1 ଜାଟିଜଗ୍‌ଡ଼ାଦାନ୍‌ ଉଣିକାଦି ପୁରାଆନି ଇଲୁଦି ବାଦ୍‌ଲୁ ସାନ୍ତିଦି ୱାଲେ ୱାର୍‌ତି ରୁଟି କାଣ୍ଡେକ୍‌ ନେଗେଣ୍ଡ୍‌ ।

2 ଆମା ସାକର୍‌ ବୁଦିଦାନ୍‌ ସାଲାନାନ୍‌, ୱାନ୍‌ ସେମାର୍‌ପୟ୍‌ନି ମାରିନ୍‌ତି ମୁସ୍‌କୁ ସାସନ୍‌ କିନାନ୍‌, ମାରି ତଡ଼ାନ୍‌କା ୱାଲେ ଅଦିକାର୍‌ଦି ବାଗ୍‌ ପଇନାନ୍‌ ।

3 ୱେଣ୍ଡି ମାରି ବାଙ୍ଗାରାମ୍‌ ଜାଗ୍‌ଣିଦି ସିସୁଦୁ ପରିକା ଆନାତ୍‌; ମାତର୍‌ ପ୍ରବୁ ଲୋକାଦି ଜିବନ୍‌ତିଙ୍ଗ୍‌ ପରିକା କିନାନ୍‌ ।

4 ତାଗ୍‌ଇପାଣି କିନି ଲୋକ୍‌ ସେଇ ଲୋକ୍‌ତି ୱେୟୁଦି ମାଟା ୱେନାନ୍‌, ମାରି ମିସ୍‌ ମାଟା ୱେର୍‌ନିୱାନି ରିସାଦି ୱେତଲ୍‌ତାନ୍‌ ମାଟା ୱେନାନ୍‌ ।

5 ଆମା ଲୋକ୍‌ ସିଲିସାତିୱାନିଙ୍ଗ୍‌ ସେମାର୍‌ କିନାନ୍‌, ୱାନ୍‌ ୱାନି ତିଆର୍‌କିତିୱାନିଙ୍ଗ୍‌ ନିନ୍ଦା କିନାନ୍‌; ମାରି, କାସ୍ଟୁଦୁ ଆମାକାନ୍‌ ୱେଡ଼ିକା କିନାନ୍‌, ୱାନ୍‌ ଦଣ୍ତ୍‌ ପଇନାନ୍‌ ।

6 ଡକ୍‌ରାଦାଦାରି ସବା ନାତିର୍‌ ମାରି ମାରିନ୍‌କା ସବା ୱାରି ବୁବାସି ଆଇସି ।

7 ନିର୍ବୁଦି ୱେୟୁଦାନ୍‌ ନେଗି ମାଟା ସଏତ୍‌, ମାରି ସାସନ୍‌କିନିୱାନିଙ୍ଗ୍‌ ମିସ୍‌ ଇନିକା ନାଣ୍ତ ତାଗ୍‌ଏତ୍‌ ।

8 ଆମାକାର୍‌ ଲାସ୍‌ ସିନାର୍‌, ୱାରି ଆଗ୍‌ଡ଼ି ଲାସ୍‌ ଉଣ୍ତ୍ରି ଜାଦୁ କାଲୁ ୱାଜା, ୱାର୍‌ ଆମା ତରିନ୍‌ ସନାର୍‌, ଆୟା ତରିନ୍‌ ୱାରି ପାଣି ପୁରା ଆନାତ୍‌ ।

9 ଆମାକାନ୍‌ ଅଦାର୍ମୁଦିଙ୍ଗ୍‌ ପିଡ଼ିକ୍‌ନାନ୍‌, ୱାନ୍‌ ଜିବନ୍‌ନୋନିକା ରେବାନାନ୍‌; ମାତର୍‌ ଆମାକାନ୍‌ ପୁନି ପୁନି ଉନ୍‌ଡ୍ରି ମାଟା ନିକ୍‌ନାନ୍‌, ୱାନ୍‌ ନେଗି ସାଙ୍ଗ୍‌ରିଙ୍ଗ୍‌ ୱେରେଏ କିନାନ୍‌ ।

10 ଅରେନ୍‌ ନିର୍ବୁଦି ଲୋକ୍‌ତିଙ୍ଗ୍‌ ସହେ ଦେବେଙ୍ଗ୍‌ ଡାକ୍‌ନି ବାଦ୍‌ଲୁ ଅରେନ୍‌ ବୁଦିଦି ଲୋକ୍‌ଦିଙ୍ଗ୍‌ ପଦ୍‌ ମାଟା ୱେର୍‌ନିକା ନେଗେତ୍‌ ।

11 ତାଗ୍‌ଇକାନ୍‌ ଆବ୍‌କା ଜାଟି କିନିକା ରେବାନାନ୍‌, ଆଦେଙ୍ଗ୍‌ ୱାନି ବିରୁଦ୍‌ତାନ୍‌ ଦୟାକିଇ କାବୁର୍‌ତାନିୱାନିଙ୍ଗ୍‌ ପକାୟ୍‌ଆନାତ୍‌ ।

12 ଅରେନ୍‌ ବୁଦିସିଲି ଲୋକ୍‌ତି ଲାକ୍‌ତୁ ସନି ବାଦ୍‌ଲୁ ଉଣ୍ତ୍ରି ପିଲା ଡ଼ିସ୍‌ତି ତାଡ଼ି ଅଡ଼୍‍ଜୁ ଲାକ୍‌ତୁ ସନିକା ନେଗେତ୍‌ ।

13 ଆମା ଲୋକ୍‌ ନେଗି ବାଦ୍‌ଲୁ ସେଇକା କିନାନ୍‌, ୱାନି ଇଲୁଦୁ ସେଇକା ଏସେଙ୍ଗ୍‌ ଡ଼ିସ୍‌ଏତ୍‌ ।

14 ଆମାକାନ୍‌ ଜାଟିକିନିକା ଆରାମ୍‌ କିନାନ୍‌ ୱାନ୍‌ ବାନ୍ଦୁ ବାସ୍‌ଡ଼ାକିଜି ଏରୁ ଡ଼ିସ୍‌ନି ୱାଜା; ଆଦେଙ୍ଗ୍‌ ଜାଟିଜଗ୍‌ଡ଼ା ଆରାମ୍‌ ଆନି ଆଗ୍‌ଡ଼ି ଇୟାତାନିଙ୍ଗ୍‌ ଡ଼ିସ୍‌ତୁ ।

15 ଆମାକାନ୍‌ ତାଗ୍‌ଇୱାନିଙ୍ଗ୍‌ ଦସ୍‌ସିଲିକା କିନାନ୍‌ ମାରି ଆମାକାନ୍‌ ଦାର୍ମୁଦିୱାନିଙ୍ଗ୍‌ ଦସି କିନାନ୍‌, ଆୟା ରିଏର୍‌ ପ୍ରବୁଦି ଲାକ୍‌ତୁ ସାମାନ୍‌ କାଡ଼ାନାର୍‌ ।

16 ଗ୍ୟାନ୍‌ କଣି ଉଣ୍ତିଙ୍ଗ୍‌ ନିର୍ବୁଦି ଲୋକ୍‌ତି କିୟୁଦୁ ଏନ୍ଦା ଦନ୍‌ ତେବାନାତ୍‌ ? ୱାନିଙ୍ଗ୍‌ ତ ବୁଦି ସିଲେତ୍‌ ।

17 ସଙ୍ଗ୍‌ ୱିଜୁ ବେଡ଼ାଦୁ ଜିବନ୍‌ନୋନାନ୍‌, ମାରି ତଡ଼ାନ୍‌ ବାଦାଦି ବେଡ଼ାଦୁ ନିନାନ୍‌ ।

18 ବୁଦିସିଲି ଲୋକ୍‌ କିୟୁ ମୁଟ୍‌ସି ନିଜେଦି ପାଡ଼ାକାଦି ଲୋକା ଆଗ୍‌ଡ଼ି ଦାୟି ଆନାନ୍‌ ।

19 ଆମାକାନ୍‌ ଜାଟିଜଗ୍‌ଡ଼ା କିଦେଙ୍ଗ୍‌ ଜିବନ୍‌ନୋନାନ୍‌, ୱାନ୍‌ ପାପ୍‌ଦିଙ୍ଗ୍‌ ବା ଜିବନ୍‌ନୋନାନ୍‌; ମାରି, ଆମାକାନ୍‌ ନିଜେଦି ସେର୍‌ଲାଦିଙ୍ଗ୍‌ ନିରିକା କିନାନ୍‌, ୱାନ୍‌ ସାନିକା ରେବାନାନ୍‌ ।

20 କୁଟ୍‌ମାଟା ମାନି ମନ୍‌ତି ଲୋକ୍‌, ୱାନ୍‌ କାର୍ମୁ ପୟ୍‌ଏନ୍‌; ମାରି, ଆମାୱାନି ୱେକଡେକ ୱେର୍‌ନି ୱେୟୁ, ୱାନ୍‌ ବାଦାଦୁ ଆର୍‌ନାନ୍‌ ।

21 ନିର୍ବୁଦି କଡ଼ଦିଙ୍ଗ୍‌ ଜନମ୍‌କିତି ୟାୟା ଦୁଃକ୍‌ ପୟ୍‌ନାତ୍‌; ମାରି, ନିର୍ବୁଦି କଡ଼ଦି ବୁବା ୱେଡ଼ିକା ପୟ୍‌ଏନ୍‌ ।

22 ୱେଡ଼ିକାଦି ଜିବନ୍‌ ନେଗି ମାୟାମ୍‌ତି ୱାଜା ପାଣି କିନାତ୍‌; ମାତର୍‌ ଦୁକ୍‌ତି ଜିବନ୍‌ ପେଡ଼େକାଙ୍ଗ୍‌ ୱିଜୁ ଜିରା କିନାତ୍‌ ।

23 ତାଗ୍‌ଇକାନ୍‌ ବିସାର୍‌ଦି ସାରିଦିଙ୍ଗ୍‌ ୱେକଣି କିନି ଉଣ୍ତିଙ୍ଗ୍‌ ନେସ୍‌ଏଣ୍‌ଗା ଲାଞ୍ଚ୍‌ ଅନାନ୍‌ ।

24 ବୁଦିମାନି ଲୋକ୍‌ତି ଆଗ୍‌ଡ଼ି ଗ୍ୟାନ୍‌ ତେବାନାତ୍‌, ମାତର୍‌ ନିର୍ବୁଦି ଲୋକ୍‌ତି କାଣ୍‌ଗା ଦୁନିଆଦି ଇତି ସାନ୍ଦି ତେବାନାତ୍‌ ।

25 ଅରେନ୍‌ ନିର୍ବୁଦି କଡ଼ ନିଜେଦି ବୁବା ଉଣ୍ତିଙ୍ଗ୍‌ ଆଡ଼୍‌ବିସ୍‌ କିନାନ୍‌ ମାରି ନିଜେଦି ୟାୟା ଉଣ୍ତିଙ୍ଗ୍‌ ଦୁଃକ୍‌ ତାନାନ୍‌ ।

26 ଦାର୍ମୁଦି ଲୋକ୍‌ତିଙ୍ଗ୍‌ ସାସ୍ତି ସିଦେଙ୍ଗ୍‌ ମାରି ପେରି ଲୋକାଙ୍ଗ୍‌ ୱାରି ସାନ୍ତି ଉଣ୍ତିଙ୍ଗ୍‌ ଡାକ୍‌ନିକା ନେଗେତ୍‌ ସିଲେତ୍‌ ।

27 ଆମାକାନ୍‌ ଉଣା ମାଟା ଇନାନ୍‌, ୱାନି ଗ୍ୟାନ୍‌ ମାନାତ୍‌; ମାରି, ଆମାୱାନି ସାନ୍ତି ଆତ୍ମା, ୱାନ୍‌ ବୁଦିଦିକାନ୍‌ ।

28 ବୁଦିସିଲିକାନ୍‌ ଆଲେତିଙ୍ଗ୍‌, ବୁଦିଦିକାନ୍‌ ଇଜି ଇସାବ୍‌ ଆନାନ୍‌; ମାରି, ୱାନ୍‌ ନିଜେଦି ୱେୟୁଦିଙ୍ଗ୍‌ ଆଲେକିତିଙ୍ଗା, ବୁଦିଦିକାନ୍‌ ଇଜି ଇସାବ୍‌ ଆନାନ୍‌ ।