1 ମନ୍‌ତି ଅଡ଼୍‌ବିନିକା ଲୋକ୍‌ତି ମାଣାନ୍‌ ୱାନାତ୍‌; ମାତର୍‌ ୱେୟୁଦି ମାଟା ପ୍ରବୁଦିମାଣାନ୍‌ ୱାନାତ୍‌ ।

2 ଲୋକ୍‌ତି ୱିଜୁ ବୁଲାନିକା ନିଜେଦି କାଣ୍‌ଗାଦୁ ନେଗିକା ତେର୍‌ନାତ୍‌; ମାତର୍‌ ପ୍ରବୁ ମନ୍‌ତି ସିନ୍ତାଦିଙ୍ଗ୍‌ ବିସାର୍‌ କିନାନ୍‌ ।

3 ପ୍ରବୁଦିମାନୁ ମି ପାଣି ସର୍‌ପେ କିଦୁ, ଆବେଟ୍‌ ମି ଅଡ଼୍‌ନିକା ପୁରା ଆନାତ୍‌ ।

4 ପ୍ରବୁ ୱିଜୁ ବିସୟ୍‌ତିଙ୍ଗ୍‌ ଆବେଣି ନିଜେଦି ଉଦେସ୍ୟ ପୁରା କିନି ଉଣ୍ତିଙ୍ଗ୍‌ କିତାମାନାନ୍‌; ତାଗ୍‌ଇୱାନିଙ୍ଗ୍‌ ବା ନାସ୍ଟୁ ଉଣ୍ତିଙ୍ଗ୍‌ ଦିନ୍‌ କିତାମାନାନ୍‌ ।

5 ମନ୍‌ତୁ ଗର୍ବ କିନି ୱିଜୁ ଲୋକାଙ୍ଗ୍‌ ପ୍ରବୁ କାଡ଼୍‌ନାନ୍‌, କିକୁ ଆସ୍‌ସିସାତିଙ୍ଗା ବା ୱାନ୍‌ ଦଣ୍ତ୍‌ ପୟ୍‌ନାନ୍‌ ।

6 ଦୟା ମାରି ସତ୍‌ତାନ୍‌ ପାପ୍‌ତି କେମା ଆନାତ୍‌, ମାରି, ପ୍ରବୁଙ୍ଗ୍‌ ତିଲାତିଙ୍ଗ୍‌ ଲୋକୁ ସେଇପାଣି କିନିକା ଡ଼ିସ୍‌ନାର୍‌ ।

7 ଲୋକ୍‌ତି ବୁଲାସାଲା ପ୍ରବୁଦି ନେଗିକା ଆତିଙ୍ଗାଁ, ୱାନ୍‌ ୱାନି ସାତ୍ରୁରିଙ୍ଗ୍‌ ବା ୱାନି ୱାଲେ ସାନ୍ତିଦାନ୍‌ ବାସା କିବିସ୍‌ନାନ୍‌ ।

8 ଅନ୍ୟାୟ୍‌ କିଜି ନାଣ୍ତ ଉଣ୍ତାକିନି ବାଦ୍‌ଲୁ ଦାର୍ମୁଦି ୱାଲେ ଉଣା ଉଣ୍ତା କିନିକା ନେଗେତ୍‌ ।

9 ଲୋକ୍‌ତି ମନ୍‌ ନିଜେଦି ସାରି ବିସୟ୍‌ତାନ୍‌ ସିନ୍ତା କିନାତ୍‌; ମାତର୍‌ ପ୍ରବୁ ୱାନି ବୁଲାସାଲା ତିର୍‌ କିନାନ୍‌ ।

10 ରାଜାଦି ୱେୟୁ ବୁଦିଦି ଅଦିକାର୍‌ତି ମାଟା ତେବାନାତ୍‌, ୱାନି ୱେୟୁ ବିସାର୍‌ତୁ ସତ୍‌ ଅମାନ୍ୟ କିଏତ୍‌ ।

11 ଟିକ୍‌ ତୁସ୍‌ନିକା ମାରି ଲେକିସ୍‌କିନିକା ପ୍ରବୁଦି ମାରି ମଣିଦୁ ମାନି ଗୁଣ୍ତୁଙ୍ଗ୍‌ୱିଜୁ ୱାନି ତିଆର୍‌ କିତିପାଣି ।

12 ତାଗ୍‌ଇପାଣି କିନିକା ରାଜାରି କାଡ଼୍‌ନି ମାଟା; ଏନ୍ଦାଇର୍ରିଙ୍ଗ୍‌ ଦାର୍ମୁଦୁ ରାଜାଗାଦି ଡାଟାମ୍‌ ତେବାନାତ୍‌ ।

13 ଦାର୍ମୁଦି ମାଟା ୱେନ୍‌ଡ୍ରେଙ୍ଗ୍‌ ରାଜା ୱେଡ଼ିକା ଆନାନ୍‌, ମାରି ଟିକ୍‌ ମାଟା ୱେର୍‌ନି ଲୋକାଙ୍ଗ୍‌ ରାଜା ଜିବନ୍‌ନୋନାନ୍‌ ।

14 ରାଜାଦି ରିସା ସାତି ଦୁତ୍‌ ୱାଜା; ମାତର୍‌ ବୁଦିଦି ଲୋକ୍‌ ଆକା ସାନ୍ତି କିନାନ୍‌ ।

15 ଅରେନ୍‌ ରାଜାଦି ୱେଡ଼ିକା ମକମ୍‌ତି ଜାୟ୍‌ତୁ ଜିବନ୍‌ ତେବାନାତ୍‌, ମାରି ତାନି ଦୟା ସାରାସାରି ପିରୁଦି ବାଦଡ଼୍‌ ୱାଜା ।

16 ବାଙ୍ଗାରାମ୍‌ଦି ବାଦ୍‌ଲୁ ଗ୍ୟାନ୍‌ ପୋଇନିକା ନେଗେତ୍‌, ମାରି ୱେଣ୍ଡିଦି ବାଦ୍‌ଲୁ ନେଗି ବିସାର୍‌ ଲାବ୍‌ କିନିକା ଆମାଜାକୁ ନେଗେତ୍‌ !

17 ତାଗ୍‌ଇପାଣି ଡ଼ିସ୍‌ନିକା ନେଗି ଲୋକାରି ପେରିଜାରି, ଆମା ଲୋକ୍‌ ନିଜେଦି ସାରି ସୁଡ଼ୁଜି ବୁଲାନାନ୍‌, ୱାନ୍‌ ନିଜେଦି ଜିବନ୍‌ତିଙ୍ଗ୍‌ ରକିୟା କିନାନ୍‌ ।

18 ଆକାର୍‌ ସାପିସ୍‌କିନି ଆଗ୍‌ଡ଼ି ମାନାତ୍‌, ମାରି ଆକାର୍‌ଆନି ମନ୍‌ ଦଂସ୍‌ ଆନି ଆଗ୍‌ଡ଼ି ମାନାତ୍‌ ।

19 ଆକାର୍‌ଆନି ଲୋକା ୱାଲେ ଡଙ୍ଗାଁ କିତି ଜିନିସ୍‌ ବାଟା କିନି ବାଦ୍‌ଲୁ ସିଲିସାତି ଲୋକା ୱାଲେ ଦାର୍ମୁ ଆନିକା ନେଗେତ୍‌ ।

20 ଆମା ଲୋକ୍‌ ମାଟାଦୁ ମନ୍‌ ସିନାନ୍‌, ୱାନ୍‌ ନେଗିକା ପୋଇନାନ୍‌, ମାରି ପ୍ରବୁଦି ମୁସ୍‌କୁ ଆସା କିଜିମାନି ଲୋକ୍‌ ଦନ୍ୟ ।

21 ମନ୍‌ତୁ ଗ୍ୟାନ୍‌ ଲୋକ୍‌ ବୁଦିଦିକାନ୍‌ ଆଜି ୱେଙ୍ଗିଁନାନ୍‌, ମାରି ୱେୟୁଦି ନେଗି ମାଟା ବୁଦି ପିରିପ୍‌ନାତ୍‌ ।

22 ନେଗିବୁଦି, ଆକା ପୋଇତିମାନି ଲୋକ୍‌ ଉଣ୍ତିଙ୍ଗ୍‌ ଜିବନ୍‌ତି ଜଲାଏରୁ ୱାଜା; ମାତର୍‌ ବୁଦିସିଲିକାର୍‌ ବୁଦିସିଲି ଉଣ୍ତିଙ୍ଗ୍‌ ସାସ୍ତି ପୟ୍‌ନାର୍‌ ।

23 ବୁଦିଦି ଲୋକ୍‌ତି ଜିବନ୍‌ ନିଜେଦି ୱେୟୁଦିଙ୍ଗ୍‌ ସିକିୟା ସିନାତ୍‌, ମାରି ୱାନି ୱେୟୁଦି ମାଟା ବୁଦି ପିରିପ୍‌ନାତ୍‌ ।

24 ୱେଡ଼ିକାଦି ମାଟା ପୁକିଦି ସାୱି ୱାଜା, ଆକା ମନ୍‌ତିଙ୍ଗ୍‌ ସାୱି କିନାତ୍‌, ମେନ୍ଦଲତିଙ୍ଗ୍‌ ବପୁ ସିନାତ୍‌ ।

25 ଲୋକ୍‌ତି କାଣ୍‌ଗାଦୁ ଆମା ଆମା ସାରି ନେଗେନ୍‌ ତର୍‌ନାତ୍‌, ମାତର୍‌ ଆବେଣି ସାରାସାରିଦୁ ସାନି ସାରି ତେବାନାତ୍‌ ।

26 ପାଣିକିନିକାନ୍‌ ନିଜେଦି ବାଙ୍ଗାଁ ଉଣ୍ତିଙ୍ଗ୍‌ କାସ୍ଟୁପାଣି କିନାନ୍‌, ଆମାଜାକୁ ୱାନି ୱେୟୁ ଆୟା ଉଣ୍ତିଙ୍ଗ୍‌ ୱାନିଙ୍ଗ୍‌ କୁସାମତି କିନାତ୍‌ ।

27 ପାପ୍‌ତି ଲୋକ୍‌ ସେଇକା ସିନ୍ତା କିନାନ୍‌, ମାରି, ୱାନି ୱେୟୁଦୁ କାସ୍‌ନି ସିସୁ ୱାଜା ମାନାତ୍‌ ।

28 ଅରେନ୍‌ କୁଟ୍‌ମାଟେଙ୍ଗ୍‌ ୱାର୍‌ଗିନି ଲୋକ୍‌ ଜାଟିଜଗ୍‌ଡ଼ା ସପ୍‌ନାନ୍‌, ମାରି ନିନ୍ଦାକିନିକାନ୍‌ ୱାନି ନିଜେଦି ସାଙ୍ଗ୍‌ରିଙ୍ଗ୍‌ ୱେର୍‌ଏ କିନାନ୍‌ ।

29 ଅରେନ୍‌ ଜାଟିଜଗଡ଼ାକିନି ଲୋକ୍‌ ନିଜେଦି ପାଡ଼ାକାଦି ଲୋକାଙ୍ଗ୍‌ ଟକେ କିନାନ୍‌, ମାରି ୱାନିଙ୍ଗ୍‌ ସେଇ ସାରିଦୁ ବୁଲାକିଜି ଅନାନ୍‌ ।

30 ଆମା ଲୋକ୍‌ ନିଜେଦି କାଣୁକୁ ଟେରା ସୁଣାନ୍‌, ୱାନ୍‌ ତାଗ୍‌ଇ ମାଟା ସିନ୍ତା କିଦେଙ୍ଗ୍‌ ଆକା କିନାନ୍‌; ଆମାକାନ୍‌ ନିଜେଦି ୱେପଟିଦିଙ୍ଗ୍‌ ସିପ୍‌ନାନ୍‌, ୱାନ୍‌ ସେଇ ପାଣି ପୁରା କିନାନ୍‌ ।

31 ପାଣ୍ଡିତି କୁକୁଟି ସବା ତର୍‌ନି ମୁକୁଟ୍‌, ଆକା ଦାର୍ମୁ ସାରିଦୁ ବୁଲାତିଙ୍ଗ୍‌ ପୁଟ୍‌ନାତ୍‌ ।

32 ଆମାକାନ୍‌ ରିସାଦୁ ସାନ୍ତି, ୱାନ୍‌ ସାକ୍ତିଦିୱାନି ବାଦ୍‌ଲୁ ପେରିକାନ୍‌; ମାରି, ଆମାକାନ୍‌ ନିଜେଦି ରିସାଦିଙ୍ଗ୍‌ ଉଣା କିନାନ୍‌, ୱାନ୍‌ ଗାଡ଼୍‌ ଜିଣାନି ବାଦ୍‌ଲୁ ନେଗିକାନ୍‌ ।

33 କୁଡ଼ୁକୁଡ଼ି ମାପୁରୁଦି ବଦା ନେସ୍‌ତେଙ୍ଗ୍‌ ପକ୍‌ନାର୍‌, ମାତର୍‌ ଇୟାତାନି ୱିଜୁ ମାଟା ପ୍ରବୁଦି ମାଣାନ୍‌ ୱାନାତ୍‌ ।