Mateus 18

Ya pag-iyuliꞌ sa inulug na nyakasalaꞌ adti kanmu

15 "Kun awun eped mu na mangintu-uway na nyakasalaꞌ adti kanmu, na, kadtuwi sakanan aw paglonga sa salaꞌ nan na oloꞌ kamu duwa. Kun magpakanyeg sakanan kanmu aw magselsel, na, magkasambuk da ya ginawa mayu. 16 Manang kun diliꞌ sakanan tumandeꞌ kanmu na awun salaꞌ nan, pagpa-agad kaw sa sambuk aw kun duwa ya eped mu na mangintu-uway. Kay dun ni pagbalawbalaw mayu, duwa kun tulu ya magmatinaw sa salaꞌ nan.*18:16 Ya lyekatan sa palna-u yeiy, Déutéronomiyo 19:15. 17 Manang kun diliꞌ sakanan magpakanyeg kamayu, ubat-ubatan mayu adti katipun na manga mangintu-uway. Aw kun diliꞌ sakanan tumandeꞌ, na, pabaya-i la ya utaw yan, aw diliꞌ da kaw mag-ubaybay kanan. Silinga la sakanan na utaw na walaꞌ ya pagpangintu-u sa tengteng Tyumanem aw mangungubla͡ay sa buwis na diliꞌ kasaligan.

Ya pigtumbay aw ya pigpigil

18 "Matinaw ya un ku paglongun kamayu: Kun unu ya pigpigil mayu asini tas na lupaꞌ, yan uman ya pigpigil dadan na Tyumanem adti tas na langit. Kun unu ya pigtumbay mayu asini tas na lupaꞌ, yan uman ya pigtumbay dadan na Tyumanem adti tas na langit.

19 "Aw matinaw uman ya un ku paglongun kamayu: Kun duwa kamayu asini tas na lupaꞌ ya magkasambuk ya ginawa sa pangkay unu ya sekaten mayu dun ni panawagtawag, atag saba na Ama ku na awun ni tas na langit. 20 Kay kun awun duwa aw tulu ya mangintu-uway na magkatipun dun ni kanak ngalan, awun saba aku ni tampid nilan."