମା଼ନା କିଇଁ, ବାରେ ଜୀୱୁଗାଟି ଜ଼ନ୍ତଜିୱେଡ଼ି ପିୟୁ ତଲେ ନା଼ସା ଆ଼ଉ; ଅ଼ଡ଼େ, ଦାର୍‌ତିତି ନା଼ସା କିହାଲି ପିୟୁ ଆ଼ଏ।" 12 ଅ଼ଡ଼େ ୱେଣ୍ତେ, ମାହାପୂରୁ ଏଲେଇଚେସି, "ନା଼ନୁ ମୀ ତଲେ ଅ଼ଡ଼େ ମୀ ତଲେ ମାନି ବାରେ ଜୀୱୁଗାଟି ଜ଼ନ୍ତଜିୱେଡ଼ି ଅ଼ଡ଼େ ୱା଼ହିମାନି କୂଡ଼ା ତଲେ କା଼ଲେଏ ତାକି ଏମିନି ରା଼ଜିମା଼ନା କିତେଏଁ, ଏ଼ଦାନି ସିନା ଈଦି; 13 ନା଼ନୁ ହା଼ଗୁତା ଦାର୍‌ଣକି କିହାମାଇଁ, ଏ଼ଦି ଦାର୍‌ତି ତଲେ ନା଼ ରା଼ଜିମା଼ନାତି ସିନା ଆ଼ନେ। 14 ଏଚିବେ଼ଲା ନା଼ନୁ ଦାର୍‌ତିତା ଦୂନ୍ଦ୍ରା ତାଇଁ, ଏଚିବେ଼ଲା ଏ଼ ଦାର୍‌ଣକି ହା଼ଗୁତା ତ଼ଞ୍ଜାଆ଼ନେ, 15 ଏମ୍ବାଟିଏ ମୀ ତଲେ ଅ଼ଡ଼େ ଊଙ୍ଗା ଗାଟି ବାରେ ଜ଼ନ୍ତଜିୱେଡ଼ି ତଲେ ନା଼ ଏମିନି ରା଼ଜିମା଼ନା ମାନେ, ଏ଼ଦି ନା଼ ଅଣ୍‌ପୁତା ୱା଼ନେ, ଏଚେଟିଏ ବାରେ ଜ଼ନ୍ତଜିୱେଡ଼ିତି ନା଼ସା ତାକି ରା଼ଜି ବୀଡ଼ୱି ଆ଼ଏ। 16 ଏଚେ଼ତା ଦାର୍‌ଣକି ହା଼ଗୁତା ତ଼ଞ୍ଜାଆ଼ନେ, ନା଼ନୁ ଏ଼ଦାଆଁ ମେହ୍‌ଇଁ, ଏଚେଟିଏ ଦାର୍‌ତିତା ମାନି ବାରେ ଜୀୱୁଗାଟି ଜ଼ନ୍ତଜିୱେଡ଼ି ତଲେ ମାହାପୂରୁତି ଏମିନି କା଼ଲେଏତି ରା଼ଜିମା଼ନା ମାନେ ଏ଼ଦାଆଁ ନା଼ନୁ ଅଣ୍‌ପିଇଁ।" 17 ମାହାପୂରୁ ନ଼ହଁଇଁ ଏଲେଇଚେସି, "ଦାର୍‌ତିତି ବାରେ ଜୀୱୁଗାଟି ଜ଼ନ୍ତଜିୱେଡ଼ି ତଲେ ନା଼ନୁ ଏମିନି ରା଼ଜିମା଼ନା କିହାମାଇଁ, ଦାର୍‌ଣକି ଈ ସିନା ଆ଼ନେ।"

18 ନ଼ହଁତି ଏମିନି ମୀର୍‌କା ଜା଼ଜାଟି ପାଙ୍ଗାତା ୱା଼ତେରି, ଏ଼ୱାରି ଦର୍କା ସେମ ଅ଼ଡ଼େ ହାମ ଅ଼ଡ଼େ ଜେପତ୍‌; ହାମ କିଣାନ ଲ଼କୁତି ତାଞ୍ଜି। 19 ଈ ତୀନି ଜା଼ଣା ନ଼ହଁତି ମୀର୍‌କା; ଈୱାରି କୂଡ଼ା ବାରେ ଦାର୍‌ତିତା ଏ଼ପା ଆ଼ତେରି।

20 ଏଚେଟିଏ ନ଼ହଁ ତା଼ସା କାମା କିହାଁ ଅଙ୍ଗୁରି ବା଼ଡ଼ା କିତେସି। 21 ଏଚେଟିଏ ଏ଼ୱାସି ଅଙ୍ଗୁରି ରାସା ଗସାହାଁ ହ଼ଚାହାଁ ତୂମୁ ବିତ୍ରା ନା଼ଗ୍‌ଡ଼ା ଆ଼ହାଁ ରିତେସି। 22 ଏଚିବେ଼ଲାତା କିଣାନ ଲ଼କୁତି ତାଞ୍ଜି ହାମ, ତାମି ଆ଼ବାତି ନା଼ଗ୍‌ଡ଼ା ମେସାହାଁ, ପାଙ୍ଗାତା ହାଜାହାଁ ତାନି ରୀ ତାୟିୟାଁଣି ୱେସ୍ତେସି। 23 ଏଚିବେ଼ଲା ସେମ ଅ଼ଡ଼େ ଜେପତ୍‌ ବମିତା ହିମ୍ବରି ଅ଼ହାଁ ଡା଼ୟୁୱାକି ଜେ଼ନୁ କେ଼ର୍‌ହାଁ ତାମି ଆ଼ବାଇଁ ହିମ୍ବରି ପିଡ଼୍‌କ୍‌ହେରି; ଏ଼ୱାରି ଜେ଼ନୁ କେ଼ର୍‌ହାଁ ହାଜାଲିଏ ଆ଼ବାତି ନା଼ଗ୍‌ଡ଼ା ମେହ୍‌ଆତେରି। 24 ଏଚେ଼ଟିଏ ନ଼ହଁ ଅଙ୍ଗୁରି ରାସା ଇଦାଟି ତେଃଲାଲିଏ ତାନି ଊଣା ମୀର୍‌ଏଣି ମାଣ୍‌କି ପୁଚେସି। 25 ଇଞ୍ଜାଁ ଏ଼ୱାସି ଏଲେଇଚେସି,

"କିଣାନ ଦେ଼ସା ବା଼କା ବେଟାଆ଼ପେ;

ଏ଼ୱାସି ତାନି ତାୟିୟାଁତି ହ଼ଲିୟାଙ୍ଗାତି ହ଼ଲେଏସି ଆ଼ନେସି।"

26 ଅ଼ଡ଼େ ଏ଼ୱାସି ଏଲେଇଚେସି, "ସେମତି ପ୍ରବୁ ମାହାପୂରୁକି ଜହରା ଆ଼ପେ;

କିଣାନ ଲ଼କୁ ସେମତି ହ଼ଲିୟା ଆ଼ପେରି।

27 ମାହାପୂରୁ ଜେପତ୍‌ଇଁ ପାଡିକିପେସି;

ଇଞ୍ଜାଁ ଏ଼ୱାସି ସେମତି ତୂମୁତା ବାସା କିପେସି,

ଅ଼ଡ଼େ କିଣାନ ଲ଼କୁ ଏ଼ୱାଣି ହ଼ଲିୟା ଆ଼ପେରି।"

28 ରା଼ଜି ବୀଡ଼ୱି ଆ଼ତି ଡା଼ୟୁ ନ଼ହଁ ଅ଼ଡ଼େ ତୀନି ୱାଞ୍ଜା ଦୁଇ କ଼ଡ଼ି ଦସ ବାର୍ସା ନୀଡିତେସି। 29 ଇଞ୍ଜାଁ ନ଼ହଁତି ବାର୍ସା ନ଼ ୱାଞ୍ଜା ଦୁଇ କ଼ଡ଼ି ଦସ ବାର୍ସା ନୀଡିତେସି; ଏଚେଟିଏ ଏ଼ୱାସି ହା଼ତେସି।