Mateus 18

Ya sugu-anen na walaꞌ ya pasinsiya

21 Pagkatigkas yan, dyumulud si Pédro kan Jisus aw nyusip kanan, "Kay Magpalna-uway, kun gayed makasalaꞌ adi kanak ya eped ku na mangintu-uway, makapila ku sakanan pasinsiyayi? Unu, makapitu oloꞌ?"

22 Aw tyumubag si Jisus kanan, "Paglongun ta kaw na bekeꞌ oloꞌ na makapitu, manang kapituwan (70) ka pitu ka piluꞌ. 23 Kamangan ta sa alimbawaꞌ. Ya Kasakupan na Pighari-an na Tyumanem, kasiling na maynini: Awun sambuk na hariꞌ na migpatawag sa manga sugu-anen nan pada usayen ya manga pigtaligu nan adti kanilan. 24 Sa pagpalekat da na hariꞌ mig-usay, pigpa-agad adti kanan ya sambuk na sugu-anen nan na nyaka-utang sa minélyun na kuwalta. 25 Aw asuntu na walaꞌ nan kabatug bayadi, migsuguꞌ ya hariꞌ na galinen ya sugu-anen yan dala ya kanan ka͡ubayan aw kadég na mangayseꞌ nan. Aw panggalinen uman ya kadakulaꞌ na nyatagtun nan pada makabayad. 26 Yanagaw lyumuhud ya sugu-anen adti asdangan na hariꞌ aw to-o nyangilalat kanan, aw miglong sakanan, ‘Kay Hariꞌ, kallati beg aku! Kun makatagad pa kaw beg, bayadan ta kaw sa kadakulaꞌ!’ 27 Yanagaw pigkallatan sakanan na hariꞌ aw walaꞌ da nan pabayada, aw pigpapanaw da sakanan.

28 "Manang sa pagluwaꞌ da nan, pig-isungun nan ya eped nan na sugu-anen na nyakabeles kanan sa tagbiꞌ na kuwalta. Aw pigtigel nan ya utaw yan aw piglongan nan, ‘Bayadi aku adun sa beles mu kanak!’ 29 Aw to-o nyangilalat ya eped nan, law nan, ‘Kay Lew, kallati aku beg! Kun makatagad pa kaw, bayadan ta kaw sa kadakulaꞌ na beles ku kanmu!’ 30 Manang walaꞌ sakanan kalim na madugay bayadan. Pigpakalabusu nan baling ya eped nan mendaꞌ na makabayad sakanan. 31 Pagkitaꞌ na manga eped nilan na sugu-anen sa nya-imoꞌ, to-o migkalat ya ginawa nilan. Yanagaw nyadtu silan adti asdangan na hariꞌ aw pig-ubat nilan kanan ya kadég na nya-imoꞌ. 32 Pagkatigkas yan, pigpatawag na hariꞌ ya sugu-anen na walaꞌ pakabayad kanan, aw miglong ya hariꞌ, ‘To-o malatay ya pig-imoꞌ mu! Walaꞌ da ta kaw pabayada sa utang mu kanak asuntu na to-o kaw nyangilalat kanak. 33 Anangaꞌ walaꞌ mu kallati ya eped mu kasiling na pagkallat ku kanmu?’ 34 Aw to-o nyadaman ya hariꞌ kanan, aw ya syampetan yan, pigpakalabusu sakanan aw pigpamulayaman na manga magtatunggu-ay mendaꞌ na kabayadan nan ya kadakulaꞌ na beles nan. 35 Maynan uman ya imo-un na Ama ku na awun ni tas na langit adti tagsambuksambuk kamayu, kun diliꞌ mayu tengteng pasinsiya͡an ya salaꞌ na manga eped mayu na mangintu-uway."