Matiyo 16

Ya pagpa-edeꞌ ni Jisus sa bet na manga Parisiyo aw Sadusiyo

5 Aw sa pagpakatalipag da na manga umagakan ni Jisus sa danaw, kya-anenganengan nilan na kyalingawan nilan ya dyumala sa pan. 6 Pagkatigkas yan, miglong si Jisus kanilan, "Magpakatadeng kamu sa manga Parisiyo aw Sadusiyo pagaw katapunan kamu na kanilan bet na kasiling na patulinay sa pan!" 7 Aw migpansibalawbalaw ya manga umagakan nan, miglong silan, "Yeiy gya ya du-an na piglong nan, kay walaꞌ kitadun pakadala sa pan." 8 Manang kya-ede-an ni Jisus ya pigbalawbalawan nilan. Yanagaw miglong sakanan adti kanilan, "Anangaꞌ mayu balawbalawan na walaꞌ kamu pakadala sa pan? Katagbiꞌ na pagpangintu-u mayu! 9 Unu, walaꞌ mayu kalabeti? Unu kaꞌ, kyalingawlingawan da mayu ya pagpakan ku sa limammalalan (5,000) ya manga utaw sa limallapid oloꞌ ya pan? Aw pila ya be-en na nyatmuꞌ sa pigpan-imun mayu? 10 Aw walaꞌ da mayu uman ka-anenganengi ya pagpakan ku sa upatemmalalan (4,000) ya utaw sa pitullapid ya pan? Aw pila ya mabaklaꞌ na be-en na nyasamaꞌ na nyatmuꞌ sa pigpan-imun mayu? 11 Aw ya pundinganan na piglong ku kakayna, anangaꞌ walaꞌ mayu kalabeti na bekeꞌ na tengteng pan ya pyalabet ku? Magpakatadeng kamu pagaw katapunan kamu na palangad patulinay na manga Parisiyo aw Sadusiyo!" 12 Aw dun da na manga umagakan nan kalabeti ya piglong ni Jisus na magpakatadeng silan sa baluk na palna-u na manga Parisiyo aw manga Sadusiyo. Kay ya palna-u nilan gayed migkadakulaꞌ aw tyumapun adti madég na manga utaw.