1 ଆମା ଲୋକ୍‌ ସିକିୟା ସିନିକା ଜିବନ୍‌ନୋନାନ୍‌, ୱାନ୍‌ ଗ୍ୟାନ୍‌ଦିଙ୍ଗ୍‌ ଜିବନ୍‌ନୋନାନ୍‌;

ମାତର୍‌ ଆମାକାନ୍‌ ଲାଗାନି ମାଟାଦିଙ୍ଗ୍‌ କାଡ଼୍‌ନାନ୍‌, ୱାନ୍‌ ପସୁଦି ୱାଜା ।

2 ସତ୍‌ଦି ଲୋକ୍‌ ପ୍ରବୁଦି ଲାକ୍‌ତୁରାନ୍‌ ଦୟା ପୟ୍‌ନାନ୍‌,

ମାତର୍‌ ତାଗ୍‌ଇକା ଅଡ଼୍‌ବିନିୱାନିଙ୍ଗ୍‌ ୱାନ୍‌ ଦସି କିନାନ୍‌ ।

3 ସେଇ ମାଣାନ୍‌ ଆମାବା ଲୋକ୍‌ ତିର୍‌ ମାନ୍‌ଏନ୍‌,

ମାତର୍‌ ଦାର୍ମୁଦିୱାନି ମୁଲ୍‌ ଏସେଙ୍ଗ୍‌ ଗୁସାଏତ୍‌ ।

4 ଗୁଣ୍‌ତି ଆଇମା ନିଜେଦି କନ୍‌ଲିଦି ତାଲାଦି ମୁକୁଟ୍‌ ୱାଜା;

ମାତର୍‌ ସେମାର୍‌ତି ଆଇମା ତାନି କନ୍‌ଲିଦି ପେଡ଼େକ୍‌ ୱିଜୁଦି ରୁଙ୍ଗିଁତି ୱାଜା ।

5 ଦାର୍ମୁ ଲୋକା ସିନ୍ତା ୱିଜୁ ସତ୍‌;

ମାତର୍‌ ଦୁସ୍ଟ ଲୋକା ୱେର୍‌ନି ମାଟା ବାଣ୍ତିସ୍‌ କିନିକା ।

6 ସେଇକାର୍‌ ଡାକ୍‌ନି ଉଣ୍ତିଙ୍ଗ୍‌ କାପ୍‌କିଜି ମାନ୍‌ଜିନି ମାଟା ଇନାର୍‌,

ମାତର୍‌ ସାନ୍ତି ଲୋକା ୱେୟୁ ୱାରିଙ୍ଗ୍‌ ରକିୟା କିନାତ୍‌ ।

7 ସେଇକାର୍‌ ରେଲାଜି ପକାନାର୍‌ ମାରି ତେବାଏର୍‌,

ମାତର୍‌ ଦାର୍ମୁଦିୱାରି ଇଲୁ ୱିଜୁଦିନ୍‌ ମାନ୍‌ଜିନାତ୍‌ ।

8 ଲୋକୁ ନିଜେଦି ନେଗି ବୁଦି ଇସାବ୍‌ଦାନ୍‌ ୱେଡ଼ିକା ପୟ୍‌ନାନ୍‌,

ମାତର୍‌ ଆମା ଲୋକ୍‌ତି କୁଟ୍‌ ଜିବନ୍‌, ୱାନ୍‌ କାଡ଼ାଇ ଆନାନ୍‌ ।

9 ଆମାୱାନି ଲାକ୍‌ତୁ କାଦି ସିଲେତ୍‌, ନିଜେଦିଙ୍ଗ୍‌ ପେରିକାନ୍‌ କିନାନ୍‌, ୱାନି ବାଦ୍‌ଲୁ ଆମାୱାନିଙ୍ଗ୍‌ ଲୋକୁ ଇନସ୍ତା କିଜିମାନାର୍‌ ମାରି ୱାନିବାନୁ ଦାସର୍‌ ମାନାର୍‌ ୱାନ୍‌ ପେରିକାନ୍‌ ।

10 ଦାର୍ମୁଦି ଲୋକ୍‌ ନିଜେଦି ଜାତୁଦି ଜିବନ୍‌ତିଙ୍ଗ୍‌ ଜିବନ୍‌ନୋନାନ୍‌,

ମାତର୍‌ ସେଇ ଲୋକ୍‌ ନିସ୍ଟୁର୍‌ କିନାନ୍‌ ।

11 ଆମାକାନ୍‌ ନିଜେଦି ବୁମିଦୁ ଚାସ୍‌ ପାଣ୍ତିସ୍‌ କିନାନ୍‌, ୱାନ୍‌ ନାଣ୍ଡ କାଦି ପୋଇନାନ୍‌;

ମାତର୍‌ ଆମାକାନ୍‌ ପାଣି କିଏଣ୍ତା ତେବାନାନ୍‌, ୱାନ୍‌ ବୁଦିସିଲିକାନ୍‌ ।

12 ସେଇ ଲୋକ୍‌ ତାଗ୍‌ଇପାଣିକିନିୱାରି ଜାଡ଼ିଦିଙ୍ଗ୍‌ ଲବ୍‌ କିନାନ୍‌; ମାତର୍‌ ଦାର୍ମୁ ଲୋକ୍‌ତି ମୁଲ୍‌ ପଲ୍‌ସିନିକା ।

13 ସେଇ ଲୋକ୍‌ ନିଜେଦି ୱେୟୁଦି ଅଦାର୍ମୁଦି ମାଟା ଉଣ୍ତିଙ୍ଗ୍‌ ଉରିଦୁ ସେର୍‌ନାନ୍‌, ମାତର୍‌ ଦାର୍ମୁ ଲୋକ୍‌ ଦୁକ୍‌ତାନ୍‌ ରକିୟା ପୟ୍‌ନାନ୍‌ ।

14 ଲୋକ୍‌ ନିଜେଦି ୱେୟୁଦି ପଲ୍‌ଦି ମାଣାନ୍‌ ନେଗେନ୍‌ତାନ୍‌ ୱେଡ଼ିକାଆନାନ୍‌,

ମାରି, ଲୋକ୍‌ତି କିୟୁଦାନ୍‌ କିତିମାନି ପାଣିଦି ପଲ୍‌ ୱାନିଙ୍ଗ୍‌ ସିଆଇଆନାତ୍‌ ।

15 ବୁଦିସିଲିୱାନି ସାରି ୱାନି ନିଜେଦି ଆଗ୍‌ଡ଼ି ଟିକ୍‌;

ମାତର୍‌ ଆମାକାନ୍‌ ଗ୍ୟାନ୍‌ଦିକାନ୍‌, ୱାନ୍‌ ନେଗି ମାଟା ୱେନାନ୍‌ ।

16 ବୁଦିସିଲିୱାନି ରିସା ଅଟାତ୍‌ ତରାଇଆନାତ୍‌;

ମାତର୍‌ ସାଲାକି ଲୋକୁ ସେମାର୍‌ ପିଡ଼ିକାନାନ୍‌ ।

17 ସତ୍‌ ସାକି ମାଟା ଦାର୍ମୁଦିକା ତର୍‌ନାତ୍‌;

ମାତର୍‌ ମିସ୍‌ ସାକି ବାଣ୍ତିସ୍‌କିନିକା ତର୍‌ନାତ୍‌ ।

18 ଇୟାୱାଜା ଏସ ଲୋକ୍‌ ମାନାର୍‌ ଏର୍‌ ଅଡ଼୍‍ବିଏଣ୍ତା ଇନାର୍‌ ୱାରି ମାଟା କାଣ୍ତାଦାନ୍‌ କାତ୍‌ତି ମାଟା ୱାଜା ଆନାତ୍;

ମାତର୍‌ ଗ୍ୟାନ୍‌ତି ଲୋକା ମାଟା ନେଗିକା ।

19 ସତ୍‌ ମାଟା ୱେର୍‌ନି ୱେୟୁ ୱିଜୁଦିନ୍‌ ତେବାନାତ୍‌;

ମାତର୍‌ ମିସ୍‌ ମାଟା ୱେର୍‌ନି ୱେୟୁ ସାଣେକ୍‌ ମାତର୍‌ ।

20 ନାସ୍ଟୁ ସିନ୍ତାକିନିୱାନି ଜିବନ୍‌ତୁ ଟକେକିନିକା ମାନ୍‌ଜିନାତ୍‌;

ମାତର୍‌ ସାନ୍ତି ମାଟା ୱେର୍‌ନିୱାରି ୱେଡ଼ିକା ଆନାତ୍‌ ।

21 ଦାର୍ମୁଦିୱାନି ଉଣ୍ତିଙ୍ଗ୍‌ ଇନି ସନିରାଉ ଗଟାଏତ୍‌;

ମାତର୍‌ ସେଇ ଲୋକ୍‌ ଅନିସ୍ଟ ପାଣିଦୁ ପୁରା ଆନାନ୍‌ ।

22 ମିସ୍‌ମାଟା ୱେର୍‌ନି ଲୋକ୍‌ତି ୱେୟୁଦିଙ୍ଗ୍‌ ପ୍ରବୁ କାଡ଼୍‌ନାନ୍‌;

ମାତର୍‌ ଆମାକାର୍‌ ସତ୍‌ ପାଣି କିନାର୍‌, ୱାନ୍‌ ୱାରି ଉଣ୍ତିଙ୍ଗ୍‌ ୱେଡ଼ିକା ଆନାନ୍‌ ।

23 ସାଲାକି ଲୋକୁ ନିଜେଦି ଗ୍ୟାନ୍‌ ଆଡ଼୍‌କିସି ଇଡ୍‌ନାନ୍‌;

ମାତର୍‌ ବୁଦିସିଲି ଲୋକ୍‌ ନିଜେଦି ଅଗ୍ୟାନ୍‌ ୱେର୍‌ସି ବୁଲାନାନ୍‌ ।

24 ପାଣି କିନି ଲୋକ୍‌ତି କିୟୁ ସାସନ୍‌ କିନାତ୍‌;

ମାତର୍‌ ଗାଡ଼ିଆ ଲୋକ୍‌ତିଙ୍ଗ୍‌ ଜବର୍‌ଦସ୍‌ତାନ୍‌ ପାଣି କିଦେଙ୍ଗ୍‌ ସର୍ପେ କିନାର୍‌ ।

25 ଲୋକ୍‌ତି ନାଣ୍ତ ସିନ୍ତା ମନ୍‌ତିଙ୍ଗ୍‌ ଆଡ୍‌ଗି କିନାତ୍‌;

ମାତର୍‌ ନେଗି ମାଟା ୱାନିଙ୍ଗ୍‌ ୱେଡ଼ିକା କିନାତ୍‌ ।

26 ଦାର୍ମୁଦି ଲୋକ୍‌ ନିଜେଦି ପାଡ଼ାକାଦି ଲୋକାଙ୍ଗ୍‌ ସାରି ତର୍‌ନାନ୍‌;

ମାତର୍‌ ସେଇ ଲୋକ୍‌ ୱାରିଙ୍ଗ୍‌ ସାରି ବାଣାକିନାନ୍‌ ।

27 ଗାଡ଼ିଆ ଲୋକ୍‌ ବନ୍‌ୱାଏନ୍‌ ଆସ୍‌ତି ଜାତୁଦି କାଣ୍ତା ୱାର୍‌ଏନ୍‌;

ମାତର୍‌ ପାଣିକିନି ଲୋକ୍‌ ନାଣ୍ତଦାରାଦି ଦନ୍‌ ପୟ୍‌ନାନ୍‌ ।

28 ଦାର୍ମୁଦି ସାରିଦୁ ଜିବନ୍‌ ମାନାତ୍‌; ମାରି, ଆବେଣି ବୁଲାନି ସାରିଦୁ ସାନିକା ତେବାଏତ୍‌ ।